سانيتارلىق-ەپيدەميالىق سالانىڭ ماماندارى ەندى وسى كورسەتكىش ءتىپتى جاقسارىپ, سىرقاتتاردىڭ سانى ازايا بەرەتىن بولسا, وندا وڭىردەگى كارانتيندىك شەكتەۋلەر شەڭبەرىنىڭ كەمي تۇسەتىنىن ايتادى.
ىندەت وشاقتارىنا تالداۋ جۇرگىزگەن ساراپشى ماماندار اۋرۋدى جۇقتىرۋدىڭ وقيعالارى ءۇي جاعدايىندا كوپ بولاتىنىن انىقتاپ وتىر. مۇنداعى كورسەتكىش 26 پايىزدى قۇراعان. قوعامدىق كولىكتە ءجۇرىپ جۇقتىرعانداردىڭ دا ۇلەس سالماعى مول. اۆتوبۋستارمەن ءارى-بەرى ءجۇرىپ, جامان ىندەتكە ۇرىنعانداردىڭ كورسەتكىشى 16%-عا جەتىپتى. ال اۋىرعانداردىڭ اراسىندا جاس شاماسىنا قاراي زەينەتكەرلەر توپ باسىندا تۇر. ولاردىڭ ۇلەس سالماعى 25%-دى قۇراسا, 21% كورسەتكىشى بار جۇمىس ىستەمەيتىندەر دە ەگدە ادامداردان قالىسار ەمەس.
قازىرگى تاڭدا وڭىردە ءومىردىڭ تىنىس-تىرلىگى ءوزىنىڭ بۇرىنعى قالىپتى جاعدايىنا قايتا كەلە باستاعانىن ايتا كەتكەن ءلازىم. بۇعان, اسىرەسە, Ashyq جوباسىنىڭ ىقپالى زور بولىپ تۇر. اتاپ ايتقاندا, اتالعان ءموبيلدى قوسىمشا ىسكە قوسىلعالى جۇمىس ىستەۋگە رۇقسات ەتىلگەن كاسىپكەرلىك نىساندار قاراسى مولايعان.
بۇگىندە وبلىستا باس سانيتارلىق دارىگەردىڭ رۇقسات ەتۋىمەن بالالاردىڭ ويىن-ساۋىق ورتالىقتارى, تسيرك, قوناقۇيلەر جۇمىس ىستەي باستادى. البەتتە بۇل جەرلەردە سانيتارلىق تالاپتار ءالى دە بولسا قاتاڭ ساقتالادى. ماسەلەن, بالالار ورتالىقتارىندا ءبىر مەزگىلدە 30-دان اسا جەتكىنشەك بولماۋى كەرەك. ۇلكەن ورتالىقتاردا 60 ادامعا دەيىن عانا بولۋعا رۇقسات بەرىلگەن. ال ەندى وتەلدەر مەن قوناقۇيلەرگە ادام سانى جاعىنان شەكتەۋلەر قويىلمايدى.
بۇدان بولەك تۇرعىنداردى قۋانتقان تاعى ءبىر جاڭالىق – دەمالىس كۇندەرى وبلىس ىشىندە جۇرەتىن جولاۋشىلار تاسيتىن اۆتوبۋستاردىڭ مارشرۋتتارى جاندانا باستادى. قازىر وبلىس ورتالىعىنان وڭىردەگى قالالار مەن ەلدى مەكەندەرگە ەش شەكتەۋسىز قاتىناۋعا بولادى.
قازىر – بالالاردىڭ كانيكۋل ۋاقىتى. وسىعان وراي ولار باراتىن جەرلەردىڭ دە جۇمىسى «تىرىلە» باستادى. دەگەنمەن 12 جاستان اسقان جەتكىنشەكتەر كومپيۋتەر كلۋبتارىنا, تسيرك پەن كينوتەاترلارعا Ashyq موبيلدىك قوسىمشاسىنان ەرىكتى تۇردە ءوتىپ بارىپ كىرە الادى.
تاعى ءبىر ايتا كەتەتىن جايت, جوباعا قاتىسۋشى كاسىپكەرلىك نىساندار باسقا دا پلاتفورمالاردى پايدالانا الادى. مىسالى egov mobile, اitu, Kaspi.kz, Halyk Bank, Sberbank.kz سياقتى قوسىمشالار تۇرعىندارعا قىزمەت ەتۋگە ارقاشاندا دايىن.
ايتا كەتۋ كەرەك, وتكەن تاۋلىكتە قاراعاندى وبلىسىندا 160 ادامنىڭ كوروناۆيرۋس ينفەكتسياسىن جۇقتىرعانى انىقتالدى. ال كەيىنگى تۇسكەن مالىمەتكە ساي, سوڭعى تاۋلىكتە وڭىردەگى 115 ناۋقاس سىرقاتتان ايىعىپ شىققان.
قاراعاندى وبلىسى
