اگەنتتىك توراعاسىنىڭ ايتۋىنشا, ستاتيستيكا سىبايلاس جەمقورلىق قىلمىستارىن تىركەۋدىڭ 35%-عا, 1540-تان 1005-كە دەيىن تومەندەگەنىن كورسەتەدى.
سونىمەن قاتار اعىمداعى جىلدىڭ 6 ايىندا 658 ادام قىلمىستىق جاۋاپكەرشىلىككە تارتىلدى, ولاردىڭ 61-ءى – رەسپۋبليكالىق جانە وبلىستىق دەڭگەيدەگى باسشى جانە ۆيتسە-مينيستر, ۇشەۋى – سۋديا, جەتەۋى – وڭىرلىك اكىم مەن ولاردىڭ ورىنباسارلارى. اگەنتتىك توراعاسى كەلتىرىلگەن زالالدىڭ وتەلگەنى تۋرالى ايتتى. وسىلايشا, قازىرگى كەزدە بەلگىلەنگەن زالالدىڭ 15 ملرد تەڭگەسى وتەلدى.
سونداي-اق ونىڭ ايتۋىنشا, بيزنەس ىستەرىنە زاڭسىز ارالاسۋدىڭ 60 جاعدايى, كولەڭكەلى ەكونوميكا سۋبەكتىلەرىنە قامقورلىق جاساۋدىڭ 45 فاكتىسى, جۇيەلى سىبايلاس جەمقورلىقتىڭ 61 فاكتىسى انىقتالدى.
م. احمەتجانوۆ پاندەميامەن كۇرەسكە قاراجات جۇمساۋعا بايلانىستى 104 سىبايلاس جەمقورلىق قۇقىق بۇزۋشىلىق انىقتالعانىن ايتتى. ونىڭ ايتۋىنشا, مەديتسينالىق جابدىقتى ساتىپ الۋ كەزىندە دە تەرىس پايدالانۋ جانە ۇرلاۋ فاكتىلەرى ءالى دە جالعاسىپ جاتىر.
«مىسالى, شىمكەنتتە دەنساۋلىق ساقتاۋ باسقارماسى باسشىسىنىڭ ورىنباسارى مىرزاقۇلوۆ اففيليرلەنگەن كومپانيالار ارقىلى مەديتسينالىق تەحنيكانى جوعارى باعامەن ساتىپ الۋ فاكتىسى بويىنشا سوتتالدى. شىعىن 1,5 ملرد تەڭگەنى قۇرادى. وسىعان ۇقساس فاكتىلەر ءۇشىن ماڭعىستاۋ وبلىسىندا دەنساۋلىق ساقتاۋ باسقارماسىنىڭ باسشىسى جامانباەۆا سوتتالدى», دەدى ول.
سونداي-اق ول مەديتسينا قىزمەتكەرلەرىنە ۇستەمەاقىنى ماقساتتى ءبولۋدى باقىلاۋ تۋرالى ايتتى. مۇندا تاۋەكەل توبىنا جاتپايتىن ادامدارعا ۇستەمەاقى ەسەپتەۋ, جۇمىس ىستەگەن ساعاتتاردى تىركەۋ جانە قاراپايىم دارىگەرلەردەن باسشىلاردىڭ اقشا الۋى فاكتىلەرى انىقتالعان. اتاپ ايتقاندا, الماتى وبلىسىندا اۋداندىق ەڭبەكشىقازاق اۋرۋحاناسىنىڭ باس دارىگەرى جانە ونىڭ ەكى ورىنباسارى ۇستەمەاقى بەلگىلەۋ ءۇشىن قول استىنداعىلاردان جۇيەلى پارا الۋ سحەماسىن ۇيىمداستىرعان. اگەنتتىك توراعاسىنىڭ ايتۋىنشا, بۇل سالادا بارلىعى 104 سىبايلاس جەمقورلىق قۇقىق بۇزۋشىلىق انىقتالعان.
