پارلامەنت • 15 ءساۋىر، 2021

پارلامەنت دەپۋتاتتارى تمد پا كەڭەسىنىڭ وتىرىسىنا قاتىستى

37 رەت كورسەتىلدى

سەنات توراعاسى ماۋلەن اشىمباەۆ باستاعان قازاقستان پارلامەنتىنىڭ دەپۋتاتتارى تمد پارلامەنتارالىق اسسامبلەياسى كەڭەسىنىڭ وتىرىسىنا قاتىستى، دەپ حابارلايدى Egemen.kz

جيىن رەسەيدىڭ سانكت-پەتەربۋرگ قالاسىندا ءوتتى. ءىس-شارا بارىسىندا قاتىسۋشىلار – تمد ەلدەرى ۇلتتىق پارلامەنتتەرىنىڭ باسشىلارى – اسسامبلەيانىڭ قىزمەتىنە قاتىستى بىرقاتار ماسەلەنى، ونىڭ ىشىندە ۇيىمنىڭ 2020 جىلعى جۇمىسىنىڭ قورىتىندىسىن تالقىلادى.

كۇن تارتىبىندە تمد پارلامەنتارالىق اسسامبلەياسىنان كەلگەن حالىقارالىق بايقاۋشىلاردىڭ بيىل 10 قاڭتاردا وتكەن قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ سايلاۋىنا جۇرگىزگەن مونيتورينگتىڭ قورىتىندىسى بويىنشا ەسەبى دە قارالدى. وتىرىستا ءسوز سويلەگەن ماۋلەن اشىمباەۆ قر پارلامەنتى ءماجىلىسى دەپۋتاتتارىنىڭ كەزەكتى سايلاۋىنا حالىقارالىق بايقاۋشىلار جىبەرگەنى ءۇشىن ۇيىمعا العىس ءبىلدىردى.

«وتكەن سايلاۋ قازاقستاندا ىسكە اسىرىلىپ جاتقان ساياسي رەفورمالار اياسىندا ماڭىزدى كەزەڭگە اينالدى. بۇل جولى تەك پارلامەنت ءماجىلىسىنىڭ دەپۋتاتتارى عانا ەمەس، سونىمەن بىرگە جەرگىلىكتى وكىلدى ورگاندار – ءماسليحاتتاردىڭ دا دەپۋتاتتارى پارتيالىق تىزىممەن سايلاندى. مەملەكەت باسشىسىنىڭ باستاماسىمەن العاش رەت پارتيالىق تىزىمدە ايەلدەر مەن جاستارعا ارنالعان 30 پايىزدىق كۆوتا قاراستىرىلدى. ءماجىلىس قىزمەتىندە سالماقتى قۇقىققا يە بولعان پارلامەنتتىك وپپوزيتسيا ينستيتۋتى زاڭمەن بەكىتىلدى»، دەدى ماۋلەن اشىمباەۆ.

ول الداعى ۋاقىتتا دا مەملەكەت باسشىسىنىڭ جاڭعىرۋ باعدارىن ىسكە اسىرۋ اياسىندا قازاقستانداعى ساياسي جۇيەنى جەتىلدىرۋ جۇمىستارى جالعاسا بەرەتىنىن تىلگە تيەك ەتتى.

«جاڭا شاقىرىلىمداعى پارلامەنتتىڭ الدىندا ءسوز سويلەگەن قازاقستان پرەزيدەنتى وتكەن سايلاۋدىڭ تاجىريبەسىن ەسكەرە وتىرىپ، ساياسي پارتيالاردىڭ ماجىلىسكە ءوتۋ شەگىن 7-دەن 5 پايىزعا تومەندەتۋدى ۇسىندى. مۇنداي قادام ەلدەگى ساياسي باسەكەلەستىكتىڭ دامۋىنا ىقپال ەتەرى ءسوزسىز. ازاماتتاردىڭ سايلاۋ قۇقىعىن قورعاۋعا ءتيىستى جاعداي جاساۋ ءۇشىن بارلىق دەڭگەيدەگى سايلاۋ بيۋللەتەندەرىنە «بارىنە قارسىمىن» دەگەن جازۋ ەنگىزىلەتىن بولدى»، دەدى ماۋلەن اشىمباەۆ.

سونىمەن قاتار وتىرىسقا قاتىسۋشىلار اسسامبلەيا جانىنداعى ەكونوميكا جونىندەگى ساراپتامالىق كەڭەستىڭ جۇمىسىن جانە دوستاستىقتىڭ 2030 جىلعا دەيىنگى ەكونوميكالىق دامۋ ستراتەگياسىن ىسكە اسىرۋ مىندەتتەرىن تالقىلادى. تمد ەلدەرى پارلامەنتتەرىنىڭ باسشىلارى پاندەميادان كەيىنگى كەزەڭدە ەلدەرىمىزدىڭ ەكونوميكاسىن قالپىنا كەلتىرۋگە وسىنداي بىرلەسكەن جۇمىستار تىڭ سەرپىن بەرەتىنىنە سەنىم ءبىلدىردى.

