بيىل اراعا ءبىر جارىم جىلداي ۋاقىت سالىپ, وقۋشىلار وففلاين وقۋعا ورالماق. الداعى 2021-2022 وقۋ جىلىنا وقۋشىلاردىڭ قاۋىپسىزدىگىن بارىنشا ساقتاي وتىرىپ, مەكتەپ پارتاسىندا وتىرىپ ءبىلىم الۋىنا رۇقسات بەرىلدى. وسى ورايدا اتا-انالارعا ءبىر جىلدان استام ۋاقىت بويى ءبىلىم وشاعىنىڭ بەتىن كورمەگەن بالالارىن جاڭا وقۋ جىلىنا دايىنداۋ دا وڭاي تيمەي وتىر. اسىرەسە بالالى-شاعالى ۇيەلمەندەرگە اجەپتاۋىر سالماق تۇسەدى.
ءبىر جىل بۇرىن مەملەكەت باسشىسى قاسىم-جومارت توقاەۆ حالىققا ارناعان جولداۋىندا: «كۇندەلىكتى ماسەلەلەردى شەشۋمەن قاتار, بالالاردىڭ بارىنە بىردەي مۇمكىندىك تۋعىزۋ ءۇشىن جۇيەلى شارالار قابىلداۋ قاجەت. بالالارىمىز قاي جەردە تۇرسا دا, قانداي تىلدە وقىسا دا ساپالى ءبىلىم الۋى كەرەك», دەگەن-ءدى. پرەزيدەنتتىڭ بالالاردى قابىلەتىنە قاراي بولمەۋ, الەۋمەتتىك جىكتەلۋگە جول بەرمەۋ جونىندەگى تاپسىرمالارىن ورىنداۋ اياسىندا بيىل وقۋشىلاردىڭ مەكتەپ فورماسىنا قاتىستى قويىلاتىن تالاپتار جەڭىلدەتىلدى. ەندىگارى وقۋشىلار ءبىلىم ۇياسىنا كلاسسيكالىق ۇلگىدەگى كيىممەن بارا بەرمەك. ەشكىم بۇرىنعىداي بىرىڭعاي مەكتەپ فورماسىن ىزدەپ, ارنايى تاپسىرىس بەرىپ, قاراجات جيناپ اۋرە بولمايدى. بۇل دا بولسا, الەۋمەتكە اجەپتاۋىر كومەك بولعالى تۇر.
البەتتە, «بەسىكتەگى بالا بەس تۇلەيدى» دەگەندەي, بالعىنداردىڭ تابيعاتى ءوسىمتال بولعاندىقتان, كۇندە كورىپ جۇرەتىن كىشكەنتايلاردىڭ كونە ەرتەگىدەگى كەندەبايداي كۇن ساناپ وسەتىنىن باقۋاتتى اتا-انا بايقاي بەرمەسە دە, تاپقان-تايانعانىن ءۇپىر-ءشۇپىر بالا-شاعاسىنىڭ اۋزىنا توساتىن ۇيەلمەندەرگە ۇلكەن سالماق تۇسەتىنى انىق. ءبىر بالانىڭ ءوزىن كيىندىرۋ, كەرەك-جاراعىن الىپ بەرۋگە قينالىپ قالاتىن وتباسىلار بار. ال كوپبالالى ءارى مەكتەپ جاسىنداعى ۇل-قىزدارى كوپ اتا-انالاردىڭ قالتاسىن قاعاتىن بۇل كەزەڭدە كوپتىڭ كومەگى – ايتارلىقتاي دەمەۋ.
سوندىقتان جىل سايىن ەلىمىزدە تامىز ايىندا «مەكتەپكە جول» رەسپۋبليكالىق قايىرىمدىلىق اكتسياسىن وتكىزۋ جولعا قويىلعان. «قۋانتساڭ, بالانى قۋانت» دەيتىن قازاقستاندىقتار بۇل ءىس-شاراعا بەلسەندى قاتىسادى. ءار ءوڭىردى قامتيتىن اتالعان اكتسياعا جەرگىلىكتى مەملەكەتتىك ورگاندار, قوعامدىق ۇيىمدار, بيزنەس وكىلدەرى, دەمەۋشىلەر قاتىسىپ, بالالارعا اياق كيىمنەن باستاپ, جاڭا كيىمدەر, مەكتەپ كەرەك-جاراقتارىن ساتىپ الىپ بەرەدى. وسىلايشا, ءار سىنىپتاعى بالالار تۇگەلدەي دەرلىك مەكتەپكە بارۋعا دايىن بولادى.
