بارلىعى مەريليننىڭ بالعىن قىلىعىنا تاڭ قالۋدان باستالدى. ونىڭ ىزگى ءىلتيپاتى, نارەستە ءمولدىر سەزىمى اينالاسىن نۇرلاندىرىپ تۇراتىن. شاڭ جۇقپايتىن شىرايى عانا ەمەس, بۇلالىعى كەتپەگەن بالا مىنەزى, سىلقىم دا سىرلى ءسابي ويى, وزىنە عانا جاراساتىن انتەك ارەكەتى, التىن جالاتىلعان اققۇبا اجارى XX عاسىردىڭ جارىق جۇلدىزىنا اينالدىردى.
زەر سالساڭىز, ونىڭ بويىندا تەڭىزدەي تاكاپپار مولدىرلىك بار. ونسىز سۇلۋلىقتىڭ تاسادا قالاتىنى ايان. ال سۇلۋلىقسىز كوركەمونەردىڭ كورىنىس بەرۋى نەعايبىل. سىزگە, ونىڭ ءومىربايانى ەكرانداعىداي قىزىل دا جاسىل لەنتالى كورىنۋى مۇمكىن. سۇڭعاق دەنەسىن قىمبات بۇيىمدارمەن قىمتاعان ءارتىستىڭ ءومىرىن ەرتەگىگە جورۋشىلار دا تابىلادى. بىراق اقزەر ارۋدىڭ تالايلى تاعدىرىنىڭ سوڭىنان ەرىپ, ۇلى جالعىزدىقتىڭ قۇشاعىندا كۇن كەشكەنىن ءبىرى بىلسە, ءبىرى بىلمەيدى. جالعىزدىڭ جان-مۇڭىنا ەشكىم ۇڭىلگەن جوق. بالكىم, جەتىم قىزدى جىگەرلەندىرگەن دە سول ءۇمىتسىز شاقتاردىڭ ءالديى بولار.
شىن ەسىمى – نورما دجان بەيكەر. كينوستۋديادا رەداكتور بولىپ جۇمىس ىستەيتىن اناسى تانىمال اكتريسا نورما تالمەدجدىڭ قۇرمەتىنە سولاي اتاعان. ال تۋعان اكەسى جايلى الىپقاشپا اقپار كوپ. كوپ بولعانىمەن, نورما ونىمەن كوزى تىرىسىندە جولىققان ەمەس. اناسى پسيحيكالىق اۋرۋعا شالدىققاننان كەيىن, قارشاداي قىزدىڭ تاعدىرىن قارابۇلت باستى. قامقورلىعىنا العان قانشاما ادامنىڭ قاباعىنا جاۋتاڭداۋمەن كۇن كەشتى. اقىرى, مۇقتاجدىقتان مەزى بولعان 16 جاستاعى بويجەتكەن راديوپلان اسكەري اۆياتسيا زاۋىتىنىڭ قىزمەتكەرى دجەيمس دوگەرتيگە تۇرمىسقا شىعادى. ءوزى دە جولداسىنىڭ قاسىنا جۇمىسقا تۇرادى. البىرت سەزىمىنىڭ شىرماۋىنا ورالعان ەكى جاستىڭ نەكەسى ءساتسىز اياقتالعانىمەن, بويجەتكەن ونەردەگى باعىن سول ماڭنان تاپقانداي. ديسپروپورتسيا.
اۆياتسيا زاۋىتىن سۋرەتكە تۇسىرۋگە كەلگەن امەريكالىق فوتوگراف دەۆيد كونوۆەر قارا جۇمىسقا جەگىلگەن جاس ارۋدى بايقاپ قالادى. سول ساتتە سىمباتتى كەلىنشەكتى وبەكتيۆكە قاعىپ الىپ, عاجايىپ فوتولاردى مودەلدىك اگەنتتىكتەرگە جىبەرەدى. بۇل ەلەۋسىز نورمانىڭ ەل سۇيىنگەن مەريلينگە قاراي باسقان تۇڭعىش قادامى ەدى. تۇرمىستىڭ تاۋقىمەتىن كوپ كورگەن ول زاۋىتتان شىعىپ, ساعاتىنا 5 دوللارعا سۋرەتكە تۇسۋگە كەلىسەدى. وسىلايشا مودەلدىك مانسابى باستالادى.
