«شىمكەنت قالاسىندا ءساۋىر ايىنىڭ 25 كۇنىندە 2 131 جاعداي تىركەلىپ, اۋىرعانداردىڭ سانى 4,5 ەسەگە ءوستى. ناۋرىز ايىندا ەسەپتى كەزەڭدە 473 جاعداي تىركەلگەن ەدى. ەپيدەميالىق زەردەلەۋ بارىسىندا ناۋقاستانعانداردىڭ 29,3 پايىزى اۋىرعان اداممەن قارىم-قاتىناستاعىلاردان انىقتالدى. قالعاندارى كارانتيندىك ساقتىق شارالارىن ساقتاماعاندىقتان ىندەتكە شالدىققان. جىل باسىنان بەرى انىقتالعان 3 475 ناۋقاستىڭ 32,4 پايىزى ءىرى ساۋدا ۇيلەرى مەن دۇكەندەردە, 20,1 پايىزى بازارلاردا, 18,2 پايىزى قوعامدىق كولىكتەردە جانە ءتۇرلى جيىندارعا بارعاندا جۇقتىرعان», دەدى دەپارتامەنت باسشىسى.
شاھاردا ەپيدەمياعا قارسى سانيتارلىق-اعارتۋ جۇمىستارى بەلسەندى جۇرگىزىلۋدە. جىل باسىنان بۇگىنگە دەيىن 451 سانيتارلىق-اعارتۋ شاراسى وتكىزىلىپ,
12 338 نىسانعا ءتۇسىندىرۋ جۇمىستارى جۇرگىزىلگەن.
Ashyq جوباسى قاشىقتىقتى ساقتايدى
شىمكەنتتە ەپيدەميالىق جاعداي «قىزىل ايماقتان» «سارى ايماققا» وتۋىنە بايلانىستى قىزمەتىنە شەكتەۋ قويىلعان بىرقاتار كاسىپكەرلىك نىسان سانيتارلىق تالاپتاردى ساقتاي وتىرىپ, قايتا ىسكە قوسىلدى. ءا.تولەباەۆ ەپيدەميالىق احۋال, سانيتارلىق-اعارتۋ جۇمىستارىنا ارنالعان Ashyq جوباسى تۋرالى ءتۇسىندىرىپ بەردى.
«قازىرگى تاڭدا قالادا ەپيدەميالىق جاعداي ءالى دە تۇراقسىز. ياعني 15 ساۋىردەن باستاپ «قىزىل ايماقتا» بولدى. ال COVID-19 جۇقتىرۋ جاعدايىنىڭ تىركەلۋ سانىن ەسكەرە وتىرىپ, 26 ساۋىردەن باستاپ «سارى ايماققا» اۋىستىرىلدى. بىراق ناۋقاستاردىڭ ىشىنەن كوروناۆيرۋستىڭ «بريتانيالىق», «وڭتۇستىك افريكالىق» جانە «برازيليالىق» اۋىر جاعدايدا وتەتىن تۇرلەرى انىقتالۋدا. بۇل ىندەتتىڭ قاۋىپتىلىگىن ودان سايىن ارتتىرىپ وتىر. 26 ساۋىردەن باستاپ سپا, باسسەين, يوگا ورتالىقتارىن قوسا العاندا, فيتنەس-كلۋبتارى قالىپتى رەجىمدە جۇمىس ىستەيدى. ال بانكەت زالدارىن, اسحانا, فاست-فۋد وبەكتىلەرىن قوسپاعاندا, قوعامدىق تاماقتانۋ ورىندارىنىڭ ۋاقىت كەستەسى ساعات 07:00-دەن 00:00-گە وزگەرىپ, ادام سانى 50 پايىزدان اسپاۋى ەسكەرتىلگەن. كينوتەاتر, تەاتر, فيلارمونيا مەن كونتسەرت زالدارىنىڭ سىيىمدىلىعى 20 پايىزدان اسپايتىن جاعدايدا قالىپتى رەجىمدە قىزمەتىن جالعاستىرادى. سونىمەن قاتار وبلىسارالىق جانە قالالىق تۇراقتى ەمەس (تۋريستىك) تاسىمالدار 15 ادامنان (75 پايىز) اسىرماي جولاۋشى تاسىمالدايدى. ودان بولەك, بيليارد, PlayStation كلۋبتارىن قوسا العاندا, كومپيۋتەرلىك جانە بوۋلينگ كلۋبتارىندا تۇرعىندار 50 پايىزدان اسپاعان جاعدايدا جۇمىس رەجىمى ساعات 12:00-دەن 00:00-گە دەيىن ساقتالادى», دەدى دەپارتامەنت باسشىسى.
