وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, جول-كولىك وقيعاسى 22 تامىزدا ساعات 18:50-دە «اتىراۋ-ورال» تاس جولىندا بولعان.
«ەكى وبلىستىڭ ارالىعىنداعى جولدىڭ 93-شاقىرىمدا, كوكتوعاي اۋىلىنان 25 شاقىرىمدا ۆاز-2105 جەڭىل كولىگى جانە كاماز-53215 ماركالى جۇك كولىگى سوقتىعىستى. يندەر اۋدانىنان كەلە جاتقان جەڭىل كولىكتىڭ 31 جاستاعى جۇرگىزۋشىسى جولدا ءجۇرۋ ەرەجەسىن ساقتاماعان. سونىڭ سالدارىنان 1958 جىلعى جۇرگىزۋشى باسقارعان قارسى باعىتتا – اتىراۋ قالاسىنا قاراي ءجۇرىپ بارا جاتقان اۋىر جۇك كولىگىمەن سوقتىعىسقان.
جول اپاتىنان «ۆاز-2105» كولىگىنىڭ جۇرگىزۋشىسى مەن 1954, 1978 جىلعى ەكى جولاۋشىسى وقيعا ورنىندا كوز جۇمدى», دەپ حابارلادى دەپارتامەنتتىڭ ءباسپاسوز قىزمەتى.
قازىر اتالعان جول-كولىك وقيعاسىنا بايلانىستى قر قىلمىستىق كودەكسىنىڭ 345-بابى 4-بولىگىمەن سوتقا دەيىنگى تەرگەۋ ءجۇرىپ جاتىر.
