الدىمەن مادەنيەت جانە سپورت ءمينيسترى اقتوتى رايىمقۇلوۆا, جازۋشىلار وداعىنىڭ توراعاسى, اقىن ۇلىقبەك ەسداۋلەت جانە «Altyn Qyran Foundation» قوعامدىق قورىنىڭ قامقورشىلىق كەڭەسىنىڭ توراعاسى يسلامبەك سالجانوۆ ارنايى لەنتانى قيىپ, جازۋشى اتىنداعى زالدى رەسمي اشقان سوڭ, كونفەرەنتسياعا قاتىسۋشىلار مەن قوناقتار زالعا ءوتىپ, ىشكى كورىنىسىن تاماشالادى. ۇلتتىق اكادەميالىق كىتاپحانانىڭ ىشىندەگى زاماناۋي تالاپتارمەن بەزەندىرىلگەن زالدىڭ قابىرعاسىنا قالامگەردىڭ ءوزى, وتباسى, ورتاسى, دوس-جاراندارى بەينەلەنگەن سۋرەتتەر, پورترەتتەر ءىلىنىپتى. جازۋشىنىڭ ايگىلى «قان مەن تەر» رومانىنا جاسالعان كوركەم ستەند تە قابىرعادان ورىن العان. شىنىدان جاسالعان ىشكى بولمەنىڭ كىتاپ سورەلەرىندە جازۋشىنىڭ ءار جىلدارى باسپا بەتىن كورگەن كىتاپتارى تۇر.
ء«ا.نۇرپەيىسوۆ شىعارماشىلىعى جانە الەمدىك ادەبي ۇدەرىس» تاقىرىبىنداعى حالىقارالىق ونلاين كونفەرەنتسيا جازۋشى اتىنداعى زالدا ءوتتى. اتاپ وتەرلىك جايت – جۇزگە جاقىنداعان كورنەكتى جازۋشى ءابدىجامىل نۇرپەيىسوۆ نۇر-سۇلتاندا وتكەن ايتۋلى ءىس-شاراعا ونلاين قاتىستى. سونداي-اق مىرزاتاي جولداسبەكوۆ, دۋلات يسابەكوۆ, سماعۇل ەلۋباي, اكبار ءماجيت ۇلى قاتارلى وتاندىق جانە شەتەلدىك قالامگەرلەر دە كونفەرەنتسياعا ونلاين قاتىسىپ, پىكىرلەرىن ءبىلدىردى.
كونفەرەنتسيادا مادەنيەت جانە سپورت ءمينيسترى اقتوتى رايىمقۇلوۆا ءىرى سۋرەتكەردىڭ شىعارماشىلىعى, اتاپ ايتقاندا, «قان مەن تەر», «سوڭعى پارىز» روماندارى قازاق ادەبيەتىنىڭ تابىسى ەكەنىن بايانداپ, كەزىندە وسى شىعارمالارى ءۇشىن العان ماراپاتتارىن دا كوپشىلىكتىڭ ەسىنە سالدى. «قان مەن تەر» رومانىنىڭ نەگىزىندە كينو تۇسىرىلگەنىن, ءدال سول شىعارمانىڭ ارال وڭىرىنە الەمنىڭ نازارىن اۋدارتقان ەرەكشە تۋىندى بولعانىن ايتتى. ول سونداي-اق قالامگەر اتىنداعى وقۋ زالىن اشۋ بارىسىندا جەتەكشىلىك جاساعان عالىم مىرزاتاي جولداسبەكوۆكە, قارجىلاي قولداۋ كورسەتكەن يسلامبەك سالجانوۆقا جانە ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆاعا العىسىن جەتكىزدى.
جازۋشىلار وداعىنىڭ توراعاسى ۇلىقبەك ەسداۋلەت قالامگەردىڭ ءار ءسوزىنىڭ سالماعى قورعاسىنداي اۋىر ەكەنىن, سەكسەۋىلدىڭ تامىرىنداي تەرەڭنەن تامىر تارتىپ, وقيعالارى يىرىمىنە تارتىپ اكەتەتىنىن, ونىڭ ءار كەيىپكەرى وقىرمانمەن ءتىرى ادامداي كەزدەسەتىنىن ايتتى. ونىڭ شىعارمالارىن تەك ءوز ەلىمىزدە ەمەس, الىس-جاقىن شەت ەلدەردە قانشاما بۋىن ۇرپاقتىڭ وقىپ ءتالىم العانىن جەتكىزگەن اقىن ءابدىجامىل نۇرپەيىسوۆ شىعارمالارىنىڭ وزەگىندە تاريح الدىنداعى جاۋاپكەرشىلىك, ۇلت مۇددەسىنە ادالدىق, ەل مەن جەر تاعدىرى ءۇشىن كۇرەس بار ەكەنىن باياندادى. ونىڭ ءوز شىعارمالارىن ءوزى جەتپىس جىلدان بەرى تۇزەپ-كۇزەپ كەلە جاتقان اسا تالعامپاز ستيليست ەكەنىن دە اتاپ ءوتىپ, بۇل تۇرعىدا ۇلكەن قالامگەردەن ۇيرەنەتىن ەرەكشە ۇلگىنىڭ ءبىرى سول ەكەنىن دە جەتكىزدى.
جيىندا باسقا دا قوناقتار ءابدىجامىل نۇرپەيىسوۆ شىعارماشىلىعىنا قاتىستى پىكىرلەرىن ءبولىسىپ, ونىڭ شىعارماشىلىعىنىڭ ەرەكشەلىگىن اڭگىمە ارقاۋىنا اينالدىردى. ولاردىڭ قاتارىندا مەملەكەتتىك سىيلىقتىڭ لاۋرەاتى, جازۋشى الىبەك اسقاروۆ, فيلولوگيا عىلىمدارىنىڭ دوكتورى, پروفەسسور سەرىك نەگيموۆ. قازاقستان رەسپۋبليكاسىنىڭ رەسەي ىنتىماقتاستىعى وكىلدىگىنىڭ باسشىسى كونستانتين ۆوروبەۆ, «ليبەرتي» باسپاسىنىڭ نەگىزىن قالاۋشى يليا لەۆكوۆ, بەلگىلى رەسەي جازۋشى, اۋدارماشى اناتولي كيم بولدى.
