بەس كۇن ىشىندە كۋرسقا قاتىسۋشىلارعا باق-تا ەكولوگيالىق ماسەلەلەردى جاريا ەتۋ, ەكولوگيالىق ءبىلىم بەرۋ مەن تاربيەلەۋ, قالدىقتاردى كادەگە جاراتۋ جانە قورشاعان ورتانى قورعاۋ پروبلەمالارى بويىنشا وزەكتى تاقىرىپتار ءتۇسىندىرىلدى.
قاتىسۋشىلار ۋنيۆەرسيتەت كامپۋسى بويىنشا ەكوتۋرعا, زەرتحانالىق ساباقتارعا قاتىسۋعا, سونداي-اق بيومۇراجايعا, جاسىل تەحنولوگيالار ايماعىنا باردى.
كۋرستار 50-دەن استام باق («قازاقستان» رترك» اق, «قازاقپارات» حاا» اق, «Nur-Media» مەديا حولدينگى, ORDA.KZ اقپاراتتىق-تالدامالى پورتالى, ورت قازاقستان – ەۋرازيا جانە باسقالار) جانە ازاماتتىق سەكتور وكىلدەرىن قامتىدى. كۋرس سوڭىندا بارلىق قاتىسۋشىلارعا سەرتيفيكاتتار تابىستالدى.
ءىس-شاراعا قازاقستانداعى بۇۇ جاھاندىق كوممۋنيكاتسيالار دەپارتامەنتىنىڭ وكىلى - قازاقستانداعى بۇۇ اقپاراتتىق بيۋروسىنىڭ باسشىسى ۆلاستيميل سامەك, الماتىداعى يۋنەسكو كلاستەرلىك بيۋروسىنىڭ وكىلى سەرگەي كارپوۆ قاتىستى.
دارىسكەرلەر رەتىندە ساياسي عىلىمدارىنىڭ دوكتورى, ءال-فارابي اتىنداعى قازۇۋ ءباسپاسوز جانە ەلەكتروندى باق كافەدراسىنىڭ مەڭگەرۋشىسى, پروفەسسور گۇلميرا سۇلتانباەۆا, ءال-فارابي اتىنداعى قازۇۋ تۇراقتى دامۋ بويىنشا يۋنەسكو كافەدراسىنىڭ مەڭگەرۋشىسى, گەوگرافيا عىلىمدارىنىڭ كانديداتى, قاۋىمداستىرىلعان پروفەسسور تۇرسىنقۇل بازارباەۆا, ءال-فارابي اتىنداعى قازۇۋ ءباسپاسوز جانە ەلەكتروندى باق كافەدراسىنىڭ اعا وقىتۋشىسى لاريسا نودا, تاجىريبەشىل ەكولوگتار قاۋىمداستىعىنىڭ توراعاسى لاۋرا ماليكوۆا جانە باسقالار ءسوز سويلەدى.
ەستەرىڭىزگە سالا كەتەيىك, 2020 جىلى قر اقپارات جانە قوعامدىق دامۋ مينيسترلىگى, ءال-فارابي اتىنداعى قازاق ۇلتتىق ۋنيۆەرسيتەتى جانە قر ەكولوگيا, گەولوگيا جانە تابيعي رەسۋرستار مينيسترلىگى اراسىندا ءوزارا تۇسىنىستىك پەن ىنتىماقتاستىق تۋرالى مەموراندۋم جاسالدى. مەموراندۋمنىڭ نەگىزگى ماقساتى ەكولوگيا سالاسىندا ماماندانعان سالالىق جۋرناليستەردى دايارلاۋ.
