پىكىرتالاستىڭ باستاماشىسى ءارى مودەراتورى پارلامەنت سەناتىنىڭ توراعاسى ماۋلەن اشىمباەۆ بولدى. وعان قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا, Halyk Bank باسقارما توراعاسى ءۇمىت شاياحمەتوۆا جانە قارجى-ەكونوميكا سالاسىنداعى تاۋەلسىز ساراپشى عالىم حۇسايىنوۆ قاتىستى.
سەنات توراعاسى بانك جۇيەسىنىڭ قازىرگى تۇراقتىلىعى جاعدايىندا سالانىڭ نەگىزگى مىندەتتەرى جاڭا بەيىندى زاڭدى ءتيىمدى ىسكە اسىرۋ, باسەكەلەستىكتى ىنتالاندىرۋ, نەسيەلەۋدىڭ قولجەتىمدىلىگىن ارتتىرۋ جانە بيزنەس پەن ازاماتتارعا ساپالى قىزمەت كورسەتۋ ەكەنىن اتاپ ءوتتى.
«پرەزيدەنت قاسىم-جومارت توقاەۆ بيزنەسكە بانكتىك كرەديت بەرۋدى جانداندىرۋ قاجەت ەكەنىن بىرنەشە رەت اتاپ ءوتىپ, وسى سەكتورداعى وزگە دە وزەكتى ماسەلەلەرگە نازار اۋدارعان بولاتىن. سالانى رەتتەۋدىڭ زاماناۋي قۇقىقتىق نەگىزىن قالىپتاستىرۋ ماقساتىمەن جاڭا بانكتەر تۋرالى زاڭ قابىلدانىپ, كۇشىنە ەندى. سوندىقتان بۇگىن ءبىز جاڭا ەرەجەلەردىڭ ءىس جۇزىندە قالاي جۇمىس ىستەپ جاتقانىن جانە ولاردىڭ باسەكەلەستىككە, نەسيەنىڭ قولجەتىمدىلىگىنە ءارى جالپى ەكونوميكانىڭ دامۋىنا قالاي اسەر ەتەتىنىن تالقىلاپ وتىرمىز. حالىقارالىق رەيتينگتىك اگەنتتىكتەر راستاعان جالپى كورسەتكىشتەر ەلدىڭ قارجى جۇيەسىنە دەگەن سەنىمنىڭ ساقتالعانىن كورسەتەدى. الداعى جىلدارداعى بانك جۇيەسىنىڭ مىندەتى – وسى وڭ ءۇردىستى ساقتاپ, ىلگەرى دامۋدى قامتاماسىز ەتۋ جانە حالىق پەن بيزنەسكە ساپالى قىزمەت ۇسىنۋ», دەدى ماۋلەن اشىمباەۆ.
ساراپشىلار جوعارى بازالىق مولشەرلەمەنىڭ بانك سەكتورىنا اسەرىن دە تالقىلادى. سونىمەن قاتار سەنات توراعاسى بورىش جۇكتەمەسىنىڭ تابىسقا قاتىناسى كوەففيتسيەنتىن ەنگىزۋ بانكتەرگە قارىز الۋشىنىڭ تەك اعىمداعى تولەمدەرىن عانا ەمەس, بارلىق مىندەتتەمەلەر كولەمىن باعالاۋعا مۇمكىندىك بەرەتىنىن تىلگە تيەك ەتتى. الايدا بۇل كورسەتكىشتى شامادان تىس قاتاڭ قولدانۋ, اسىرەسە, ءبولىپ تولەۋ نەمەسە ميكروقارىزدارى بار ادال ازاماتتاردىڭ نەسيە الۋ مۇمكىندىگىن شەكتەۋى ىقتيمال. سوندىقتان بۇل ماسەلەدە تەپە-تەڭدىكتى ساقتاۋ اسا ماڭىزدى.
بۇدان بولەك, قاتىسۋشىلار بىرقاتار باعىت بويىنشا پىكىر الماسىپ, بىرلەسكەن جۇمىستىڭ نەگىزگى مىندەتتەرىن بەلگىلەدى. اتاپ ايتقاندا, رەتتەۋ ساياساتىن جەتىلدىرۋ, اقشا-كرەديت جانە فيسكالدىق قۇرالداردى ۇيلەستىرۋ ارقىلى ينفلياتسيانى تەجەۋ مەن نەسيەلەۋدى قولداۋ اراسىنداعى تەڭگەرىمدى تابۋ, سونداي-اق, بانك جانە فينتەح سەكتورلارىن ترانسفورماتسيالاۋ ماسەلەلەرىنە ەرەكشە ءمان بەرىلدى.
«Taldau Talks» – ەل دامۋىنىڭ وزەكتى ماسەلەلەرى مەن مەملەكەت باسشىسى قويعان مىندەتتەردى ىسكە اسىرۋدىڭ ناقتى قادامدارى تالقىلاناتىن اشىق ديالوگ الاڭى.