اتالعان جوبا 23 ساۋىردە قالالىق باس مەملەكەتتىك سانيتارلىق دارىگەردىڭ Ashyq جوباسىنا قاتىساتىن سۋبەكتىلەرگە شەكتەۋ شارالارىن بەكىتۋ تۋرالى قاۋلىسىنا سايكەس 26 ساۋىردەن باستاپ كۇشىنە ەندى. دەپارتامەنت باسشىسىنىڭ ايتۋىنشا, كوروناۆيرۋس ينفەكتسياسىنىڭ تارالۋىن بولدىرماۋ ماقساتىندا جىل باسىنان بەرى موبيلدىك توپتار ارقىلى ۇيلەستىرۋ ورتالىقتارىنا 190 جەدەل حابارلاما تۇسكەن. بارلىق شۇعىل قوڭىراۋ بويىنشا تەكسەرۋ ۇيىمداستىرىلىپ, 170 نىسانعا ايىپپۇل سالىنعان. ايتا كەتەيىك, زەردەلەۋ بارىسىندا COVID-19 ينفەكتسياسىن جۇقتىرعانداردىڭ 29,3 پايىزى اۋىرعان اداممەن قارىم-قاتىناستا بولعانى انىقتالعان. ال قالعانى كارانتيندىك ءتارتىپتى ساقتاماۋ سالدارىنان ىندەتكە شالدىققان. وسى ورايدا ول قالا تۇرعىندارىن سانيتارلىق نورمالاردى قاتاڭ ساقتاۋعا شاقىردى.
ۆاكتسينا, تاعى دا ۆاكتسينا...
شىمكەنتتىكتەردىڭ ىندەتكە قارسى ەكپە سالدىرۋ بەلسەندىلىگى ارتىپ, وتكەن اپتا سوڭىندا قويمالارداعى ۆاكتسينا تاۋسىلعان ەدى. كۇنى كەشە وتاندىق QazVac ۆاكتسيناسىنىڭ 4 مىڭ دوزاسى جەتكىزىلدى. ەندى شاھار تۇرعىندارى ەلىمىزدە وندىرىلگەن ەكپەنى ەكتىرمەك.
«شىمكەنتتە كوروناۆيرۋسقا قارسى سپۋتنيك V ۆاكتسيناسىنىڭ I كومپونەنتىن 78 مىڭنان اسا ادام قابىلدادى. ال ەرىكتى تۇردە ۆاكتسينا الۋشىلاردىڭ وسۋىنە بايلانىستى قالاداعى ەكپە ەگۋ پۋنكتتەرىنىڭ سانى 42-گە جەتتى. سونىمەن قاتار ەلىمىزدە 26 ساۋىردەن باستاپ بعم بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىندا وندىرىلگەن وتاندىق QazVac (QazCovid-in) ەكپەسىنىڭ ءبىرىنشى پارتياسى قولدانىسقا ەنگىزىلىپ وتىر. وسى ورايدا ءۇشىنشى مەگاپوليسكە QazVac-تىڭ 4 مىڭ دوزاسى جەتكىزىلدى. بۇل ەكپەلەر قالاداعى بارلىق ەمحانا مەن ۆاكتسينالاۋ ورنىنا تاراتىلدى. ايتا كەتەرلىگى, تۇرعىندار ەكپە قابىلداۋ كەزىندە ەكى ۆاكتسينانىڭ قالاعانىن تاڭداي الادى», دەدى قالالىق سانيتارلىق-ەپيدەميولوگيالىق باقىلاۋ دەپارتامەنتى ينفەكتسيالىق جانە پارازيتتىك اۋرۋلاردى ەپيدەميولوگيالىق باقىلاۋ ءبولىمىنىڭ باسشىسى زاميرا ەسەنعاراەۆا.
