وڭىردەگى كوروناۆيرۋس ينفەكتسياسىن جۇقتىرۋشىلار كوپ تىركەلەتىن وشاقتىڭ ءبىرى – تەڭىز كەن ورنى. بىرنەشە مىڭ ادامنىڭ تۇراقتى جۇمىس ورنىنا اينالعان كەنىشتە ۆاكتسينالاۋ قالاي ءجۇرىپ جاتىر؟ وسى ساۋالعا جاۋاپ ىزدەگەندە, الدىمەن مەديتسينا قىزمەتكەرلەرىنىڭ دەنساۋلىعىن قورعاۋ ءۇشىن تاعى دا 210 «سپۋتنيك V» ۆاكتسيناسى جەتكىزىلگەنىن ايتۋعا بولادى.
– «تەڭىزشەۆرويلدىڭ» 90-نان استام قىزمەتكەرى ۆاكتسينا سالدىردى. قازىر «سپۋتنيك V» ۆاكتسيناسىن كومپانيا مەن مەردىگەر مەكەمەلەردىڭ بارلىق قىزمەتكەرى ءۇشىن ساتىپ الۋ مۇمكىندىگى قاراستىرىلىپ وتىر. وسىعان وراي «تەڭىزشەۆرويل» COVID-19 ينفەكتسياسىنىڭ ودان ءارى تارالاۋىنا جول بەرمەۋ ماقساتىندا ەرىكتى ۆاكتسينالاۋ باعدارلاماسى ءۇشىن ۆاكتسينالاردى ساتىپ الۋعا قاتىستى ۇكىمەت تاراپىنان قولداۋ كۇتەدى, – دەيدى «تەڭىزشەۆرويل» جشس-نا قاراستى مەديتسينالىق كلينيكانىڭ ديرەكتورى ابدۋللا يۋسۋپبەكوۆ. – باستى ماقسات – تەڭىزدەگى جۇمىسشىلار اراسىندا ۇجىمدىق يممۋنيتەتتى قالىپتاستىرۋ. ۆاكتسينالاۋ ارقىلى قاۋىپتى ۆيرۋستان قورعانا الامىز. سونىمەن بىرگە ەل ەكونوميكاسىنىڭ دامۋىنا ەلەۋلى ۇلەسىن قوسىپ وتىرعان كومپانيا جۇمىسىن سانيتارلىق-ەپيدەميالىق تالاپتارعا ساي جۇزەگە اسىرۋ ءۇشىن مەملەكەتتىك ورگانداردىڭ ۇسىنىستارىن قولدانىپ وتىرمىز, – دەيدى ا.يۋسۋپبەكوۆ.
كەن ورنىندا كوروناۆيرۋسقا قارسى ۆاكتسينا العانداردىڭ قاتارىندا ءورت جانە اپاتتى جويۋ قىزمەتىنىڭ مەديتسينالىق ۇيلەستىرۋشىسى رۋسلان جالعازين دا بار. ول ۇنەمى مەديتسينا جاڭالىقتارىنان حاباردار بولىپ وتىرادى.
– جالپى ۆاكتسينالار, سونىڭ ىشىندە «سپۋتنيك V» ەكپەسىنىڭ اسەرى تۋرالى كلينيكالىق زەرتتەۋلەردى ءجىتى قاداعالاپ ءجۇرمىن. سونداي زەرتتەۋلەردىڭ قورىتىندىسى كورسەتكەندەي, بۇل ۆاكتسينانىڭ جاناما اسەرى جوعىن ءبىلدىم. ۆاكتسيناسىز قاۋىپتى ۆيرۋستىڭ تارالۋىن تەجەۋ قيىن بولار ەدى. سوندىقتان اتالعان ۆاكتسينانىڭ ەكى كومپونەنتىن الدىم. قازىر ءوزىمدى جاقسى سەزىنۋدەمىن, – دەيدى ول.
اتىراۋ وبلىسى تاعى دا «قىزىل ايماقتىڭ» «قارماعىنا» ءىلىندى. بۇعان ناۋرىز مەرەكەسىندەگى دەمالىس كۇندەرىندە قاۋىپتى ۆيرۋسقا شالدىققاندار سانىنىڭ ارتۋى سەبەپ بولىپ وتىر. ماسەلەن, 26-27 ناۋرىزدا 174 ادام كوروناۆيرۋس ينفەكتسياسىن جۇقتىردى.
وبلىستىق سانيتارلىق-ەپيدەميالىق باقىلاۋ دەپارتامەنتىنىڭ مالىمەتىنشە, سوڭعى ءۇش تاۋلىكتە كوروناۆيرۋسقا شالدىققاندار سانى اتىراۋ قالاسى مەن تەڭىز كەنىشىندە كۇرت وسكەن. ماسەلەن, وبلىستىق سانيتارلىق-ەپيدەميالىق باقىلاۋ دەپارتامەنتى ءباسپاسوز قىزمەتىنىڭ اقپاراتىنا سۇيەنسەك, 26 ناۋرىزدا اتىراۋ قالاسىندا 40 ادام قاۋىپتى ۆيرۋس جۇقتىرىپ وتىر. ال تەڭىز كەنىشىندە – 41 جۇمىسشى, ماحامبەت اۋدانىندا – 5, جىلىويدا – 2, قىزىلقوعادا – 2, يساتايدا – 2, يندەر اۋدانىندا 1 ادام كوروناۆيرۋس ينفەكتسياسىنا شالدىققان. ونىڭ ىشىندە 35 ناۋقاستا Covid-19-دىڭ سيمپتومدى ءتۇرى انىقتالدى.
«سوڭعى مالىمەتكە سايكەس, بۇل تاۋلىكتە كوروناۆيرۋس ينفەكتسياسىنان 92 ادام ەمدەلىپ شىقتى. قازىر 170 ادام ءۇي جاعدايىندا ەمدەلۋدە. وبلىستىق ينفەكتسيالىق ستاتسيوناردا – 8, مودۋلدىك ستاتسيوناردا – 123, ال اۋداندارداعى ينفەكتسيالىق ستاتسيونارلاردا 24 پاتسيەنت وقشاۋلانعان. تەڭىز كەنىشىندەگى ينفەكتسيالىق ستاتسيوناردا 309 ادام ەم قابىلداپ جاتىر» دەپ حابارلادى دەپارتامەنتتىڭ ءباسپاسوز قىزمەتى.
مىنە, ءبىر تاۋلىكتىڭ دەرەگىنەن-اق مۇنايلى وڭىردە قاۋىپتى ۆيرۋستىڭ قاۋپى ءالى دە سەيىلمەي, كەرىسىنشە, قايتا ورىستەي باستاعانى اڭعارىلادى. بالكىم, بۇعان كارانتيندىك شەكتەۋ شارالارىنىڭ جەڭىلدەتىلگەنى كەرى اسەرىن تيگىزگەن سەكىلدى. وسىعان بايلانىستى وبلىستىڭ باس سانيتار دارىگەرى مادەنيەت تاناۋوۆ كارانتيندىك شەكتەۋ شارالارىن قايتا كۇشەيتەتىن جاڭا قاۋلىعا قول قويدى. ءسويتىپ, بۇگىن 29 ناۋرىزدا ساعات 00.00-دە كۇشىنە ەنەتىن جاڭا قاۋلىعا سايكەس, كوپشىلىك ءىس-شارالاردى, ونىڭ ىشىندە ۇيدە جانە جاپپاي ادامدار جينالاتىن وزگە دە ءىس-شارالاردى وتكىزۋگە تىيىم سالىنىپ وتىر.
اتىراۋ وبلىسى
