ايماقتار • 19 تامىز، 2021

الماتى وبلىسى ماڭعىستاۋعا كومەك رەتىندە 40 ۆاگون ءشوپ جونەلتتى

الماتى وبلىسىنىڭ بەلسەندىلەرى ماڭعىستاۋ وبلىسىنىڭ فەرمەرلەرىنە گۋمانيتارلىق كومەك رەتىندە 42 ۆاگون ءشوپ، 1 ۆاگون مال جەمىن جونەلتتى، دەپ حابارلايدى Egemen.kz.

گاۋھار قاپاش

سۋرەت: الماتى وبلىسى اكىمىنىڭ ءباسپاسوز قىزمەتى

وبلىستىق اۋىل شارۋاشىلىعى باسقارماسىنىڭ مالىمەتىنشە وبلىس بەلسەندىلەرىنىڭ كۇشىمەن «قازاقستان تەمىر جولى» ۇك» اق مەن «جەتىسۋ» اكك تاراپىنان 32 ۆاگون ءشوپ پەن 1 ۆاگون مال جەمى جيناقتالىپ جىبەرىلدى. سونىمەن قاتار پانفيلوۆ اۋدانىنىڭ بەلسەندىلەرى دە 10 ۆاگون ءشوپ قوسىمشا جونەلتتى.

قازىر وڭىردە مال ازىعىن دايىنداۋ ءىسى قارقىندى ءجۇرىپ جاتىر. بۇگىنگى كۇنى 2321،6 مىڭ توننا ءشوپ نەمەسە جوسپاردىڭ 82،4%-ءى جينالدى، 331 مىڭ توننا سابان، 419،6 مىڭ توننا پىشەندەمە، 212،6 مىڭ توننا مال جەمى، جالپى كولەمى 3،2 ملن توننا مال ازىعى دايىندالدى. بۇل جۇمىستارعا قۇرامىندا 1600-دەن استام ادامى بار 295 ءشوپ جينايتىن بريگادا جۇمىلدىرىلدى. سول سياقتى 1576 ءشوپ شاباتىن ماشينا، 1401 پىشەن جيناعىش تەحنيكا جۇمىس ىستەۋدە. وبلىستاعى ەرەكشە قورعالاتىن تابيعي جانە مەملەكەتتىك ورمان قورى اۋماقتارىنىڭ 15،3 مىڭ گا جەرىن ءشوپ شابۋعا، 959 مىڭ گا جەرىن جايىلىم ءۇشىن شارۋاشىلىقتار مەن تۇرعىندار پايدالانىپ وتىر.

اۋىل شارۋاشىلىعى باسقارماسىنىڭ مالىمەتىنە سۇيەنسەك، الماتى وبلىسىندا مال ازىعى جەتىسپەۋشىلىگى ورىن المايدى دەپ بولجانىپ وتىر. جەم-ءشوپ دايىنداۋ ءىسى جالعاسۋدا.

اتاپ وتسەك، بيىلعى جىلى وڭىردە اۋىل شارۋاشىلىعى داقىلدارىنىڭ القابى 3،7 مىڭ گەكتارعا ۇلعايىپ، 972 مىڭ گەكتاردى قۇراپ وتىر. قازىرگى كەزدە 216،2 مىڭ گا ماساقتى داقىلدار جينالدى، 361،5 مىڭ توننا استىق باستىرىلدى، استىقتىڭ ورتاشا شىعىمى – 16،7 تس/گا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز