فوتو: gov.kz
عىلىم جانە جوعارى ءبىلىم مينيسترلىگىنىڭ مالىمەتىنشە, تالاپكەرلەردىڭ 68%-ى شەكتى بالل جيناعان. بەس ءپان بويىنشا ورتاشا بالل 64-ءتى قۇراپ, ەڭ جوعارى كورسەتكىش رەتىندە 138 بالل تىركەلگەن.
«تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. بۇل جولى 19 مىڭعا جۋىق ءوتىنىش قابىلدانىپ, ولاردىڭ ىشىندە 2 بىرەگەي تەست تاپسىرماسىنا قاتىستى وتىنىشتەر قاناعاتتاندىرىلعان. رەسپۋبليكالىق كوميسسيا جۇمىسىن اياقتادى, تالاپكەرلەردىڭ سەرتيفيكاتتارى جەكە كابينەتتە قولجەتىمدى», دەلىنگەن مينيسترلىك تاراتقان حابارلامادا.
تەستكە قاتىسۋشىلاردىڭ باسىم بولىگى – 19,2%-ى «ماتەماتيكا-فيزيكا» كومبيناتسيالارىن تاڭداعان. «بيولوگيا-حيميا» پاندەرىن – 16,8% تالاپكەر تاڭداعان. سونداي-اق تەست تاپسىرۋشىلاردىڭ – 9,8% «شىعارماشىلىق ەمتيحان» كومبيناتسياسى بويىنشا ءبىلىمىن سىناعان.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا 446 تالاپكەر قاتىسقان.
«ۇبت-نى وتكىزۋ بارىسىندا 320 ەرەجە بۇزۋشىلىق انىقتالدى. 198 تالاپكەر سمارتفونداردى, شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 120 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلىپ, ولاردىڭ ناتيجەسى جويىلدى. بەينە باقىلاۋدى تەكسەرۋ ناتيجەسىندە 2 ادامنىڭ سەرتيفيكاتى جارامسىز بولدى. وزگە ادامداردىڭ ورنىنا كىرۋ فاكتىلەرى انىقتالعان جوق», دەلىنگەن مينيسترلىك تاراتقان حابارلامادا.
ايتا كەتەيىك, 2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
