ايماقتار • 11 قىركۇيەك، 2021

قوستاناي وبلىسىندا زەينەتكەر كورشىلەرىنە وق اتتى

111 رەت كورسەتىلدى

قوستاناي وبلىسىنىڭ ليساكوۆ كورشىلەرىنە وق اتقان زەينەتكەر قايتىس بولدى. سونىمەن قاتار وقيعا سالدارىنان جاراقات العان ايەل دە كوز جۇمدى، دەپ حابارلايدى Egemen.kz.

 

قالانىڭ №3 شاعىن اۋدانىنداعى №18 كوپقاباتتى ءۇيدىڭ اۋلاسىندا بەلگىسىز بىرەۋ وق اتقان.

«بۇگىن ساعات 11:00 شاماسىندا ليساكوۆ پوليتسيا ءبولىمىنىڭ 102 پۋلتىنە 3-شاعىن اۋدان تۇرعىن ءۇيىنىڭ اۋلاسىندا بەلگىسىز بىرەۋ قارۋمەن جۇرگەنى تۋرالى حابارلاما كەلىپ ءتۇستى. وقيعا ورنىنا جەدەل-تەرگەۋ توبى دەرەۋ جىبەرىلدى. كۇدىكتى كەلگەن پوليتسيا قىزمەتكەرلەرىنە قاراي وق اتىپ، سالدارىنان جەدەل-تەرگەۋ توبىنىڭ تەرگەۋشىسى جاراقات الدى. ارتىنشا كۇدىكتى ءۇيدىڭ كىرەبەرىسىندە جاسىرىنعان. قۋدالاۋ بارىسىندا ول ءتارتىپ ساقشىلارىنا وق اتۋدى جالعاستىردى. تۇرعىنداردىڭ قاۋىپسىزدىگى جانە كۇدىكتىنى ۇستاۋ ءۇشىن پوليتسيا قىزمەتكەرلەرى قارۋ قولدانۋعا ءماجبۇر بولدى جانە كۇدىكتى جاراقات الدى. ىزىنشە جاراقات العان ادام ءوز پاتەرىنە قاشىپ، سول جەردە ۇستالدى. ءۇيدىڭ كىرەبەرىسىندە جاراقاتى بار ەكى ايەل انىقتالدى»، دەپ حابارلايدى اتالعان ۆەدومستۆودان.

حابارلامادا ايتىلعانداي، ىشكى ىستەر قىزمەتكەرلەرى زارداپ شەككەندەرگە كومەك كورسەتۋ ءۇشىن وقيعا ورنىنا جەدەل جاردەم شاقىرعان.

«العان جاراقاتىنان ۇستالعان كۇدىكتى اۋرۋحانادا كوز جۇمدى. سونىمەن قاتار، جاراقات العان ايەلدەردىڭ ءبىرى قايتىس بولدى.

قازىرگى ۋاقىتتا قاجەتتى تەرگەۋ ارەكەتتەرى جۇرگىزىلىپ، ءوز كەزەگىندە پروكۋراتۋرا ورگاندارى قارۋدى قولدانۋدىڭ زاڭدىلىعىن زەرتتەپ جاتىر.

الدىن الا تەرگەۋ ناتيجەسىندە بەلگىلى بولعانداي كورشىلەر اراسىنداعى قاندى وقيعا ۇيگە جوندەۋ جۇمىسىن جاساۋعا قاتىستى ماسەلەدەن تۋىنداعان. ماسەلەنى شەشۋ ماقساتىندا 66 جاستاعى زەينەتكەر قولىنا قارۋ العان»، دەلىنگەن حابارلامادا.

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار