ماسەلەن, 1-12 شىلدە ارالىعىندا 344 تەكسەرۋ جۇرگىزىلىپ, 1 190 نىسان باقىلاۋعا الىندى. ونىڭ ىشىندە 20 نىسان كارانتيندىك شەكتەۋ شارالارىن بۇزعان. ولارعا قاتىستى اكىمشىلىك حاتتامالار تولتىرىلىپ, سالىنعان ايىپپۇل كولەمى 2 ملن 500 مىڭ تەڭگەنى قۇرادى.
– اتىراۋ قالاسىندا 13 مونيتورينگتىك توپ بار. جۇمىس كۇندەرى كۇندىز تەكسەرۋ جۇرگىزۋگە ءبىر توپ شىعادى. ال دەمالىس كۇندەرى ءۇش توپ نىساندارعا تەكسەرىس جۇرگىزەدى. موبيلدىك توپتاردىڭ نىسان ىشىنە كىرۋىنە كەدەرگىلەر تۋىندايدى. ويتكەنى نىسان يەلەرى ەسىكتى ىشىنەن ق ۇلىپتاپ, جۇمىسىن جالعاستىرا بەرەدى. وسىنداي سەبەپكە بايلانىستى مونيتورينگتىك توپ نىساننىڭ ىشىنە كىرىپ, تەكسەرىس جۇرگىزە المايدى, – دەيدى اتىراۋ قالالىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى رۋسلان داۋلەتوۆ.
ونىڭ ايتۋىنشا, مەيرامحانا, ءدامحانا يەلەرىمەن, سالتاناتتى ءىس-شارا وتكىزۋشىلەرمەن تۇسىنىسپەۋشىلىك پەن كيكىلجىڭ بولىپ تۇرادى. ال كارانتيندىك شەكتەۋلەردى ءجيى بۇزاتىن نىساندار قاتارىندا «فلوريا», Vivaldi, SKY BAR, End Ne Stimz, «رىبا موەي مەچتى» جانە URBAN سەكىلدى كلۋبتار مەن بارلار بار.
وسىنداي سەبەپتەر تۇرعىندار اراسىندا قاۋىپتى ۆيرۋستى جۇقتىرۋ دەرەگىن كوبەيتەرى داۋسىز. ونىڭ ۇستىنە كەيبىر ادامدار ۆاكتسيناعا, ءتىپتى دارىگەرلەرگە قارسى تەرىس كوزقاراس قالىپتاستىرۋعا تىرىساتىندىعى بايقالىپ وتىر. ماسەلەن, شەتەلدىك ازامات «دينا» بازارىنداعى بەكەتتە ۆاكتسينا الۋ كەزىندە دارىگەرلەرگە دورەكى مىنەز كورسەتكەن. كەيىن وبلىستىق دەنساۋلىق ساقتاۋ باسقارماسى ءباسپاسوز قىزمەتى ءمالىم ەتكەندەي, وزبەكستان رەسپۋبليكاسىنىڭ 1998 جىلى تۋعان ازاماتى بيىلعى 16 ماۋسىمدا سپۋتنيك V ۆاكتسيناسىنىڭ ءبىرىنشى كومپونەنتىن ەكتىرگەن. سودان كەيىن بۇل جىگىتتە جاناما اسەرلەر مەن اسقىنۋلار تىركەلمەگەن.
بۇل ازامات 14 شىلدەدە جەرگىلىكتى ۋاقىتپەن ساعات 15.00-دە ۆاكتسينانىڭ ەكىنشى كومپونەنتىن سالدىرعان. الايدا ۆاكتسينانى العانعا دەيىن كەزەكتە تۇرعان شەتەلدىك ازامات مەديتسينا قىزمەتكەرلەرىنە دورەكىلىك تانىتقان. ۆاكتسينانىڭ جاناما اسەرى تۋرالى ارانداتۋ ماقساتىندا بەينەجازبا تۇسىرەمىن دەپ قورقىتقان. دەمالىس بولمەسىندە 30 مينۋتتاي ۋاقىت بولىپ, ۇيىنە جىبەرىلگەن. بىراق سول كۇنى ساعات 18.30-دا «دينا» بازارىنان جەدەل جاردەم قىزمەتىنە قوڭىراۋ تۇسكەن. وندا ديسپەتچەرگە ۆاكتسينالاۋدان كەيىن ءبىر ادامدا قۇرىسۋ بەلگىسى بايقالعانى حابارلانعان.
– جەدەل جاردەمدى ءۇش ساعات بۇرىن ۆاكتسينا العان جانە دارىگەرلەرگە دورەكىلىك تانىتقان وزبەكستان ازاماتى شاقىرعانى بەلگىلى بولدى. شەتەلدىك جىگىت وبلىستىق اۋرۋحانانىڭ قابىلداۋ بولىمىنە جەتكىزىلدى. ول 30 مينۋتتان كەيىن ۇيىنە جىبەرىلدى. سەبەبى دارىگەرلەر پاتسيەنتتى اۋرۋحاناعا جاتقىزۋعا ناقتى دايەك تاپپادى. وسىعان بايلانىستى تۇرعىنداردان ارانداتۋشىلىققا دەن قويماي, تەك رەسمي اقپاراتقا سەنۋدى سۇرايمىز, – دەپ ءمالىم ەتتى باسقارمانىڭ ءباسپاسوز قىزمەتى.
سونىڭ ەرتەسىنە №3 قالالىق ەمحانانىڭ اكىمشىلىگى پوليتسياعا شاعىم ءتۇسىردى. ماقسات – شەتەلدىك ازاماتتىڭ ۆاكتسينالاۋ بەكەتىندەگى مەديتسينا قىزمەتكەرلەرىن قورلاعانىن, سونداي-اق ۆاكتسينانىڭ جاعىمسىز اسەرى تۋرالى جالا جاپقانىن دالەلدەۋ.
– قۇقىق بۇزۋشىنىڭ ارەكەتىن زاڭسىز دەپ سانايمىن. قازىر تەك ءبىزدىڭ ەلىمىز عانا ەمەس, الەم جۇرتشىلىعى كوروناۆيرۋس ينفەكتسياسىنا قارسى كۇرەس جۇرگىزۋدە. ويتكەنى قاۋىپتى ينفەكتسيانى توقتاتۋدىڭ جالعىز جولى – ۆاكتسينا الۋ. سوندىقتان ءبىز, دارىگەرلەر تۇرعىندار اراسىندا ۆاكتسينانىڭ جاناما اسەرى تۋرالى جالعان اقپاراتتىڭ تارالۋىمەن كەلىسپەيمىز. مۇنداي جالعان اقپاراتتى تاراتۋشىلار جازالانۋى كەرەك. بارشا قازاقستاندىق ءوزىنىڭ دەنساۋلىعىن, اعايىن-تۋىسى مەن ارىپتەستەرىن قاۋىپتى ۆيرۋستان قورعاۋدىڭ ماڭىزىن ءتۇسىنۋى ءتيىس, – دەيدى №3 قالالىق ەمحانانىڭ ديرەكتورى ايمان وتەگەنوۆا.
اتىراۋ وبلىسى
