ءبىر جىلدا ەلدەگى ءموبيلدى ينتەرنەت جىلدامدىعى 42% ارتقان, دەگەن اقپارات تاراتتى Finprom.kz رەسۋرسى. ءموبيلدى ينتەرنەتتىڭ جىلدامدىعى 30,18 مبيت/س-قا جەتكەن. بىلتىرعى ماۋسىم ايىندا بۇل كورسەتكىش 21,25 مبيت/س بولاتىن, ياعني جىلدامدىقتىڭ ارتۋى جىلىنا 42%-دى قۇراعان. وسىلايشا, ينتەرنەت بايلانىسىنىڭ جىلدامدىعى ءتورت اي قاتارىنان قارقىندى وسكەن.
جالپى, تمد ەلدەرىنىڭ ىشىندە قازاقستاندا ءموبيلدى ينتەرنەتتىڭ جىلدامدىعى رەسەي, قىرعىزستان, وزبەكستان, بەلارۋس, تاجىكستانعا قاراعاندا جوعارى. رەيتينگتە مالايزيا, ەگيپەت, ءۇندىستان, ۆەنەسۋەلا سياقتى ەلدەردە دە ءموبيلدى ينتەرنەتتىڭ جىلدامدىعى قازاقستاننان تومەن بولىپ شىققان.
جالپى, الەم بويىنشا ءموبيلدى ينتەرنەتتىڭ ورتاشا جىلدامدىعى ماۋسىم ايىندا 55,34 مبيت/س بولعان. ەڭ جىلدام ينتەرنەت ءباا-دا (193,51 مبيت/س), ودان كەيىن وڭتۇستىك كورەيادا (180,48 مبيت/س) جانە قاتار (171,76 مبيت/س) سياقتى ەلدەردە تىركەلگەن. ال رەيتينگتىڭ ەڭ تومەنگى ساتىسىندا اۋعانستان تۇر, وندا ءموبيلدى ينتەرنەتتىڭ قارقىنى 7,37 مبيت/س ەكەن.
بيىلعى 1 شىلدەدەگى مالىمەت بويىنشا قازاقستاندا 24,2 ملن ابونەنت بار. بۇل بىلتىرعى كورسەتكىشپەن سالىستىرعاندا 1,2%-عا ارتىق. ونىڭ ىشىندە 15,8 ملن ابونەنتتىڭ ينتەرنەتى بار. بۇل دا وتكەن جىلمەن سالىستىرعاندا بىردەن 7%-عا كوبەيگەن. ال الەمدىك جەلىلەرگە كىرەتىن مۇمكىندىگى بار ابونەنتتەردىڭ ۇلەسى بيىلعى ماۋسىمدا 65,3%-عا دەيىن ارتقان, بىلتىر وسى ۋاقىتتا بۇل كورسەتكىش 61,8% بولعان.
بۇگىندە ەلىمىزدە ءۇش ۇيالى بايلانىس وپەراتورى بار. ولاردىڭ ىشىندە ەڭ كوپ ابونەنتى بار Beeline بولىپ شىققان – 9,5 ملن. سودان كەيىنگى ورىندا Kcell/Activ (8,1 ملن ابونەنت) جانە ءۇشىنشى تەلە2/Altel (6,5 ملن ابونەنت).
2021 جىلدىڭ العاشقى 6 ايىندا Beeline 1350 بازالىق ستانسا سالىپ, وعان 120 ەلدى مەكەندى قوسقان. ءسويتىپ اۋىلدىق جەردەگى ينتەرنەت-ترافيك بىلتىرعىمەن سالىستىرعاندا بۇرىن-سوڭدى بولماعان رەكوردتىق كورسەتكىشپەن وسكەن. جالپى العاندا ەلىمىز بويىنشا ترافيكتى تۇتىنۋ كولەمى 62%-عا ارتقانى بايقالادى.
