اسىرەسە مەملەكەتتىك تىلدە جۇرگىزىلگەن ءىستى كەيبىر پروتسەسكە قاتىسۋشى ازاماتتار مۇلدە تۇسىنبەي جاتادى. وسىنداي بولماۋى ءۇشىن قاراعاندى وبلىستىق سوتى ءتىل باسقارماسىمەن بىرلەسىپ, سوت جۇيەسىنىڭ قىزمەتكەرلەرىنە ارنالعان وقۋلىق شىعاردى. 120 اكادەميالىق ساعاتتان تۇراتىن كىتاپتا سوت جۇيەسىنىڭ كاسىبي تەرميندەرى بارىنشا تۇسىنىكتى ەتىپ اۋدارىلعان. الداعى ۋاقىتتا سۋديالار وسى ادىستەمە بويىنشا ءبىلىمىن جەتىلدىرەدى. كەيىن وقۋدى قانشالىقتى يگەرگەنىن ءبىلۋ ءۇشىن ەمتيحان تاپسىرادى. اتاپ وتكەن ءجون, كاسىبي سالاعا بەيىمدەلگەن تۇڭعىش وقۋلىق وزگە دە وبلىستىڭ سوت قىزمەتكەرلەرى مەن تىلدەر باسقارمالارىنا جىبەرىلەدى.
«بۇل كىتاپتىڭ ماقساتى – سوت سالاسىنداعى قىزمەتكەرلەردىڭ قاراپايىم دەڭگەيدە وقىپ, تىڭداپ, جازىپ ءتۇسىنۋ داعدىلارىن قالىپتاستىرۋعا نەگىزدەلدى. بۇل كىتاپتى جازۋدا ساراپشى سۋديالار بىزگە كوپ كومەك كورسەتتى دەسە بولادى. جالپى, كىتاپتى باستاماس بۇرىن 8 اي كولەمىندە سوت سالاسىنداعى تەرميندەردى, بارلىق ءىس جۇرگىزۋ اكتىلەرىنىڭ ۇلگىلەرىن قاراپ, سوت وتىرىسىنىڭ حاتتامالارى, قىلمىستىق ءىس, ازاماتتىق ءىس جۇرگىزۋدى قاراپ, زەردەلەپ بارىپ كىتاپ جازۋعا ارالاستىق», دەيدى تىلدەردى وقىتۋ ورتالىعىنىڭ ادىسكەرى مۋنيرا اعىمباەۆا.
