شىركىن, بار ادامزات بىرەر ساعاتقا بولسىن قارۋ اسىنباي, قان جالداماي, قايعىسىز قارا سۋدى قالجىڭداسىپ وتىرىپ ىشەر مە ەدى؟ شىركىن, شىركىن... بىراق سوعىستى دوعارماق تۇرماق, وسىناۋ قيال قۇسىمىزدىڭ ءوزىنىڭ قاناتىن كوزدى الا بەرە قيا قويماقشى قارا نيەت جۇرەكتەر ىزگىلىكتىڭ تۋ سىرتىنان كىرپىك قاقپاي وشپەندىلىكپەن باعىپ تۇرعان جوق پا؟
جالپى, كەز كەلگەن زۇلماتقا ءار ادام ءارتۇرلى قارسىلىق بىلدىرەدى. نەگىزى سول سوعىس تاقىرىبىن قانشا قوزعاعىڭ كەلمەگەنىمەن, ىرگەڭدەگى مايدان ءورتىنىڭ قىزىل جالىنى جانىڭدى قايتسە قاقتايدى. ونىڭ ار جاعىندا سوعىس دەگەنىڭىز جالپى جالعىزدىڭ مۇددەسى ءۇشىن بەيكۇنا ميلليونداعان جاننىڭ مەرت بولۋى عوي.
ءبىز وسى رەتتە وتىزدان ەندى اسقان تۇرىك ازاماتى, اۋەسقوي فوتوگراف ۋگۋر گاللەننىڭ ەڭبەكتەرى تۋرالى جازۋدى ءجون كوردىك. جالپى, ۋگۋردىڭ ۇستانعان نەگىزگى باعىتى ەكەۋىن ەشقاشان قيۋلاستىرۋىڭ مۇمكىن ەمەس قۇبىلىستاردى, تاعدىرلاردى, وقيعالاردى شەندەستىرۋىندە جاتىر.
گاللەن گالەرەياسىنا ۇڭىلگەن ادام ءبىر ساتكە بولسىن تاۋبەگە كەلەدى. سەبەبى جاي كۇندە سەنىڭ ەلەۋگە دە تۇرمايتىن باقىتىڭ بىرەۋدىڭ ءومىر بويى قولى جەتپەگەن باعا جەتپەس بايلىعى ەكەنىن ۇعاسىڭ. جاي كۇندە ادام ءوزىن ءومىر بويى ارقالاپ جۇرگەن ەكى اياعىنىڭ قادىرىن بىلە بەرمەيدى. ال ۋگۋردىڭ جۇمىسى اللانىڭ سول بەرگەن ءار حيكمەتىنە شۇكىرشىلىكتى ۇعىندىرۋ.
قيالى جۇيرىك قىراعى كوز ۋگۋر جالپى, ءبىز ايتىپ وتىرعانداي قايناعان وت پەن قاڭعىعان وقتىڭ ورتاسىندا جۇرگەن فوتوگراف ەمەس. ول نەگىزىنەن ورتالىق ازيادا, ونىڭ ىشىندە اۋعانستاندا ەش باسىلماي كەلە جاتقان سوعىس ورتىندەگى جانتۇرشىگەرلىك سۋرەتتەردى بەيبىتشىلىك بەسىگىندە تەربەلگەن ەۋروپانىڭ جىپ-جىلى فوتولارىمەن شەندەستىرەدى. بىلايشا ايتقاندا, ءبىر عانا سۋرەتتەن ءسىز ادامزات باسىنداعى ەڭ جيىركەنىشتى ز ۇلىمدىق پەن رياسىز تاپ-تازا كوڭىلدەردى قاتار اڭعاراسىز. اڭعاراسىز دا اڭىرىپ تۇرىپ قالاسىز. بايلىق پەن جوقشىلىق, سوعىس پەن بەيبىتشىلىك, اڭعالدىق پەن ارامزالىق جالپى, قاتار جۇرەتىنى بەلگىلى. الايدا ولاردىڭ بارلىعى ءوزىڭ سياقتى ادامداردىڭ باسىنان ءوتىپ جاتقانىن شىن تۇيسىنگەندە جانىڭدى قويارعا جەر تاپپاي كەتەسىڭ...
