الەۋمەتتىك جەلىلەردە لەزدە تارالىپ كەتكەن بەينەجازبا تەن-ل`ەرميتاج كوممۋناسىنىڭ الدىندا تۇسىرىلگەن. نارازى ازامات پرەزيدەنتكە «ماكرونيزم توقتاتىلسىن!» دەپ ايقايلاپ ۇلگەرگەن.
پرەزيدەنتتىڭ كۇزەت قىزمەتى جەدەل ارەكەت ەتىپ, ەممانۋەل ماكروندى وقشاۋلاپ ۇلگەرەدى. فرانتسيالىق باسىلىمدار وقيعاعا قاتىستى ەكى ازاماتتىڭ قاماۋعا الىنعانىن جازدى.
فرانتسيا كوشباسشىسى وقيعاعا قاتىستى تۇسىنىكتەمە بەردى. «بۇل جاعدايدى تىم اسىرەلەۋدىڭ قاجەتى جوق. بۇل وقيعا ءبىزدى الاڭداتىپ, نازارىمىزدى وزگە دە ماڭىزدى ماسەلەلەردەن بۇرماۋى كەرەك», دەپ جاۋاپ بەردى.
بۇل وقيعادان كەيىن ۇكىمەت باسشىسى جان كاستەكس ۇلتتىق اسسامبلەياعا جولداۋ جاساپ, مەملەكەتتە دەموكراتيا مەن ءسوز بوستاندىعىنا رۇقسات بولسا دا, زورلاۋ, بوپسالاۋ نەمەسە باسقا دا كۇش كورسەتۋگە جول بەرىلمەۋى كەرەكتىگىن ايتتى.
سولشىلداردىڭ كوشباسشىسى جان-ليۋك مەلانشون دا بۇل پىكىرمەن كەلىسەتىنىن ايتىپ, پرەزيدەنتكە قولداۋ ءبىلدىردى. فرانتسۋز ساياساتىنداعى وڭشىلداردان شىققان اككى ساياساتكەر مارين لە پەن دە پرەزيدەنتكە قول جۇمساعان ازاماتتى سىنعا الدى. ول ءتىپتى قىزۋ تالقىعا ۇلاساتىن دەموكراتيالىق پىكىرتالاس كەزىندە دە قول جۇمساۋعا جول بەرىلمەيتىنىن ايتتى.
پرەزيدەنت اكىمشىلىگى وقيعانىڭ دروم ايماعىندا بولعانىن, ازاماتتىڭ مەملەكەت باسشىسىنا قول كوتەرگەنىن راستاۋمەن عانا شەكتەلدى. ودان كەيىنگى اقپاراتپەن بولىسكەن جوق. ءتارتىپ بۇزۋشىلاردىڭ جاۋاپقا تارتىلعانى تۋرالى دا رەسمي حابار تاراتىلمادى. دەگەنمەن, بىرقاتار فرانتسيالىق اگەنتتىك ەكى ازاماتتىڭ تۇرمەگە قامالۋى مۇمكىن ەكەنىن جازدى.