ايتپاقشى, ارتىنان جولداسى اشىق سۋرەتىن كورىپ, وكپەلەي: «فوتوگرافتىڭ ايتقانىنا ءۇنسىز كەلىسە بەردىڭ بە؟» دەپ سۇراعاندا, بولاشاق ءارتىس ساسپاستان: ء«ۇنسىز كەلىسپەدىم, قاسىمىزدا راديو ويناپ تۇرعان بولاتىن» دەپ جاۋاپ بەرەدى. عۇمىربويى بالالىعىن جوعالتپاعان ارۋدىڭ تاۋىپ ايتاتىن ادەتى بولعان. «تۇندە كيەتىن جالعىزىم – №5 Chanel تامشىسى» دەگەن ءسوزىنىڭ استارىندا دا ۇلكەن ءمان جاتقانداي. ەگەر ءسىز ءارتىستى ساعىنساڭىز, سول ءاتىردى ۇستىڭىزگە سەبىڭىز. ويتكەنى ودان ءالى سۇلۋلىق پاتشايىمىنىڭ جۇپارى اڭقيدى.
مودەلدىك جانە اكتەرلىك اگەنتتەردىڭ نۇسقاۋىمەن اتىن مەريلين مونروعا اۋىستىرادى. بۇل اتاۋدى ءوزى تاڭدايدى. مۇنداعى «مەريلين» – برودۆەي جۇلدىزىنىڭ ەسىمى بولسا, «مونرو» – اناسىنىڭ تەگى. امەريكانىڭ ءاربىر كوشەسىندە ونىڭ ايدىك سۋرەتتەرى ءىلىنىپ تۇردى. اتاقتى «Playboy» جۋرنالى باستاعان 33 جىلتىر باسىلىمداردىڭ مۇقاباسىنا شىقتى. بالا ارمانىن اقيقاتقا اينالدىرۋ ءۇشىن ايانباي ەڭبەك ەتتى. كينو سالاسىندا باعىن سىناپ, وزىندىك قولتاڭباسىن قالدىردى.
قولتاڭبا دەمەكشى, ايگىلى ءارتىستىڭ كينوداعى جەتىستىگى كول-كوسىر. ول سومداعان رولدەردىڭ ارقايسىسى رەجيسسەردىڭ ءھام ءفيلمنىڭ بەدەلىن ارتتىرىپ, ميلليونداعان تابىس اكەلدى. داڭقتى كينوستۋديالارمەن كەلىسىمشارت جاساسىپ, 20-دان استام فيلمگە ءتۇستى. كوبىنەسە باقىتىن دۇنيەدەن ىزدەگەن اقىماق قىزدىڭ وبرازىندا وينادى. «نياگارا», «دجەنتلمەندەر اققۇبالاردى ارتىق كورەدى», «دجازدا تەك قىزدار بار» فيلمدەرى ارقىلى الەمدى مويىنداتتى. ول ول ما, «دجازدا تەك قىزدار بار» فيلمدەگى باستى ءرولى ءۇشىن «التىن گلوبۋسقا» يە بولدى.
تاريحقا ءوزىنىڭ اتىمەن كومپانيا اشقان تۇڭعىش ايەل پروديۋسەر رەتىندە ەندى. ءسويتىپ, ەكىنشى رەت بەيسبولشى دجو ديمادجيومەن وتاۋ قۇردى. بىراق قارىم-قاتىناستارى ۇزاققا سوزىلمادى. ايتكەنمەن سپورتشى ايگىلى ءارتىستى شىن ءسۇيدى, ونەرىن باعالاي ءبىلدى. ول دۇنيەدەن وزعاندا ۋادە ەتكەندەي جەرلەۋىنە اتسالىسىپ, جيىرما جىل بويى ءار سەنبىدە قابىرىنە التى تال راۋشان گ ۇلىن اكەلىپ تۇردى.
مونرو ونەرگە جايدان جاي كەلە سالعان جوق. ءبىلىمىنىڭ ازدىعىنا ۇيالىپ, ۇنەمى ءوزىن-ءوزى دامىتۋمەن بولدى. كوپشىلىكتىڭ كوزىنشە التىن مەن بريلليانتقا اپتالعانىمەن, ونىڭ ءبارى پروديۋسەرلەردىڭ كوزبوياۋشىلىعىنان تۋعان يدەيا عانا. نەگىزىندە ول زەرگەرلىك جاۋھارلارعا اسا قىزىقپاعان, اقشاسىنىڭ باسىم بولىگىن كىتاپقا جۇمساعان. «ارا-تۇرا كىتاپ دۇكەنىنە بارامىن, نە بار ەكەنىنە كوز جۇگىرتەمىن. ءبىر جەردە مەنى قىزىقتىراتىن ءبىر-ەكى سويلەم وقىپ قالسام, ساتىپ الامىن», دەيدى ءوز ەستەلىگىندە. وعان دالەل, «باقىتتى ماحاببات» فيلمىنە ءتۇسۋ بارىسىندا ءرولدى اشۋ ءۇشىن توماس ۆۋلف, مارسەل پرۋست, زيگمۋند فرەيدتىڭ شىعارمالارىن وقىعان. ءدال سول كەزدە «اعايىندى كارامازوۆتار» كىتابىنىڭ العاشقى باسىلىمى الدىمەن مونرونىڭ قولىنا تۇسكەن ەكەن. ءتىپتى وقىعان تۋىندىلارىن دوستارىمەن تالقىلاعاندى ۇناتقان.
