قازاقستان سىرتقى ىستەر مينيسترلىگى مەن يسپانيا كورولدىگى سىرتقى ىستەر, ەۋروپالىق وداق جانە ىنتىماقتاستىق مينيسترلىگى اراسىنداعى ساياسي كونسۋلتاتسيالاردىڭ 6-راۋندى اياسىندا ۇيىمداستىرىلعان ءباسپاسوز ءماسليحاتى بارىسىندا باق وكىلدەرى ەرلان الىمباەۆتان ەكى ەل اراسىندا تىكەلەي اۋە رەيسى قاشان اشىلاتىندىعىن سۇرادى.
«بۇگىن بۇل ماسەلە دە تالقىعا ءتۇستى. پاندەمياعا دەيىن مۇنداي ۋاعدالاستىق بولعان جانە مەموراندۋمعا قول قويىلعان ەدى. قازىر اۋە قاتىناسى تۋرالى ۇكىمەتارالىق كەلىسىمنىڭ ءماتىنىن كەلىسۋ جايى قوزعالىپ جاتىر. دەگەنمەن, ۋاعدالاستىقتا اپتاسىنا جەتى تۇراقتى رەيستى جولعا قويۋ كوزدەلگەن ەدى. بىراق, وعان مىنا پاندەميا ءوز تۇزەتۋىن ەنگىزىپ وتىر. بىزدە, سونىمەن قاتار يسپانيادا ەپيدەميولوگيالىق احۋالدىڭ جاقسارۋىنا قاراي, شامامەن تامىز-قىركۇيەك ايلارىندا وسى اۋە رەيستەرىن اشۋدىڭ بەلسەندى فازاسىنا كوشەمىز دەپ ۇمىتتەنەمىن», دەدى قر سىرتقى ىستەر ءمينيسترىنىڭ ورىنباسارى.
