قادىرلى وتانداستار!
بارشاڭىزدى شۋاقتى كوكتەم مەرەكەسى, كۇللى تۇركى جۇرتىنىڭ ءتول مەيرامى, جىل باسىمىز – ءاز-ناۋرىزبەن شىن جۇرەكتەن قۇتتىقتايمىن!
ىزگىلىك پەن بىرلىككە باستايتىن مەرەكەدە سىزدەرگە اللانىڭ اماندىعىن, وتباسى باقىتىن, جاننىڭ ساۋلىعىن تىلەيمىن. ۇلىس وڭ بولسىن, اق مول بولسىن!
وسىناۋ ۇلتتىق مەيرامدا اق داستارحان باسىندا ۇلكەندەر باتاسىن بەرىپ, ءبىرىن-ءبىرى كوپتەن كورمەگەن تۋىستار مارە-سارە بولىپ, ال رەنجىسكەندەر كەشىرىم جولىن ۇستانىپ, ىزگىلىكتى ىستەرىمەن ۇرپاققا ونەگە كورسەتەدى.
بۇل كۇندە قورشاعان ورتانى تازالاۋ, اعاش ەگۋ, بۇلاقتىڭ كوزىن اشۋ سىندى ساۋاپتى ءھام سالاۋاتتى امالدار جۇزەگە اسادى. مۇنداي ونەگەلى ىسكە وسكەلەڭ جاس ۇرپاقتى ارالاستىرۋدىڭ ماڭىزى ەرەكشە.
ناۋرىز – بارشا ادامزاتتى بىرلىككە, يگىلىككە, مەيىرىمدىلىككە ۇندەيتىن مەرەكە. قاراۋسىز قالعان قارتتارعا قامقورلىق جاساپ, ناۋقاس جانداردىڭ جاعدايىن سۇراپ, ولارعا مەرەكەلىك كوڭىل-كۇي سىيلاۋ – ساۋاپتى ءىس.
سونىمەن قاتار اعايىن اراسىندا, قوعام ىشىندە كومەككە مۇقتاج ازاماتتارعا قول ۇشىن بەرۋگە اسىعايىق. بۇل – تاعىلىم مەن تاربيەگە تولى ناۋرىز مەرەكەسىن ناسيحاتتاۋدىڭ ۇلكەن مۇمكىندىگى.
ەلىمىزدەگى پاندەميالىق جاعداي قوعامدىق ءىس-شارالارعا ۋاقىتشا شەكتەۋ قويعانىمەن, ساۋاپ الۋعا ۇمتىلعان جاندار ءۇشىن جاقسى ىستەردىڭ ەسىگى ارقاشان اشىق.
الىستاعى اعايىندى مەرەكەمەن قۇتتىقتاپ, الەۋمەتتىك جاعدايى تومەن تۋىسقاندارعا سىندارلى ساتتە مۇمكىندىگىنشە ماتەريالدىق تۇرعىدان قولداۋ كورسەتكەنىمىز ابزال. ويتكەنى ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ساۋاپتى ءىستى ءوز وتباسىمىزدان, اينالاداعى اعايىن-تۋىستان باستاۋدى ۇيرەتكەن.
ارداقتى اعايىن!
باۋىرمالدىق پەن تاتۋلىققا ۇندەيتىن وسىناۋ شۋاقتى مەرەكەدە ءار وتباسىعا باقىت پەن بىرلىك, تاتۋلىق پەن بار جاقسىلىقتى تىلەيمىن.
مەرەكەدە ايتىلعان باتا-تىلەك, ءاربىر جاقسى ءسوزىمىز بەن دۇعامىز قابىل بولعاي. اللا تاعالا حالقىمىزعا اماندىق, جۇرتىمىزعا تىنىشتىق ءناسىپ ەتىپ, ءار شاڭىراقتىڭ بەرەكەسى مەن ىرزىق-نەسىبەسىن ارتتىرعاي.
ۇلىس وڭ بولسىن, اق مول بولسىن! ءامين!