– ءبارىمىز دە بالا بولدىق. بالالىق شاق – ادام ءومىرىنىڭ ۋايىم-قايعىسىز ەڭ ءبىر باقىتتى كەزەڭى بولۋعا ءتيىس. كەڭەستىك ۋاقىتتا تۇرمىستىق تۇرعىدان بارشا حالىق بىردەي قوڭىرقاي ءومىر سۇرگەندىكتەن, بالالاردىڭ اراسىندا الەۋمەتتىك قايشىلىقتار بولا قويمايتىن. ال قازىرگى ۋاقىتتا ءار وتباسىنىڭ الەۋمەتتىك جاعدايى دا, ادەبى مەن تاربيەسى دە ءارتۇرلى بولعاندىقتان, بالالاردىڭ ءبارى بىردەي دەي المايمىز. سوندىقتان اسىرەسە كوپبالالى اتا-انالاردىڭ بالالارىن مەكتەپكە ەشكىمنەن كەم بولماي بارۋىنا قوعام وكىلدەرى بولىپ قولۇشىن سوزۋعا ءتيىسپىز. بۇل – ساۋاپتى ءىس, – دەيدى الماتىلىق مەتسەنات قۇسمان شالاباەۆ.
قازىر وقۋشىلاردى مەكتەپكە دايىنداۋعا بايلانىستى اتا-انالاردان دا وتىنىشتەر ءجيى تۇسەدى. ماسەلەن, اتىراۋ وبلىستىق ءبىلىم باسقارماسى باسشىسىنىڭ ورىنباسارى ايناگۇل دۇيسەكەنوۆانىڭ مالىمەتىنشە, وقۋشىلاردى مەكتەپكە دايىنداۋ ءۇشىن 10 مىڭ ءوتىنىش تۇسكەن.
«وبلىستا جاڭا وقۋ جىلى قارساڭىندا «مەكتەپكە جول» قايىرىمدىلىق اكتسياسى وتەدى. قازىر وڭىردە الەۋمەتتىك تۇرمىسى تومەن وتباسىلاردان 13 مىڭنان استام وقۋشى بار. مەكتەپ فورماسى مەن وقۋ قۇرالدارىن ساتىپ الۋعا وبلىستىق بيۋدجەتتەن 248 ملن 400 مىڭ تەڭگە ءبولىندى. قايىرىمدىلىق ءىس-شاراسى كوپبالالى جانە از قامتىلعان, سونداي-اق اتاۋلى الەۋمەتتىك كومەك الاتىن وتباسىلاردىڭ بالالارى الادى. ءبىر بالاعا 25-35 مىڭ تەڭگەنىڭ كومەگى كورسەتىلەدى», دەيدى ا.دۇيسەكەنوۆا.
ال اقمولا وبلىسىندا جاڭا وقۋ جىلى قارساڭىندا «مەكتەپكە جول» رەسپۋبليكالىق قايىرىمدىلىق اكتسياسى اياسىندا اتا-انالار «مەنىڭ اتامەكەنىم» پورتالىندا كومەك الۋعا ءوتىنىم قالدىرا الادى. بۇل پلاتفورما كومەككە مۇقتاج ادامدار مەن قايىرىمدىلىق جاساۋشىلار اراسىندا تىكەلەي بايلانىس ورناتادى. وبلىستىق ءبىلىم باسقارماسى اتاپ وتكەندەي, بۇگىندە وڭىردە كوپبالالى جانە از قامتىلعان وتباسىلاردان شىققان 16 مىڭنان استام وقۋشى بار, ولاردىڭ 1 123-ءى مەكتەپ تابالدىرىعىن العاش رەت اتتايدى.
