بۇل تۋرالى قالالىق پوليتسيا دەپارتامەنتىنىڭ ءباسپاسوز وكىلدەرى مالىمدەدى.
ساعات 22:30-دا 102 نومىرىنە قاراقشىلىق شابۋىل جونىندە حابارلاما كەلىپ تۇسكەن. تەلەفون شالعان ايەل ب.مومىش ۇلى داڭعىلىنداعى ءدارىحانادا بەلگىسىز بىرەۋدىڭ پىشاقپەن قورقىتىپ, كاسسادان 30 مىڭ تەڭگەنى تارتىپ العانىن ايتتى. كۇدىكتىنى ۇستاۋعا پوليتسيانىڭ جەكە قۇرامى جۇمىلدىرىلدى.
«تەرگەۋ بارىسىندا كەشكى ساعات وننىڭ شاماسىندا دارىحاناعا ماسكا تاعىپ العان بەلگىسىز ەر ادامنىڭ كىرىپ, ءدارى سۇراعانى انىقتالدى. 23 جاستاعى فارماتسەۆت سورەدەن ءدارى الۋعا بارا جاتقانىندا, ەر ادام ارتىنان جۇگىرىپ كەلىپ, تاماعىنا پىشاق تاقاپ, كاسساداعى اقشانى بەرۋىن تالاپ ەتكەن. اقشانى قولعا العان سوڭ, قاشىپ كەتكەن», دەلىنگەن حابارلامادا.
جەدەل قىزمەتكەرلەر ءدارىحانا جاقتان جۇگىرىپ وتكەن جىگىت كوزىنە ىلىككەن كۋاگەرلەردى تاپتى. بەينەباقىلاۋ كامەرالارىنىڭ كومەگىمەن كۇدىكتىنىڭ جاسىرىنعان تۇسى انىقتالدى. پوليتسەيلەر بارلىق جاتاقحانا, حوستەل, اۆتوسەرۆيس جانە وزگە ورىنداردى تەكسەردى. كومپيۋتەر كلۋبىنىڭ ءبىرىن تەكسەرۋ كەزىندە كۇدىكتىگە ۇقساس 26 جاستاعى جىگىت ۇستالدى. ودان پىشاق پەن اقشا تابىلعان. ەر ادام كىناسىن مويىندادى.
اتالعان فاكتى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ وقشاۋلاعىشىنا قامالدى. 23-29 تامىز كۇندەرى ارالىعىندا ەلوردا اۋماعىندا «قۇقىق ءتارتىبى» جەدەل-الدىن الۋ شاراسى ءوتىپ جاتىر. شارانىڭ ءبىر كۇنىندە ەلوردا اۋماعىندا 25 قىلمىس اشىلدى, سونىڭ ىشىندە 18-ءى سول كۇنى اشىلعان.
سونداي-اق بۇرىن جاسالعان 12 قىلمىس اشىلدى, ىزدەۋدە بولعان 4 قىلمىسكەر ۇستالدى. ىشكى ىستەر ورگاندارىنىڭ پروفيلاكتيكالىق ەسەبىندە تۇرعان 480 تۇلعا تەكسەرىلگەن.
