جولداۋدا كوكەيدەگى كوپتەگەن تۇيتكىلدى ماسەلەلەردىڭ ءتۇيىنى تارقادى. اسىرەسە, قىزىلوردادان ماڭعىستاۋعا دەيىن جۇت دەندەپ, مال جايىلىمى قيىنداعان تۇستا اۋىل-ايماقتاعى جۇرتقا ۇلكەن جىگەر, ءۇمىت سىيلادى. بۇل – ۇلتتىڭ قاي ۋاقىتتا دا ۇيىسا ءبىلۋىنىڭ دالەلى.
ەل پرەزيدەنتى ءوز جولداۋىندا مەملەكەتتىك ءتىلدىڭ مارتەبەسىنە توقتالىپ, قازاق ءتىلى, شىن مانىندە, ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالىپ جاتقانىن ايتتى. «جالپى, مەملەكەتتىك ءتىلدى قولدانۋ اياسى كەڭەيىپ كەلەدى. بۇل – زاڭدى قۇبىلىس, ءومىردىڭ باستى ءۇردىسى. سوندىقتان, قازاق ءتىلىنىڭ ءورىسى تىم شەكتەلىپ بارا جاتىر دەۋگە نەگىز جوق. اتا زاڭ بويىنشا قازاقستاندا ءبىر عانا مەملەكەتتىك ءتىل بار. بۇل – قازاق ءتىلى. ورىس ءتىلى رەسمي ءتىل مارتەبەسىنە يە. ءبىزدىڭ زاڭناماعا سايكەس, ونىڭ قولدانىلۋىن شەكتەۋگە بولمايدى. بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋعا ءتيىس. بۇل وتانشىلدىقتىڭ باستى بەلگىسى دەۋگە بولادى», دەدى پرەزيدەنت.
تاعى ءبىر ەلەۋلى جاڭالىق, مادەنيەت قىزمەتكەرلەرى مەن مۇراعاتشىلار, كىتاپحاناشىلاردىڭ ەڭبەكاقىسىن جۇيەلى تۇردە كوبەيتۋدى تاپسىردى. بۇل باستاما وڭىرلەردەگى مادەنيەت سالاسىنىڭ ماماندارى ءۇشىن ۇلكەن جاڭالىق بولدى دەپ ويلايمىن. ءار جولداۋدىڭ وزىندىك تاقىرىبى مەن ماعىناسى بار دەسەك, كۇنى كەشە جاريالانعان جولداۋ, نەگىزىنەن حالىقتىڭ الەۋمەتتىك احۋالىن كوتەرۋگە ارنالىپ وتىر.
سونداي-اق مەملەكەت باسشىسى ۇلتتىق يدەولوگيانىڭ ىشىندە ءوزىمىزدىڭ ۇلتتىق ساياساتىمىزدى ۇستانۋ كەرەكتىگىن ايتتى. ودان بولەك مەملەكەتتىك بيۋدجەت ەسەبىنەن مادەنيەت پەن رۋحانيات سالاسىنا بولىنەتىن قارجىنىڭ بەلگىلى ءبىر مادەنيەت قايراتكەرلەرىنىڭ جوبالارىنا جۇمسالىپ وتىرعانىنا دا توقتالدى. «جاس ءارى دارىندى مۇسىنشىلەر, سۋرەتشىلەر, تەاتر قىزمەتكەرلەرى, مۋزىكانتتار, قالامگەرلەر جاڭا جانر تۇرلەرىن يگەرىپ, ۇدايى ىزدەنىس ۇستىندە جۇرەدى. سويتە تۇرا, ولار ەلەۋسىز قالىپ, مەتسەناتتاردىڭ كومەگىمەن عانا كۇن كورەدى. شىن مانىندە, قازاقستان مادەنيەتى سول جاس دارىنداردىڭ ارقاسىندا جاھاندىق دەڭگەيدە تانىلىپ جۇرگەن جوق پا؟!» دەپ, جىل سوڭىنا دەيىن جاڭا مادەنيەتتى جانە ونىڭ دارىندى وكىلدەرىن دارىپتەۋگە باعىتتالعان ناقتى جوبالار جوسپارىن ۇسىنۋدى تاپسىردى.
جاڭا جولداۋ – كەشەگى جامبىل وڭىرىندەگى جارىلىستان سوڭ ءارى جاز بويى اۋىل-ايماقتاعى قۋاڭشىلىقتان كەيىنگى ەلگە ۇلكەن مورالدىق كومەك دەپ بىلەمىن. قوعامعا دا تىڭ سەرپىن الىپ كەلدى. مەملەكەتتىڭ ءار سالاسىنا وزگەرىس ەنگىزگەن بۇل جولداۋ قاسىم-جومارت كەمەل ۇلىنىڭ ەل تىزگىنىن ۇستاۋعا لايىق تۇلعا ەكەنىن كورسەتتى.
تالعات تەمەنوۆ,
رەجيسسەر, قازاقستاننىڭ حالىق ءارتىسى
