بۇعان دەيىن ىشكى ىستەر مينيسترلىگىنىڭ باسشىسى ءبىلىم بەرۋ ۇيىمدارىنداعى وقۋشىلاردىڭ قاۋىپسىزدىگىن قامتاماسىز ەتۋ جونىندەگى جەدەل كەڭەستە ىشكى ىستەر ورگاندارىنىڭ جانە اۋماقتىق پوليتسيا دەپارتامەنتتەرىنىڭ باسشىلارىنا بارلىق وقۋ ورىندارىن بەينەباقىلاۋ جۇيەلەرى, قىزمەتكەرلەردى جانە كەلۋشىلەردى ەسكەرتۋ قۇرالدارى, كۇزەتتىك دابىل جانە فيزيكالىق كۇزەتى بار-جوعىن تەكسەرۋدى تاپسىرعان.
– بالالار – قوعامنىڭ ەڭ وسال بولىگى. سوندىقتان ولاردىڭ قاۋىپسىزدىگى ارقاشان باستى نازاردا. جەرگىلىكتى اتقارۋشى ورگاندارمەن, ءبىلىم بەرۋ ۇيىمدارىمەن جانە ازاماتتارمەن بىرلەسىپ, ءبىز بالالاردىڭ مەكتەپتەردە ءبىلىم الۋى ءۇشىن بارلىق قاجەتتى شارالاردى قابىلداۋىمىز كەرەك, ال اتا-انالار ولاردىڭ قاۋىپسىزدىگى ءۇشىن الاڭداماۋى كەرەك, – دەدى ەرلان تۇرعىمباەۆ.
تالداۋدىڭ ارالىق ناتيجەلەرى تۋرالى ەسەپ بەرە وتىرىپ, الماتى قالالىق پد باسشىسى قانات تايمەردەنوۆ, تاپسىرمالار شەڭبەرىندە ءبىلىم باسقارماسىمەن بىرلەسە وتىرىپ, شۇعىل تۇردە كوميسسيا قۇرىلىپ, قالانىڭ بارلىق مەكتەپتەرىندە زەرتتەۋ جۇرگىزىلگەنىن جانە بىرقاتار نىسانداردا بەينەباقىلاۋ كامەرالارىنىڭ جەتىسپەۋشىلىگى, دوعالى مەتالل دەتەكتورلارىنىڭ, دابىل باتىرمالارىنىڭ بولماۋى, سونداي-اق, مامانداندىرىلعان كۇزەت بويىنشا جەتىسپەۋشىلىكتەر بار ەكەنىن اتاپ ءوتتى.
– تالداۋ ناتيجەلەرى بويىنشا بارلىق كەمشىلىكتەردى جويۋ جوسپارى قۇرىلدى. وقۋ ورىندارىندا ورناتىلعان بارلىق بەينەكامەرالار پوليتسيا دەپارتامەنتىنىڭ جەدەل باسقارۋ ورتالىعىنا قوسىلادى. دۇربەلەڭ باتىرماسىن باسقاننان كەيىن باقىلاۋ كامەرالارىنان تۇسىرىلگەن بەينەلەر جەدەل باسقارۋ ورتالىعىندا اۆتوماتتى تۇردە كورسەتىلەتىن قارۋ-جاراق دۇكەندەرىنىڭ ۇلگىسىندەي. سودان كەيىن وقيعا ورنىنا پوليتسيا مەن كۇزەت كومپانياسى كەلەدى. كەيىننەن قالانىڭ لاڭكەستىككە وسال ساناتىنا جاتاتىن بارلىق نىساندارى بىرىڭعاي جەدەل باسقارۋ ورتالىعىنا قوسىلادى, – دەپ تۇيىندەدى قانات تايمەردەنوۆ.
