قازاقستان مەن شۆەيتساريا ەكىجاقتى قارىم-قاتىناستاردىڭ بارلىق سپەكترى بويىنشا ءوزارا ءتيىمدى, كوپجوسپارلى ىنتىماقتاستىقتى دامىتۋعا نيەتتى. قازاقستان ءسىم باسشىسى م.تىلەۋبەردى شۆەيتساريا ۆيتسە-پرەزيدەنتى, فەدەرالدىق كەڭەسشىسى ء(مينيسترى) يگناتسيو كاسسيسپەن كەلىسسوزدەرىنىڭ نەگىزگى لەيتموتيۆى وسىنداي.
«شۆەيتساريا قازاقستاننىڭ ەۋروپاداعى ماڭىزدى ساياسي جانە ەكونوميكالىق ارىپتەستەرىنىڭ ءبىرى. ءبىز سەنىمگە, ءوزارا قۇرمەتكە جانە ورتاق باسىمدىقتارعا نەگىزدەلگەن بەرىك قاتىناستار ورناتتىق. بۇل قاتىناستار جاھاندىق جانە وڭىرلىك قاۋىپسىزدىكتى قامتاماسىز ەتۋدەگى سەنىمدى سەرىكتەستىكپەن, سەرپىندى ساۋدا ىنتىماقتاستىقپەن, سونداي-اق ساياسي جانە تۇلعاارالىق قاتىناستارمەن نىعايتىلۋدا», دەدى م.تىلەۋبەردى.
قازاقستان مەن شۆەيتساريانىڭ جوعارى باسشىلىعى اراسىنداعى بايلانىستاردىڭ قارقىندى دامۋىن جانە ەكىجاقتى ءوزارا ءىس-قيمىلدى نىعايتۋعا ءوزارا مۇددەلىلىكتىڭ ارتىپ كەلە جاتقانىن اتاپ ءوتىپ, تاراپتار ۇكىمەتارالىق, پارلامەنتارالىق جانە ىسكەرلىك بايلانىستاردى دامىتۋعا ودان ءارى جاردەمدەسۋگە كەلىستى.
حالىقارالىق ماسەلەلەر بويىنشا پىكىر الماسۋ بارىسىندا تاراپتار بۇۇ, ەقىۇ جانە باسقا دا كوپجاقتى قۇرىلىمدار اياسىنداعى ءوزارا ءىس-قيمىلدى تالقىلادى. كەلىسسوزدەردىڭ كۇن تارتىبىنە وڭىرلىك ماسەلەلەر, سونىڭ ىشىندە اۋعانستانداعى جاعداي, ورتالىق ازيا ەلدەرىمەن ىنتىماقتاستىق جانە سۋ رەسۋرستارىن باسقارۋ كىردى. دامۋعا رەسمي كومەك جەلىسى بويىنشا, اتاپ ايتقاندا قازاقستاندىق KazAID حالىقارالىق دامۋ اگەنتتىگى جانە شۆەيتساريانىڭ SDC دامۋ جانە ىنتىماقتاستىق اگەنتتىگى اراسىنداعى بىرلەسكەن جۇمىس اسپەكتىلەرى قوزعالدى.
كەلىسسوزدەر قورىتىندىسى بويىنشا دەلەگاتسيا باسشىلارى ديپلوماتيالىق نەمەسە قىزمەتتىك پاسپورتتاردىڭ يەلەرىن ۆيزالىق تالاپتاردان ءوزارا بوساتۋ تۋرالى, سونداي-اق ديپلوماتيالىق وكىلدىكتەر, حالىقارالىق ۇيىمدار جانىنداعى تۇراقتى وكىلدىكتەر مەن كونسۋلدىق مەكەمەلەر قىزمەتكەرلەرىنىڭ وتباسى مۇشەلەرىنىڭ اقىلى ەڭبەك قىزمەتى تۋرالى ەكى ۇكىمەتارالىق كەلىسىمگە قول قويدى.
سىرتقى ساياسي كۇن تارتىبىندەگى ەكونوميكالىق ديپلوماتيانىڭ باسىمدىعىن ەسكەرە وتىرىپ, مينيستر م.تىلەۋبەردى سول كۇنى شۆەيتساريانىڭ «Stadler Rail», «Ammann Group», «Sandoz», «KS Genetics», «Inoks Capital» جانە «Philip Morris International» ءىرى كومپانيالارىنىڭ باسشىلارىمەن كەزدەسۋلەر وتكىزدى.
ساۋدا-ەكونوميكالىق ىنتىماقتاستىقتى دامىتۋدىڭ ۇلكەن الەۋەتى شۆەيتساريا بيزنەسىنىڭ حيميا-فارماتسەۆتيكا جانە ماشينا جاساۋ, جاڭا تەحنولوگيالار مەن ەنەرگەتيكا سالاسىندا, اگروونەركاسىپ كەشەنى (اوك) مەن قارجى سەكتورىندا ءوزارا ءتيىمدى جوبالاردى ىسكە اسىرۋعا مۇددەلىلىگىمەن راستالادى. شۆەيتساريانىڭ قازاقستاننىڭ ءىرى سىرتقى ەكونوميكالىق سەرىكتەستەرىنىڭ ءبىرى رەتىندەگى ءرولى مەن ماڭىزى اتاپ ءوتىلدى. 2020 جىلى شۆەيتساريا قازاقستانعا تارتىلعان تىكەلەي شەتەلدىك ينۆەستيتسيالار كولەمى بويىنشا 3-ءشى ورىندى, ال ءبىزدىڭ ەلمەن ەكىجاقتى ساۋدا كولەمى بويىنشا 10-شى ورىندى يەلەندى.
ساپار اياسىندا «Kazakh Invest» ۇك» اق مەن شۆەيتساريالىق كومپانيالار اراسىندا قازاقستاننىڭ اوك جانە ماشينا جاساۋ سالاسىنداعى ينۆەستيتسيالىق جوبالاردى ىسكە اسىرۋ بويىنشا ىنتىماقتاستىق تۋرالى مەموراندۋمدارعا قول قويىلدى. سىرتقى ىستەر ءمينيسترى باستاعان قازاقستاندىق دەلەگاتسيا بەرن تاريحي مۇراجايىندا قازاق مەملەكەتتىلىگىنىڭ تاريحىنان بىرەگەي مۇراعاتتىق ماتەريالدارعا ارنالعان ارنايى كورمەنى ارالادى. مۋزەيدە سونداي-اق ر.ب.سۇلەيمەنوۆ اتىنداعى شىعىستانۋ ينستيتۋتى, بەرن تاريحي مۋزەيىندە جانە بەرن ۋنيۆەرسيتەتى اراسىندا «ورتالىق ازيا مەن شۆەيتساريانىڭ تۇركى حالىقتارىنىڭ مۇراسى» اتتى كەلىسىمگە قول قويۋ ءراسىمى ءوتتى.
