رۋحانيات • 23 ماۋسىم، 2021

«ابايدىڭ جۇمباعى» – ەلەكتروندى نۇسقادا

195 رەت كورسەتىلدى

مەملەكەتتىك سىيلىقتىڭ لاۋرەاتى رامازان توقتا­روۆتىڭ كىتاپتارىن ەندى ەلەكتروندى نۇسقادا وقۋعا بولادى. س.تورايعىروۆ اتىنداعى پاۆلودار وب­لىستىق امبەباپ كىتاپ­حاناسى قالامگەردىڭ 11 كىتا­بىن تسيفرلاندىرىپ، ايماقتىڭ E-KITAP.KZ ونلاين كىتاپحاناسىنا ورنالاستىردى. جازۋشىنىڭ ەڭبەكتەرى وقىرمان قا­ۋىمعا بۇرىنعىدان دا قولجەتىمدى بولا ءتۇستى.

ەستەرىڭىزدە بولسا، وسى جىل­دىڭ ساۋىرىندە «Egemen Qazaq­stan» گازەتىندە «جوقتاۋشىسى جوق جازۋشى» جانە «رامزايدىڭ «جۇم­باعى» اتتى ەكى ماقالا جا­رىق كورگەن ەدى. وندا ءبىز قا­­لام­گەردىڭ ەسكەرۋسىز قالعا­نىنا قىنجىلىس ءبىلدىرىپ، شىعار­ما­شىلىعىن ناسيحاتتاۋعا قا­تىس­تى بىرقاتار ۇسىنىس ايت­قانبىز. بۇل ۇسىنىستاردىڭ بار­لىعى پاۆلودار وبلىسىنىڭ باسشىلىعىنا ارنايى جولداندى. جازۋشىنىڭ كىتاپتارىن ەلەكتروندى نۇسقاعا كوشىرۋ باس­تاماسى سول ماقالادا قامتىلعان بولاتىن.

وبلىستىق كىتاپحانانىڭ ول­كەتانۋ جانە تسيفرلى تەحنولوگيالار ءبولىمىنىڭ باسشىسى مارال تاجەنوۆانىڭ ايتۋىنشا، كىتاپتاردى تسيفرلاندىرۋ ءۇشىن جازۋشى ۇرپاقتارىنىڭ رەسمي رۇقساتى قاجەت ەكەن. تيى­سىن­شە، تاراپتار اراسىندا ارنايى كە­لىسىمشارت جاسالۋى ءتيىس.

– وسى جىلدىڭ مامىر ايىندا قازاقستان جازۋشىلار وداعى پاۆلودار وبلىستىق في­ليالىنىڭ ديرەكتورى جار­قىنبەك امانتاي الماتىعا ارنايى بارىپ، رامازان توق­تا­روۆتىڭ ۇرپاقتارىمەن كەز­دەستى. سول جولى جازۋشىنىڭ كى­تاپتارىن تسيفرلاندىرۋ تۋرالى كەلىسىمشارت جاسالدى. ءبىز سونىڭ نەگىزىندە قالامگەردىڭ قازاق تىلىندەگى 9 كىتابىن جانە ورىس تىلىندە جارىق كورگەن ەكى تۋىندىسىن ەلەكتروندى فورماتقا كوشىردىك. اتاپ ايتقاندا، قا­زىر جەرلەسىمىزدىڭ «جەردىڭ ۇل­گىسى»، «ابايدىڭ جۇمباعى»، «با­قىتتى قۇلدىقتىڭ اقىرى»، «عاسىر نانى»، ەكى كىتاپتان تۇ­را­تىن «ەرتىس مۇحيتقا قۇيادى»، «تاڭبالى جارعاقتىڭ قۇپياسى»، «تۇلپاردىڭ سىنى»، «ەرتىس پەر­زەنتى»، «ستەپنىە كورني»، «ير­تىش ۆپاداەت ۆ وكەان» سە­كىلدى ەڭبەكتەرى وقىرمان قاۋىم­عا ەلەكتروندى نۇسقادا قول­جە­تىم­دى. الداعى ۋاقىتتا جازۋ­شى­­نىڭ باسقا دا كىتاپتارىن تسيفر­لاندىرۋعا ءازىرمىز، – دەيدى مارال تاجەنوۆا.

جوعارىدا اتالعان كىتاپ­تار­دى E-KITAP.KZ ونلاين كىتاپ­حاناسىنان وقۋعا مۇمكىندىك بار. سونداي-اق ءوڭىردىڭ «QR كى­تاپحاناسى» ارقىلى جۇكتەپ الۋ جاعى دا قاراستىرىلعان.

بۇل رەتتە ر.توقتاروۆتىڭ وقىر­­مان قاۋىم جوعارى باعا­لاعان «سۋسامىر»، «تەرىستىك شۇ­­عى­لاسى»، «بىتەۋ جارا»، ورىس تىلىندە جارىق كورگەن «حلەب ۆەكا»، «تاينا مەچەنوي زام­شي»، «مۋجسكايا درۋجبا» سەكىل­دى كى­تاپتارى دا ەلەكتروندى نۇس­قاعا كوشىرىلۋى قاجەت دەپ بى­لەمىز.

ر.توقتاروۆقا قاتىستى جا­عىمدى جاڭالىق مۇنىمەن شەك­تەلمەيدى. پاۆلوداردىڭ وب­لىس­تىق كىتاپحاناسى تاعى ءبىر جوبانى ويداعىداي جۇزەگە اسىردى. دالىرەك ايتساق، كىتاپحانانىڭ ىشىنەن «رامازان توقتاروۆتىڭ جەكە كىتاپحاناسى» اشىلدى.

