الەۋمەتتىك جەلىلەردە الماتى-قورعاس تاس جولىندا بەتون پليتالار قايتا كوتەرىلگەنى تۋرالى ەسكەرتۋ ايتىلعان ۆيدەولار تاراپ جاتىر.
«شەلەك جاقتان كەلە جاتساڭىز مالوۆودنوەعا جەتپەي بەتوندار قايتا كوتەرىلىپ كەتكەن. اباي بولىڭدار, جىگىتتەر», دەيدى ۆيدەو اۆتورى.
«قازاۆتوجول» مالىمەتىنشە, 2021 جىلى 2 شىلدەدە «الماتى-قورعاس» (بايدىبەك بي كەنتى اۋدانىندا) اۆتوموبيل جولىنىڭ اقىلى ۋچاسكەسىنىڭ 86-شاقىرىمىندا اۋا تەمپەراتۋراسىنىڭ كۇرت كوتەرىلۋىنەن بەتون پليتالار ىعىسىپ, ءجۇرىس بولىگىنىڭ جابىنى كوتەرىلىپ كەتكەن.
«قازاۆتوجول» قىزمەتكەرلەرى اكىمشىلىك پوليتسيامەن بىرلەسىپ جەدەل تۇردە ەسكەرتۋ جول بەلگىلەرىن ورناتتى, سونداي-اق جوندەۋ جۇمىستارىن جۇرگىزۋ كەزىندە پوليتسيانىڭ پاترۋلدىك كولىگى قويىلدى. وسى ۋچاسكەدەگى اقاۋ جەدەل جويىلدى.
«قازاۆتوجول» ۋاقىتشا قولايسىزدىقتار تۋىنداعانى ءۇشىن كەشىرىم سۇرايدى جانە جول پايدالانۋشىلارىنا ۋاقتىلى حاباردار ەتكەنى ءۇشىن العىس بىلدىرەدى», دەدى كومپانيا وكىلدەرى.
