ايتۋلى جيىنعا مۇرىندىق بولعان «Sultan MAGAZINE» رەسپۋبليكالىق قوعامدىق-ساياسي, اقپاراتتىق-تانىمدىق جۋرنالى.
كورمەنىڭ سالتاناتتى اشىلۋ راسىمىندە بەتاشار ءسوزدى دەنساۋلىق ساقتاۋ ءمينيسترى الەكسەي تسوي الدى.
«بۇگىنگى كورمە مەن «باتىرلار ءوز ورتامىزدا» اتتى كىتاپتىڭ تۇساۋكەسەرىن تاۋەلسىزدىكتىڭ 30 جىلدىعىنا ورايلاستىرۋ – وتە جاقسى يدەيا. سەبەبى قينالعاندا كومەك سۇراپ, اۋىرعاندا شيپا ىزدەپ الدىنا بارعان كەز كەلگەن ناۋقاسقا قولداۋ كورسەتەتىن, ومىرلەرىنە قاۋىپ تونگەن ساتتە اراشا ءتۇسىپ, ءتىپتى كەيدە ەكىنشى رەت ءومىر سىيلاپ جاتاتىن دارىگەرلەرىمىزگە قانداي قۇرمەت كورسەتسەك تە لايىق», دەدى ا.تسوي.
ودان كەيىن ءسوز العان كورەي رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كۋ حونگ سوك پەن پارلامەنت ءماجىلىسىنىڭ دەپۋتاتى, «اقجول» دەموكراتيالىق پارتياسىنىڭ جەتەكشىسى ازات پەرۋاشەۆ مەديتسينا قىزمەتكەرلەرىنىڭ جاعدايىن جاساپ, ولاردىڭ ەڭبەگىن باعالاۋدىڭ ەرەكشە ماڭىزعا يە ەكەندىگىن اتاپ ءوتتى.
ىزگى لەبىزدەردەن كەيىن تاۋەلسىزدىگىمىزدىڭ 30 جىلدىعىنا ارنالعان «باتىرلار ءوز ورتامىزدا» كىتابىنىڭ لەنتاسى قيىلدى. اتالمىش كورمەگە «live» فورماتتاعى 200-دەن اسا فوتوسۋرەتتەر ۇسىنىلدى. ەكسپوزياتسيالانعان ءار سۋرەتتەن مەديتسينا ماماندارىنىڭ مەيىرىمدى كوزقاراسى مەن تىنىمسىز ەڭبەگىنىڭ انىق بەينەسىن كورۋگە بولادى.