مۇندا قالامگەردىڭ الما­تىداعى شاڭىراعىنان ارنايى اكەلىنگەن كىتاپتار قويىلعان. ونىڭ باسىم بولىگىن بەلگىلى اقىن-جازۋشىلاردىڭ، كورنەكتى قوعام قايراتكەرلەرىنىڭ ءار جىلدارى ر.توقتاروۆقا قولتاڭبا قويىپ، سىيعا تارتقان كىتاپتارى قۇرايدى.

ماسەلەن، ايگىلى ءازىلحان نۇر­­شايىقوۆ 1970 جىلى شىق­قان «ماحاببات، قىزىق مول جىلدار» كىتابىنا «قىمباتتى باۋىرىم رامازانعا، اعالىق كوڭىلمەن. 23.11.1970 ج. الما­تى» دەپ قولتاڭبا جازىپ، سىي­عا تارتىپتى. سول سەكىلدى سو­فى سماتاەۆ، زەينوللا سە­رىكقاليەۆ، اكىم تارازي، بەي­بىت ساپارالى، جايساڭبەك مول­داعاليەۆ، بەكمۇرات ۋاحاتوۆ سىندى ادەبيەت وكىلدەرىنىڭ اقجارما تىلەگى جازىلعان كى­تاپتار بار. بۇدان بولەك را­ما­زان توقتاروۆتىڭ جەكە كى­تاپ­حاناسىنا ۇزاق جىلدار بويى ساۋلە شاشىپ كەلگەن مۇحتار اۋەزوۆتىڭ، ىبىراي ءال­تىنساريننىڭ، اباي قۇ­نان­­باي ۇلىنىڭ، شاكارىم قۇداي­بەرديەۆتىڭ، ساكەن سەي­فۋل­لين­نىڭ، بەردىبەك سوق­پاق­باەۆتىڭ، عابيدەن ءمۇس­تا­فيننىڭ، ءسابيت مۇقانوۆ پەن مۇقان يمان­جا­نوۆتىڭ كىتاپتارى ال­ما­تى­دان ارنايى اكەلىنىپ، سو­رەگە قويىلعان.

–  بيىل قازاقستان جازۋشىلار وداعىنىڭ پاۆلودار وبلىستىق فيليالى مەن س.تورايعىروۆ اتىنداعى وبلىستىق امبەباپ كىتاپحانا بىرلەسىپ، رامازان توقتاروۆتىڭ شىعارماشىلىق مۇرالارىن ىزدەستىرۋ، جيناستىرۋ جۇمىستارىن قولعا الدى. وسى ورايدا وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن الماتى قالاسىنداعى جازۋ­شىنىڭ شاڭىراعىنا ارنايى ىسساپارمەن بارىپ كەلدىك. ءبىز­دى قالامگەردىڭ قىزى باقىت راما­زانقىزى قارسى الىپ، اكەسىنىڭ جەكە كىتاپحاناسىمەن تانىستىردى. ۇلكەن ءبىر تاريحي، ادەبي مۋزەيگە كىرگەندەي اسەرگە بولەندىك. سىر بۇگىپ جاتقان كى­تاپتار، قاتتاۋلى تۇرعان قول­جازبالار، ءتۇرلى فوتوسۋرەتتەر ەرەكشە سەزىمگە بولەيدى. قاي­تاردا ۇرپاقتارى قالامگەردىڭ جەكە كىتاپحاناسىنان 50 شاق­تى كىتاپتى قولىمىزعا ۇس­تات­تى. ونىڭ ءبارىن وبلىس­تىق كى­تاپحانادان اشىلعان ر.توق­­­تا­روۆتىڭ جەكە كىتاپحا­نا­سىنا ورنالاستىردىق، – دەيدى قازاقستان جازۋشىلار وداعى پاۆلودار وبلىستىق في­ليا­لىنىڭ ديرەكتورى جار­قىنبەك امانتاي ۇلى.

ونىڭ ايتۋىنشا، بۇل ر.توقتاروۆتىڭ شىعارما­شىلى­عىن ناسيحاتتاۋعا باعىتتالعان جۇمىستاردىڭ باستاماسى عانا. الداعى ۋاقىتتا ادەبي شارالار، فورۋمدار مەن كونفەرەنتسيالار ۇيىمداستىرىلماق. قالامگەردىڭ ەڭبەكتەرىن زەرتتەۋ، ناسيحاتتاۋ جۇمىسى دا جاڭا ارناعا تۇسەدى دەگەن سەنىم بار.

ايتپاقشى، جازۋشىنىڭ ۇرپاعى باقىت رامازانقىزى اكەسىنىڭ كەرەكۋدەگى جەكە كى­تاپ­حاناسىنا شاڭىراعىندا ساق­تالعان تاعى ءبىرشاما كىتاپتى سىيلاۋعا ءازىر ەكەنىن جەتكىزدى.

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

نۇرحاننىڭ دومبىراسى

ونەر • بۇگىن، 09:05

ءتورت دۇركىن چەمپيون

TOKYO2020 • بۇگىن، 09:04

ءبىر ءوزى – ءبىر مەملەكەت

TOKYO2020 • بۇگىن، 09:00

ءاميان اقشاسىز قالدى

قارجى • بۇگىن، 08:47

ساقتىق تالاپقا ساي ەمەس

كوروناۆيرۋس • بۇگىن، 08:37

Ashyq جوباسىن پايدالانۋشىلار سانى ارتتى

كوروناۆيرۋس • بۇگىن، 08:35

اسكەري دارىگەرلەر كومەككە كەلدى

كوروناۆيرۋس • بۇگىن، 08:28

دايارلىقتارىن جەتىلدىردى

قوعام • بۇگىن، 08:21

«وردالى وتىز ءىس»

تاۋەلسىزدىكتىڭ 30 جىلدىعى • بۇگىن، 08:17

ۇقساس جاڭالىقتار