بىرەۋلەر مەريلين ءوزىن جاي عانا زيالى ادام رەتىندە كورسەتكەن دەۋى عاجاپ ەمەس. الايدا ايگىلى ءارتىس اڭگىمە ايتقاندا ءوزى وقىعان رومانداردان ءۇزىندى كەلتىرىپ وتىرعان. اسىرەسە يۆان تۋرگەنەۆ پەن لەونيد اندرەەۆتىڭ اڭگىمەلەرىن, لەۆ تولستويدىڭ روماندارىن, الەكساندر پۋشكيننىڭ پوەزياسىن جانە انتون چەحوۆتىڭ پەسالارىن ءسۇيىپ وقىعان. ونىڭ سورەلەرىنەن وسكار ۋايلد, بەرنارد شوۋ باستاعان الەم كلاسسيكتەرىنىڭ تۋىندىلارىن تابا الاسىز. مەريلين دۇنيەدەن وزعاندا جەكە كىتاپحاناسىندا 400-دەن استام كىتاپ بولعان. سىرت كوزگە اڭعال ءھام اشىق ارۋعا ۇقساعانىمەن ونىڭ IQ دەڭگەيى 168 باللدى قۇرايدى. عىلىمعا جاڭالىق اكەلگەن اتاقتى البەرت ەينشتەيننىڭ اقىلدىلىعى 163 باللعا باعالانعانىن ويلاساق, سۇلۋدىڭ ءوزىن-ءوزى تاربيەلەۋگە كوپ ۋاقىت بولگەنىن اڭعارامىز.
كىتاپقا قۇمارلىعىنان بولار, امەريكالىق دراماتۋرگ ارتۋر ميللەرمەن دە شاڭىراق قۇرادى. مەريلين كۇيەۋىنىڭ ءدىنى ءيۋدايزمدى قابىلدايدى. جازۋشى سۇيىكتىسىنە ارناپ پەسا جازعان. ەرلى-زايىپتىلار اتا-انا بولۋدى ويلاعانىمەن, ايگىلى ارتىسكە انا بولۋ باقىتى بۇيىرمايدى. بۇل – مەريليننىڭ ەڭ ۋىتتى وكىنىشىنىڭ ءبىرى.
سۇلۋلىق پاتشايىمىنىڭ اقش-تىڭ 45-ءنشى پرەزيدەنتى دجون كەننەديمەن جاسىرىن رومانى تۋرالى قاۋەسەت تە تارادى. ءتىپتى جانكۇيەرلەرى ولىمىنە سونى كىنالايدى. ءومىرىنىڭ سوڭعى مينۋتتارىندا اق ءۇيدىڭ باسشىسىنا حابارلاسقانى ايتىلىپ تا ءجۇر. سول زاماندا اقزەر ارۋدىڭ سۇلۋلىعىنا تابىنعاندار كوپ بولعان. ۇيىنە كۇن سايىن 5 مىڭ حات كەلەدى ەكەن. ونىڭ اراسىندا پرەزيدەنتتىڭ ىنىسىنىكى دە بار.
ايگىلى ءارتىس اقىماق قىزدىڭ رولىنە بەرىلگەندىگى سونشالىق, شىنايى ومىردە دە سول وبرازىنان شىعا المادى. 36 جاسىندا ءوز ەركىمەن ماڭگى سۇلۋ دا ءمىنسىز قالپىندا كوز جۇمدى. ءوزى ايتقانداي, مانساپتىڭ ەڭ بيىك مىنبەرىنە شىقتى, بىراق اتاق پەن ابىروي ونى سۋىق تۇندە جىلىتا المادى. قوشتاسۋ راسىمىندە تابىتتا كوك ءتۇستى «Pucci» كويلەگىن كيگەن ءوڭى تايعان ءارتىس جاتتى. «ايەلدە تەك ەكى قارۋ بار: تۋش جانە كوز جاسى» دەپ تۇسىنگەن مەريلين مونروعا تۋش تا, كوز جاسى دا كومەكتەسپەدى. داۋىردەن داڭقتى ارۋ وسىلاي كوشتى.
