بۇگىندە قارىمدى قالامگەر قوستاناي قالاسىندا تۇرادى. سونداعى ا.بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنىڭ پروفەسسورى. كەشتى دە وسى جوعارى وقۋ ورنىندا عالىمنىڭ الدىنان ءتالىم العان شاكىرتتەرى ۇيىمداستىردى.
شىنىندا, جۇرتشىلىق سەرىكباي اعانى الدىمەن اقىن دەپ بىلەدى. بۇگىنگە دەيىن شايىردىڭ وتىزعا جۋىق جىر جيناعى جارىق كورگەن. سونىمەن قاتار اقىننىڭ 200-دەن اسا ولەڭىنە ءان جازىلعان. سونىڭ ىشىندە التىنبەك قورازباەۆ ءانىن شىعارعان «ساعىندىم الماتىمدى» بۇكىل ەل ءسۇيىپ ايتادى.
كەش بارىسىندا قالامگەردىڭ اقىندىعى مەن عالىمدىعى تۋرالى كوبىرەك ءسوز بولدى. ماسەلەن, بەلگىلى اقىن سەرىك تۇرعىنبەك ۇلى ءبىر توپىراقتا تۋىپ, جاس كۇنىنەن بىرگە وسكەن دوسىنىڭ سان قىرلى تالانتى جايىندا اڭگىمەلەدى.
«مەن سەرىكباي تۋرالى كوپ جازدىم. ولەڭ دە ارنادىم. سەرىكباي – سەگىز قىرلى, ءبىر سىرلى ازامات. ەگەر شۇقىلاي بەرسەڭىز, ونىڭ بويىنان سەكسەن قىرىن تاۋىپ الاسىز. بالا كۇنىمىزدەن ءازىلىمىز دە, مىنەزىمىز دە جاراسىپ وستىك. ونىڭ عالىمدىعى دا ءبىر توبە. ىبىراي اتامىزدى زەرتتەپ, ءبىراز جۇمىس تىندىردى», دەدى ول. ال «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى اقىننىڭ ءاربىر جانردا جازعان ەڭبەگى ماقتاۋعا دا, ۇلگى الۋعا دا تۇرارلىق ەكەنىن جەتكىزدى.
– سەرىكباي وسپان ۇلى – سان-سالالى شىعارماشىلىق يەسى. مەن سەرىكباي اعانى ەگدە تارتقاندا كوردىم. بۇل كىسى جاس كەزىندە قانداي بولدى دەپ ويلاۋشى ەدىم. بۇگىنگى كەشتە جاس كەزىندەگى سۋرەتتەرىن كورىپ, تاماشا كوركەم جىگىت بولعانىن بايقادىم. ەگەر وسى كىسىمەن قاتار بولسام, دوس بولار ەدىم دەپ ويلادىم. ەگەر زامانداسى بولسام, پىكىر الىساتىن جاقىن ارىپتەسى بولار ەدىم دەپ ويلادىم. سوندىقتان سەرىكباي اعا – ءار كەزەڭدە دە ورتاعا ۇنايتىن تۇلعا. جازعان ەڭبەكتەرى دە سونداي. سەكەڭ ىبىراي التىنسارين تۋرالى كولەمدى زەرتتەۋ جازدى. ءبىر قاراعاندا, كورنەكتى اعارتۋشى تۋرالى ءبارىمىز بىلەتىن سەكىلدىمىز. شىن مانىندە, ءبىرتۋار تۇلعانىڭ كوپ دۇنيەسىن بىلمەيمىز. تۇركسوي ۇيىمىنىڭ اياسىندا جارىق كورگەن احمەت بايتۇرسىن ۇلى تۋرالى ەڭبەگىن دە ەرەكشە ايتۋعا بولادى, – دەدى اكادەميك.
سونداي-اق فيلولوگيا عىلىمدارىنىڭ دوكتورى, پروفەسسور سەرىك نەگيموۆ, قازاقستاننىڭ ەڭبەك سىڭىرگەن قايراتكەرى, قالامگەر قايسار ءالىم كوركەمسوز زەرگەرىنىڭ جان-جاقتى شىعارماشىلىعى جايىندا پاراساتتى وي ءوربىتتى. جيىندا قالامگەردىڭ كەيىنگى شىققان «مەيىرىم باستاۋى – بەسىك جىرى», «اقىننىڭ جانى», «سەرىكباي: لەبىز, ءىلتيپات» اتتى كىتاپتارى تانىستىرىلدى. اقىن سوزىنە جازىلعان اندەر ورىندالدى. كەش يەسى وقىرمان سۇراقتارىنا جاۋاپ بەرىپ, شىعارماشىلىعىنداعى جاڭالىقتار تۋرالى باياندادى. ءىس-شارا سوڭىندا سەرىكباي وسپان ۇلى جينالعان قاۋىمعا ريزاشىلىعىن ءبىلدىردى.