الەم جۋرناليستەرىنە بەرگەن سۇحباتتارىندا گاللەن ءوزىن فوتوگراف ەمەس, «تسيفرلى قىلقالام شەبەرىمىن» دەپ تانىستىرادى. ونىسى دۇرىس. سەبەبى ءبىز جوعارىدا ايتقان قاراما-قايشى فوتولاردى بۇگىنگى تىلمەن بەينەلەگەندە, كوللاج ارقىلى قيۋلاستىرادى. بۇل ىسپەن ۋگۋر 2014 جىلدان بەرى شۇعىلدانىپ كەلەدى ەكەن. بۇگىندە ونىڭ جۇمىستارىن الەم قالت جىبەرمەي قاداعالاپ وتىر. اۋعان جەرىندەگى قازىرگى ساياسي احۋال ۋگۋردىڭ وقىرماندارىنىڭ سانىن ءتىپتى ارتتىرىپ جىبەرگەن. ءدال قازىرگى ۋاقىتتا گاللەننىڭ ينستاگرامداعى وقىرماندارىنىڭ سانى 1 ملن-نان اسىپ ءتۇستى.
جالپى, گاللەن بۇل جۇمىستارى ارقىلى دامىعان مەملەكەتتەر مەن ارتتا قالعان بەيشارا ەلدەردىڭ اراسىنداعى الشاقتىقتى اشىق كورسەتكىسى كەلەتىندەي. دۇنيەنىڭ ءبىر بۇرىشىندا ءبىر جۇتىم سۋعا زار بولىپ, شولدەن ءولىپ جاتقان حالىقتاردىڭ بار ەكەنىن, سونداي-اق دۇنيەنىڭ كەلەسى ءبىر بۇرىشىندا بالاسىنىڭ تويىنا تىكۇشاقپەن اقشا شاشىپ جاتقان اشكوز بايلاردىڭ دا ءومىر ءسۇرىپ جاتقانىن ءبىر وبەكتيۆكە سىيعىزعان ونىڭ كارتينالارى جۇرەگىڭدى شىنىمەن سولق ەتكىزەدى.
ونەر الدەقاشان ويانباستاي قالىڭ ۇيقىعا قۇلاعان ۇياتتى وياتا الۋىمەن دە ونەر-اۋ... ەڭ عاجابى, ۋگۋردىڭ وزدەرىڭىز كورىپ وتىرعان كارتينالارىن تۇسىنۋگە يا تۇسىندىرۋگە ەشقانداي ورتاق ءتىلدىڭ قاجەت ەمەستىگى. جۇرەگى بار جان ءوزى-اق سويلەتەدى. جۇرەكتىڭ ءتىلى – جالپى ادامزاتتىڭ ءتىلى. ۋگۋردىڭ ءار سۋرەتى ءبىزدى وسى تىلدە سويلەستىرەدى. تىلدەن بولەك گاللەن گالەرەياسى الەم دىندەرىن دە بىرىكتىرىپ جىبەرگەندەي. مۇسىلمان بالاسى مەن حريستيان بالاسى ار الدىندا بىردەي جاۋاپتى. ونىڭ كارتينالارىنداعى وقيعالارعا ءبارىمىز دە جاۋاپتىمىز.
ۋگۋردىڭ دا ايتپاعى, ءبىزدىڭ دە كوكەيىمىزدەگى اسىل ارمان – الەمدە تىنىش, بەيبىت زاماننىڭ ءبىر ساتكە دە بولسا ورناۋى. مەيىرىمنىڭ ۇستەمدىك قۇرىپ, قايىرىمدى قولدار جەر بەسىكتى الديلەي تەربەتىپ تۇرسا!
