وقيعا • 16 شىلدە، 2021

الماتى جۇرتى ءابساتتار قاجىنى اقتىق ساپارعا شىعارىپ سالدى

848 رەت كورسەتىلدى

الماتى ورتالىق مەشىتىندە كورنەكتى عالىم، اكادەميك، قازاقستان مۇسىلماندارى ءدىني باسقارماسىنىڭ 2000-2013 جىلدار ارالىعىنداعى باس ءمۇفتيى ءابساتتار قاجى دەربىسالىنى اقتىق ساپارعا شىعارىپ سالدى، دەپ حابارلايدى Egemen.kz. قمدب-نىڭ رەسمي سايتىنا سىلتەمە جاساپ.

مارقۇمنىڭ جانازا نامازىن ءابساتتار قاجىنىڭ شاكىرتى، قمدب توراعاسى، باس ءمۇفتي ناۋرىزباي قاجى تاعان ۇلى وقىپ، قايعى جامىلعان اۋلەتكە سابىر تىلەدى.

ء«ابساتتار قاجى باعىسباي ۇلى ەلىمىزدىڭ ءدىن سالاسىنا عانا ەمەس، ۇلت رۋحانياتىنا سۇبەلى ۇلەس قوسقان بىرەگەي تۇلعا ەدى. تاريحتا اتى قالعان يگى جاقسىلاردى قايتا ءتىرىلتىپ، ەلمەن قاۋىشتىردى. قازاقستان مۇسىلماندارىنىڭ بىرلىگى مەن ءبىلىمدى بولۋىنا كوپ كۇش سالدى. قۇربان ايتتىڭ العاشقى كۇنىنىڭ مەملەكەتتىك مەرەكە رەتىندە قابىلدانۋىنا اتسالىستى.

كەشەدەن بەرى ءابساتتار قاجىنىڭ اۋلەتى مەن ءوزى ون جىلدان استام ۋاقىت باسقارعان قازاقستان مۇسىلماندارى ءدىني باسقارماسىنا جان-جاقتان كوڭىل ايتۋ جەدەلحاتتارى كەلىپ جاتىر. مەملەكەت باسشىسى قاسىم-جومارت توقاەۆ، ەلباسى نۇرسۇلتان نازارباەۆتان بولەك، الىس-جاقىن شەتەلدەردەگى ءدىني باسقارمالاردىڭ باس مۇفتيلەرى قايعىمىزعا ورتاقتاسىپ، كوڭىل ايتۋدا. ءتىپتى ءابساتتار اعامىز اۋرۋحاناعا ءتۇستى دەگەندە كۇللى قازاق ەلى الاقانىن جايىپ، اللادان شيپا تىلەدى.

مىنەكي، حاققا دا، حالىققا دا قىزمەت ەتكەن تۇلعانىڭ قانداي ابىرويلى، جاقسى ازامات بولعانى وسىدان-اق بەلگىلى. اعامىزدىڭ وتباسى مەن اعايىن-تۋىسىنا كوركەم سابىر، جەڭىلدىك تىلەيمىن. رۋحىڭىز شات، بارار مەكەنىڭىز ءجاننات بولعاي!»، دەدى باس ءمۇفتي.

سوڭعى جاڭالىقتار

ۇقساس جاڭالىقتار