«بيىل ەكىنشى توقساننان باستاپ وتاندىق «QazCovid-In» پرەپاراتىمەن دە ۆاكتسينالاۋ جۇرگىزۋ جوسپارلانۋدا. ۆاكتسينانىڭ تۇسۋىنە قاراي ۆاكتسينالاۋدىڭ ءۇشىنشى كەزەڭىندە وڭىردەگى ءبىلىم بەرۋ مەكەمەلەرىنىڭ, مەكتەپكە دەيىنگى بالالار مەكەمەلەرىنىڭ, مەديتسينالىق-الەۋمەتتىك مەكەمەلەردىڭ جانە قۇزىرلى قۇرىلىمداردىڭ بارلىق قىزمەتكەرلەرى, سونداي-اق حالىق ساناعىمەن اينالىساتىن قىزمەتكەرلەر مەن ستۋدەنتتەر ەگىلەدى», دەيدى وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ.
بۇگىنگى تاڭدا كوروناۆيرۋس ينفەكتسياسىنا قارسى ۆاكتسينالاۋدىڭ ءبىرىنشى جانە ەكىنشى كەزەڭىن وتكىزۋ ءۇشىن وبلىستا 20 ەمدەۋ مەكەمەسى جۇمىس ىستەيدى. بارلىق ەمحانادا ەگۋ جۇمىستارى سانيتارلىق تالاپتارعا ساي جۇزەگە اسىرىلادى. نەگىزى وڭىردە بيىل ۆاكتسينانىڭ تۇسۋىنە قاراي 18 جاستان اسقان 593 700 ادامعا ۆاكتسينا سالۋ جوسپارلانعان. بۇل وبلىس حالقىنىڭ جالپى سانىنىڭ 52 پايىزىن قۇرايدى. سونىمەن قاتار وبلىستىق دەنساۋلىق ساقتاۋ باسقارماسىنىڭ مالىمەتىنشە, كەيىننەن حالىقتىڭ قوسىمشا وسال توپتارىن قوسا وتىرىپ, كونتينگەنتتى كەڭەيتۋ جوسپاردا بار. اعىمداعى جىلدىڭ ءساۋىر ايىنداعى مالىمەت بويىنشا, ۆاكتسينانىڭ ءبىرىنشى كومپونەنتىمەن بارلىعى 14 005 ادام ەگىلگەن. ونىڭ ىشىندە مەديتسينا جانە ءبىلىم سالاسىنىڭ قىزمەتكەرلەرى, كۇشتىك قۇرىلىم ماماندارى, مەملەكەتتىك قىزمەتشىلەر, ستۋدەنتتەر مەن جالپى تۇرعىندار دا بار. «العاشقى ەگۋدى العان 14 005 ادامنىڭ ىشىندە 5 651 ادام 21 كۇننەن كەيىن ۆاكتسينانىڭ ەكىنشى دوزاسىن سالدىردى. الايدا ۆاكتسينا العاندار تاراپىنان دەنساۋلىعىنا تەرىس اسەر بەرىپ, شاعىم كەلتىرگەندەر تىركەلگەن جوق», دەيدى ءا.قاليەۆ.
ال جامبىل وبلىسى بويىنشا سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى باعلان قىدىرباەۆتىڭ ايتۋىنشا, وبلىس اۋماعىندا كوروناۆيرۋس ىندەتىنە ەكپە جۇرگىزەتىن 36 ەكپە كابينەتى, ءبىرىنشى جىلجىمالى ەكپە پۋنكتى مەن 16 كوشپەلى ەكپە جۇرگىزەتىن بريگادالار جۇمىس جۇرگىزۋدە.
«ۆاكتسينانى ساقتاۋ جانە تاسىمالداۋعا ارنالعان توڭازىتقىشتار مەن رەفريجەراتورلى تيپتەگى كىرىكتىرىلگەن توڭازىتقىشى بار بەلسەندى تەرموكونتەينەرلەر جەتكىلىكتى مولشەردە الىندى. دايىندىقتان وتكەن 1 022 مەديتسينا قىزمەتكەرى ەكپە جۇمىستارىنا تارتىلدى. كوروناۆيرۋس ىندەتىنە قارسى ۆاكتسينالاۋ ەكى كەزەڭمەن جۇرگىزىلەدى. ءبىرىنشى كەزەڭدە ۆاكتسينانىڭ ءبىرىنشى كومپونەنتى سالىنىپ, ارادا 21 كۇن وتكەننەن كەيىن ەكىنشى كومپونەنتى سالىنادى. ەكپە سالار الدىندا مەديتسينا قىزمەتكەرى ەكپە الۋشىنى مەديتسينالىق تەكسەرۋدەن وتكىزىپ, ەشقانداي مەديتسينالىق قارسى كورسەتكىشتەر بولماعان جاعدايدا عانا ەكپە الۋشىنىڭ رەسمي رۇقساتىنان كەيىن ۆاكتسينانى سالادى», دەيدى ول.
بۇگىندە ۆاكتسينا وبلىسقا كەزەڭ-كەزەڭىمەن جەتكىزىلىپ وتىر. قازىرگى ۋاقىتتا ۆاكتسينانىڭ ءبىرىنشى كومپونەنتىنىڭ 15 500 دوزاسى الىنعان. ۆاكتسينانىڭ ەكىنشى كومپونەنتىنىڭ دە 15 500 دوزاسى جەتكىزىلگەن. تۇرعىندارعا ەكپە جۇرگىزۋ جۇمىستارى جالعاسۋدا. جالپى, بيىل وبلىسقا 582 مىڭ دوزا كوروناۆيرۋس ينفەكتسياسىنا قارسى ۆاكتسيناسىن جەتكىزۋ جوسپارلانعان.
«قازىرگى تاڭدا ءبىز قولدانىپ وتىرعان رەسەي مەملەكەتىنىڭ وندىرىسىنەن شىققان «گام-كوۆيد-ۆاك» (سپۋتنيك V) ۆاكتسيناسى. بۇل ۆاكتسينا كەزەڭ-كەزەڭىمەن سىناقتان وتكەننەن كەيىن عانا وندىرىسكە ەنگىزىلىپ وتىر. الداعى ۋاقىتتا ەلىمىزگە وتاندىق وندىرىستەن شىعاتىن ۆاكتسينانى قولدانۋ جوسپاردا بار», دەيدى ب.قىدىرباەۆ.
جامبىل وبلىسى