ايتا كەتەرلىگى, QazVac – كوروناۆيرۋس ينفەكتسياسىنا قارسى بەلسەندىلىگى جويىلعان, بۇلشىقەت ىشىنە ەنگىزۋگە ارنالعان سۋسپەنزيا تۇرىندەگى ۆاكتسينا. اتالعان ەكپە 18-دەن اسقان ادامدارعا 21 كۇندىك ينتەرۆالمەن ەكى رەت سالىنادى. بۇل رەتتە قالا ەمحانالارىنداعى ەكپە ەگۋ كابينەتىنىڭ بارلىعى قاجەتتى جابدىقتارمەن تولىق قامتاماسىز ەتىلگەن. ودان بولەك, جىلجىمالى ەگۋ پۋنكتتەرىندە ۆاكتسينالاۋ جۇرگىزىلۋدە. ال ۆاكتسينالاۋعا قاتىساتىن قىزمەتكەرلەر ارنايى وقىتۋدان وتكەن. وسى ورايدا دەپارتامەنت باسشىسى شاھار تۇرعىندارىن جاپپاي ۆاكتسينالاۋعا قاتىسىپ, قوعامدىق يممۋنيتەت قالىپتاستىرۋ قاجەت ەكەنىن جەتكىزدى.
«اۋرۋدى جاسىرعانىمەن, ءولىم اشكەرەلەيدى»
«شىمكەنتتە ىندەت جۇقتىرعانداردىڭ كورسەتكىشى تومەندەگەنىمەن, اۋىر جاعدايداعى ناۋقاستار سانى كوبەيىپ جاتىر», دەيدى قالالىق جۇقپالى اۋرۋلار اۋرۋحاناسىنىڭ باس دارىگەرى باقتىعالي ەرەجەپوۆ. باس ينفەكتسيونيستىڭ ايتۋىنشا, اۋىر جاعدايداعى ناۋقاستاردىڭ باسىم بولىگى ۇيلەرىندە ءوز بەتىنشە ۇزاق ۋاقىت ەم العان. وسىلايشا, كوروناۆيرۋسكە شالدىققان ناۋقاستاردىڭ قاتارى قالىڭداعان. سالدارىنان اۋىر حالدە اۋرۋحاناعا تۇسكەن.
«جۇقپالى اۋرۋلار اۋرۋحاناسى 560 توسەكتىك ورىنعا ارنالعان. بۇگىندە اۋرۋحاناعا تۇسكەندەردىڭ بارلىعىندا كوروناۆيرۋس وڭ ناتيجە بەرۋدە. 560 توسەكتىك ورىننىڭ 60-ى جانساقتاۋ بولىمىندەگى ناۋقاستارعا ارنالعان. سول جانساقتاۋ بولىمىندەگى توسەكتىڭ 95 پايىزىندا ناۋقاستار اۋىر حالدە جاتىر. ولاردىڭ جارتىسى يۆل, قالعاندارى وتتەگى اپپاراتىنا قوسىلعان. اۋرۋحاناعا ءتۇسىپ جاتقان ناۋقاستاردىڭ باسىم بولىگىنىڭ وكپەسى 80-95 پايىزعا دەيىن قابىنىپ, ساتۋراتسياسى 50-گە دەيىن ءتۇسىپ كەتكەن. بۇل ناۋقاستاردىڭ كوبىسى ۇيلەرىندە 7-10 كۇندەي ۇزاق ۋاقىت ەم قابىلداپ, اۋرۋىن اسقىندىرىپ العان. ۇيدە ەم قابىلداپ, ءتۇرلى پرەپارات العان ناۋقاستاردى ەمدەۋ دۇرىس جۇرمەي جاتىر. ءوز بەتىنشە ۇيدە ەم الۋدان اۋلاق بولىپ, كوروناۆيرۋس بەلگىلەرى بايقالعان جاعدايدا ۋچاسكەلىك دارىگەرىڭىزگە نەمەسە جەدەل جاردەمگە حابارلاسقان ءجون. قازىر قالاداعى بارلىق ەمحانادا ۆاكتسينالاۋ جۇمىستارى جۇرگىزىلۋدە. ۆاكتسينالاۋ – وسى اۋرۋدى الدىن الۋدىڭ ەڭ نەگىزگى جولى», دەيدى جۇقپالى اۋرۋلار اۋرۋحاناسىنىڭ باس دارىگەرى باقتىعالي ەرەجەپوۆ.
انىعىندا, ءۇي جاعدايىندا ءوز بەتىنشە ەم الىپ جاتقان ازاماتتار ەل اۋزىندا تارالعان عىلىمي نەگىزسىز ەم-دومدارعا كوپتەپ يەك ارتۋدا. ناتيجەسىندە, اۋرۋ اسقىنىپ, ومىرلەرىنە قاۋىپ تونۋدە. ماسەلەن, تەك انتيبيوتيكالىق تابلەتكالار, قابىنۋعا قارسى انتيكواگۋليانتتاردى (اسپيرين) ءىشىپ ىندەتتەن قۇلان تازا ايىعىپ كەتەمىن دەگەن تۇسىنىك دۇرىس ەمەس», دەيدى مەديتسينا ماماندارى.
قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆتىڭ ايتۋىنشا, شىمكەنتتە دۇنيە جۇزىندە تارالىپ جاتقان ىندەتتىڭ ءۇش شتامى دا تىركەلگەن. «ەندى ساقتانۋدىڭ ەڭ ءتيىمدى جولى – ۆاكتسينا سالدىرۋ, كارانتين تالاپتارىن ساقتاۋ, تازالىققا ءمان بەرۋ», دەيدى قالانىڭ باس دارىگەرى باقىتجان پوزيلوۆ.
جىل باسىنان بەرى قالادا ءتاج ۆيرۋسىن جۇقتىرۋ بويىنشا 3 155, سوڭعى تاۋلىكتە 131 جاعداي تىركەلگەن. 1 848 ادام ەمدەلىپ شىققان. باسقارما باسشىسىنىڭ پىكىرىنشە, ەندى ۇجىمدىق يممۋنيتەت قالىپتاستىرۋ قاجەت. بۇل تۇرعىدا شىمكەنت ۆاكتسينالاۋ جوسپارىن ورىنداۋ بويىنشا «جاسىل ايماقتا». بۇگىنگە دەيىن شاھاردا 80 مىڭنان استام ادام ەرىكتى تۇردە ۆاكتسينا سالدىرعان. ونىڭ ىشىندە 7 مىڭنان استام ادام ۆاكتسينانىڭ ەكى كومپونەنتىن تولىق قابىلداعان. مەديتسينالىق مەكەمەلەردەن تىس قالاداعى 38 بەكەتتە ۆاكتسينالاۋ جۇرگىزىلىپ, ەكپە الۋشىلار اراسىندا ءبىلىم سالاسىنىڭ ماماندارى جوعارى كورسەتكىش كورسەتكەن. ينفەكتسيالىق ستاتسيونارلاردا بارلىعى 1 290 ورىن دايىندالعان. ەگەر توتەنشە جاعداي ورىن الار بولسا, 5 مىڭ ناۋقاس قابىلداۋعا قاجەتتى قوسالقى توسەكتىك ورىن قاراستىرىلعان. قالاداعى ءدارىحانالار مەن قويمالاردى ارنايى مونيتورينگتىك توپ جۇيەلى تۇردە تەكسەرۋدە.
شىمكەنت