«20 تامىزداعى جاعداي بويىنشا «مەكتەپكە جول» اكتسياسى اياسىندا الەۋمەتتىك جاعىنان تۇرمىسى تومەن 12 951 وقۋشىعا مەكتەپ فورماسى مەن كەڭسە جابدىقتارىن ساتىپ الۋعا كومەك كورسەتىلدى, سونداي-اق ءبىرىنشى سىنىپقا 1 046 ءبىرىنشى سىنىپ وقۋشىلارىن جينادى», دەيدى وبلىستىق ءبىلىم باسقارماسى.
سونداي-اق ءبىلىم جانە عىلىم مينيسترلىگىنىڭ ءباسپاسوز قىزمەتىنىڭ مالىمەتىنشە, جالپى ءبىلىم بەرۋ قورىنان از قامتىلعان وتباسىلاردان شىققان 400 مىڭنان استام ءبىلىم الۋشىلار مەن تاربيەلەنۋشىلەرگە ماتەريالدىق كومەك كورسەتۋ جوسپارلانعان. بۇل كومەك كەلەسى ساناتتاعى بالالارعا –مەملەكەتتىك اتاۋلى الەۋمەتتىك كومەك الۋعا قۇقىعى بار وتباسىلاردان شىققان بالالارعا; مەملەكەتتىك اتاۋلى الەۋمەتتىك كومەك المايتىن, جان باسىنا شاققانداعى تابىسى ەڭ تومەنگى كۇنكورىس دەڭگەيىنىڭ شاماسىنان تومەن وتباسىلاردان شىققان بالالارعا; جەتىم بالالارعا, اتا-اناسىنىڭ قامقورلىعىنسىز قالىپ, وتباسىلاردا تۇراتىن بالالارعا; توتەنشە جاعدايلاردىڭ سالدارىنان شۇعىل جاردەمدى تالاپ ەتەتىن وتباسىلاردان شىققان بالالارعا; ءبىلىم بەرۋ ۇيىمىنىڭ
القالى باسقارۋ ورگانى ايقىندايتىن ءبىلىم الۋشىلار مەن تاربيەلەنۋشىلەردىڭ وزگە دە ساناتتارىنا كورسەتىلەدى. بۇل رەتتە كيىم, اياقكيىم, مەكتەپ-جازۋ قۇرالدارىن ساتىپ الۋ جەرگىلىكتى بيۋدجەتتەن 1 ء(بىر) ءبىلىم الۋشىعا ەسەپتەلىپ بولىنگەن قاراجات شەگىندە جۇزەگە اسىرىلادى. كومەك جەرگىلىكتى اتقارۋشى ورگانداردىڭ شەشىمى بويىنشا بولىنگەن قاراجاتتىڭ مۇمكىندىگىنە قاراي بەرىلەدى. مىسالى, ءبىر بالاعا نۇر-سۇلتان قالاسى – 40 مىڭ تەڭگە, الماتى قالاسى – 35 مىڭ تەڭگە, شىمكەنت قالاسىندا 30 مىڭ تەڭگەنى قۇرايدى. ورتا ەسەپپەن وڭىرلەر بويىنشا ءبىر بالاعا 27 مىڭ تەڭگە كولەمىندە بولىنەدى.
ءتۇيىن: «بالا ءوستى دەگەنشە, باتىر ءوستى دەسەيشى, باتىر ونەر بىلمەسە, قاپىل ءوستى دەسەيشى», دەگەندەي بالالاردىڭ قاپىل بولماي, باتىر بولىپ ءوسۋى ءۇشىن دە بارشا قوعامنىڭ بالالارعا قول ۇشىن سوزۋى – ەڭ يگى ىستەردىڭ بىرەگەيى, ءبىرتۇتاس ەلدىگىمىزدىڭ بەينەسى بولماق. قىركۇيەككە دەيىن جالعاساتىن قايىرىمدىلىققا ۇلەس قوسۋ – قازىرگىدەي قىم-قۋىت پاندەميا جاعدايىندا ەڭ ىزگى امال ەكەنى ءشۇباسىز.