ودان بولەك، ماۋلەن اشىمباەۆ سانكت-پەتەربۋرگكە جۇمىس ساپارى بارىسىندا بىرقاتار ەكىجاقتى كەزدەسۋلەر وتكىزدى. وزبەكستان ولي ماجليس سەناتىنىڭ ءتورايىمى تانزيلا نارباەۆامەن كەزدەسۋدە ەكى جاق قازاقستان-وزبەكستان قارىم-قاتىناسىن ودان ءارى دامىتۋ ماسەلەلەرىن ءسوز ەتتى.

ارىپتەستەر قازاقستان پرەزيدەنتى قاسىم-جومارت توقاەۆتىڭ 2019 جىلدىڭ ءساۋىر ايىندا وزبەكستانعا مەملەكەتتىك ساپارى كەزىندە جاسالعان كەلىسىمدەردىڭ جانە تانزيلا نارباەۆانىڭ 2019 جىلعى قاراشا ايىندا قازاقستانعا رەسمي ساپارى كەزىندە قول قويىلعان ىنتىماقتاستىقتىڭ جول كارتاسىنداعى تارماقتاردىڭ بارلىعى دەرلىك ىسكە اسىرىلعانىن ەرەكشە ەكپىنمەن اتاپ ءوتتى.

سونداي-اق، ماۋلەن اشىمباەۆتىڭ بيىلعى جازعا جوسپارلانعان وزبەكستانعا ساپارى دا ەكى ەلدىڭ ىنتىماقتاستىعىن ارتتىرۋعا ءوز سەپتىگىن تيگىزەتىنى ايتىلدى.

ء«بىزدىڭ مەملەكەتتەرىمىزدىڭ اراسىنداعى تىعىز، جان-جاقتى جانە ءوزارا سەنىمگە نەگىزدەلگەن قارىم-قاتىناس ەكى ەلدىڭ ۇلتتىق مۇددەلەرىنە تولىق ساي كەلەدى. قازىردىڭ وزىندە ەكىجاقتى بايلانىس اياسىندا كوپ شارۋا اتقارىلدى. ەكى ەلدىڭ پرەزيدەنتتەرى مەملەكەتارالىق بايلانىستارىمىزدىڭ ەرەكشە قارقىنمەن دامۋىنا بار جاعدايدى جاساپ كەلەدى. قازاقستان پارلامەنتىنىڭ سەناتى ىنتىماقتاستىقتى ءارى قاراي ارتتىرۋعا جانە بۇل باعىتتا بەلسەندى جۇمىس جۇرگىزۋگە دايىن»، دەدى ماۋلەن اشىمباەۆ.

رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكومەن كەزدەسۋدە قاتىسۋشىلار قازاقستان مەن رەسەي اراسىنداعى پارلامەنتارالىق ىنتىماقتاستىقتىڭ دامۋ دەڭگەيىنە جوعارى بەردى جانە وسى بايلانىستى ءارى قاراي نىعايتۋعا تولىق مۇمكىندىك بار ەكەنىنە نازار اۋداردى.

«قازاقستان مەن رەسەيدىڭ مەملەكەتارالىق ىنتىماقتاستىعىندا ءبىزدىڭ پارلامەنتارالىق بايلانىسىمىزدىڭ ماڭىزى زور. ەلدەرىمىزدىڭ ءوسىپ-وركەندەۋى كوپ جاعدايدا تاتۋ كورشىلىك، سىندارلى جانە ءوزارا ءتيىمدى قارىم-قاتىناسقا بايلانىستى»، دەدى قازاقستان سەناتىنىڭ سپيكەرى.

بۇدان باسقا تاراپتار قازاقستان مەن رەسەيدىڭ ەكىجاقتى كۇن تارتىبىندەگى بىرقاتار ماسەلەگە كوڭىل ءبولدى.

ماۋلەن اشىمباەۆ پەن ازەربايجان رەسپۋبليكاسى ميللي مەدجلىسىنىڭ ءتورايىمى ساحيبا گافاروۆا كەزدەسۋىندە ەلدەرىمىز اراسىنداعى پارلامەنتارالىق ىنتىماقتاستىق پەن ءوزارا ءتيىمدى قارىم-قاتىناستى ودان ءارى نىعايتۋ ماسەلەلەرى كەڭىنەن ءسوز بولدى.

قازاقستان دەلەگاتسياسىنىڭ باسشىسى ارىپتەسىن تاۋلى قاراباق قاقتىعىسىنىڭ اياقتالۋىمەن قۇتتىقتاپ، ەلىمىزدىڭ اتالعان ءوڭىردىڭ ينفراقۇرىلىمىن قالپىنا كەلتىرۋگە قاتىسۋ نيەتىن تاعى ءبىر رەت راستادى. ودان بولەك، ەكى تاراپ پاندەميادان كەيىنگى كەزەڭدە ساۋدا-ەكونوميكالىق ىنتىماقتاستىقتى جانداندىرۋعا سەنىم ءبىلدىردى. سونداي-اق، ماۋلەن اشىمباەۆ ارمەنيا رەسپۋبليكاسى ۇلتتىق جينالىسىنىڭ توراعاسى ارارات ميرزويانمەن ەكىجاقتى كەزدەسۋ وتكىزدى. سونىڭ بارىسىندا ەلدەرىمىز اراسىنداعى ساۋدا-ەكونوميكالىق جانە مادەني-گۋمانيتارلىق قارىم-قاتىناستار پاندەمياعا قاراماستان قارقىندى دامىپ كەلە جاتقانى ايتىلدى.

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار