مەملەكەت وزىنە جۇكتەلگەن ماقسات-مىندەتتەردى تولىعىمەن ورىنداۋى قاجەت. بۇكىل الەمدى قىسپاققا العان ىندەتكە قاراماستان زاڭ شىعارۋشى جانە اتقارۋشى بيلىك ازاماتتاردىڭ مۇددەسى ءۇشىن جۇمىس ىستەپ, حالىق پەن كاسىپكەرلەرگە بارىنشا قولداۋ كورسەتىپ, كومەك قولىن سوزۋى كەرەك. بۇل رەتتە «بيزنەستىڭ جول كارتاسى-2025» بيزنەستى قولداۋ مەن دامىتۋدىڭ مەملەكەتتىك باعدارلاماسى مەن «قاراپايىم زاتتار ەكونوميكاسى» جەڭىلدىكپەن كرەديت بەرۋ باعدارلاماسىنىڭ مەرزىمىن ۇزارتۋدىڭ ماڭىزدى ەكەنىن اتاپ وتكەن ءجون.
سالىق تولەۋشىلەردىڭ الەۋمەتتىك ماڭىزدى ماقساتتارعا بەرەتىن قارجى-قاراجاتىن ءتيىمدى پايدالانۋ – بيلىك قىزمەتىن باعالاۋدىڭ ماڭىزدى كريتەريى. مەملەكەتتىك بيۋدجەت پەن ۇلتتىق قورداعى قاراجاتتى وڭدى-سولدى شاشىپ, ماقساتسىز جۇمساۋدىڭ سالدارى كوبىنە-كوپ سىبايلاس جەمقورلىققا اكەپ سوعاتىنى دا بەلگىلى. وسىعان وراي پارلامەنت جىل سوڭىنا دەيىن مەملەكەتتىك قارجىنى باسقارۋ تۋرالى زاڭ جوباسىن ازىرلەۋى قاجەت.
ينفلياتسيانىڭ جوعارى دەڭگەيى, باعانىڭ نەگىزسىز ءوسۋى قازاقستاندىق كاسىپورىنداردىڭ دامۋىن تەجەيدى. بۇل كەدەرگىلەر وتاندىق بيزنەستىڭ باسەكەگە قابىلەتتىلىگىن شەكتەپ, ۇلتتىق ەكونوميكانىڭ قۇلدىراۋىنا الىپ كەلۋى دە ابدەن مۇمكىن. وسى قاۋىپ-قاتەردىڭ زاردابىن ەسكەرگەن ەل پرەزيدەنتى ماڭىزدى قۇجاتتا ينفلياتسيانى 4-6% دالىزىنە قايتارۋدى تاپسىردى.
جولداۋدا اگروونەركاسىپتىك كەشەندى سۋبسيديالاۋ پروبلەمالارى دا وتكىر كوتەرىلدى. بۇل ماسەلە اۋىل شارۋاشىلىعى سالاسىندا سىبايلاس جەمقورلىق قىلمىستارىنىڭ سانىن ارتتىرىپ وتىرعانى دا ءمالىم سۋبسيديالاردىڭ قولجەتىمسىزدىگى, قارجىمەن تولىق كولەمدە قامتاماسىز ەتىلمەۋى, قورقىتىپ الۋشىلىق, اقپاراتتىق جۇيەلەر جۇمىسىنداعى تۇراقسىزدىق – وسىنىڭ بارلىعى ەلىمىزدەگى زاڭنامانىڭ بۇزىلۋىنا اكەپ سوعۋدا. وسىعان وراي مەملەكەت باسشىسى پارلامەنتكە مۇددەلى مەملەكەتتىك ورگاندارمەن بىرلەسىپ, قىسقا مەرزىمدە سۋبسيديالاۋ ساياساتىنىڭ زاڭنامالىق نەگىزىن نىعايتۋ تۋرالى زاڭ جوباسىن ازىرلەۋدى تاپسىردى.
بيزنەستى ىنتالاندىرۋ, ەڭ تومەنگى جالاقى مولشەرىن كوتەرۋ, بىرىڭعاي تۇرعىن ءۇي باعدارلاماسىن ازىرلەۋ, ەكولوگيالىق ماسەلەلەردى شەشۋ وسى ءىس-شارالاردىڭ بارلىعى حالقىمىزدىڭ ءال-اۋقاتىن ارتتىرۋعا, ستراتەگيالىق ماقساتتارعا قول جەتكىزۋگە باعىتتالعان.
ولگا بۋلاۆكينا,
سەنات دەپۋتاتى
