سوناۋ 1973 جىلى اتالعان مۋزەيدە ءبىر تۋعان قىرعىز حالقىنىڭ ۇلى جازۋشىسى, شىرايلى شىعارمالارىمەن التى قۇرلىققا ايرىقشا تانىلعان, وي-ساناڭا, جان-جۇرەگىڭە كەرەمەت اسەر ەتەتىن رومان, حيكايات, اڭگىمەلەرى توپتاستىرىلعان كىتاپتارى سان الۋان تىلگە اۋدارىلىپ باسىلعان تاماشا قالامگەر شىڭعىس ايتماتوۆ تا بولعان ەكەن.
سوندا وسى مۋزەيدى ون ءۇش جىل بويى بايىپتى باسقارعان, قازاق بالالار ادەبيەتىنىڭ كورنەكتى وكىلىنىڭ ءبىرى, بالدىرعاندارعا ارنالعان ەرتەگى جازۋدىڭ شىنايى شەبەرى, بيىلعى مامىر ايىندا تۋعانىنا 85 جىل بولعان مارقۇم مۇحامەتجان ەتەكباەۆ ايەلىمەن بىرگە رەتىن تاۋىپ شىقاڭنىڭ الدىنان كىشكەنتاي بالاسىن (ونىڭ اتىن ىرىمداپ شىڭعىستاي شىڭعا شىقسىن دەپ شىڭعىس قويعان) الىپ شىققان عوي...
– ول ءبىر, ءبىر جارىم جاستاعى كەزىم, – دەيدى شىڭعىس ەتەكباەۆ. – مىنا سۋرەتتە شىڭعىس تورەقۇل ۇلىنىڭ مەنى قولىنا ۇستاپ تۇرعانى بەينەلەنگەن. جانىنداعىلار انام حازيما ايداربەكوۆا مەن اكەم مۇحامەتجان. ال وڭ جاق شەتتەگى – ۇلى جامبىلدىڭ بالاسى الىمقۇل جامبىلوۆ.
بۇگىندە جامبىل اۋدانىنداعى قاراقىستاق اۋىلىندا تۇراتىن كىشى شىڭعىس اناسى حازيمامەن (قازاقتىڭ اتاقتى اقىلدى بايى, ۇلكەن مەتسەنات مەدەۋ پۇسىرمانوۆتىڭ شوبەرەسى بولىپ كەلەدى) بىرگە قاراشاڭىراق – تۋعان ءۇيدىڭ ءتۇتىنىن ءتۇزۋ ۇشىرىپ, اكە جاققان وتباسى وتىن وشىرمەي وتىر!..
بەرىكباي قادىقوۆ,
جۋرناليست
