پارلامەنت • 01 ناۋرىز، 2021

ماۋلەن اشىمباەۆ: قوعامدا العىس ايتۋ كۇنى بۇقارالىق سيپاتقا يە بولىپ كەلەدى

9 رەت كورسەتىلدى

پارلامەنت سەناتىنىڭ توراعاسى ماۋلەن اشىمباەۆ قازاقستاندىقتاردى العىس ايتۋ كۇنىمەن قۇتتىقتادى، دەپ حابارلايدى Egemen.kz.

«بۇگىن ەلىمىزدە العىس ايتۋ كۇنى اتالىپ وتۋدە. سوعان سايكەس ازاماتتارىمىز ءبىر-بىرىنە العىس ايتىپ، ريزاشىلىقتارىن جەتكىزىپ جاتىر. سونداي-اق، قيىن-قىستاۋ جىلداردا ءبىزدىڭ جەرىمىزگە قونىس اۋدارىلعان ءتۇرلى ەتنوس وكىلدەرىنىڭ بۇگىنگى ۇرپاقتارى قازاق حالقىنا جانە قازىرگى تاڭدا وزدەرىنىڭ دە قاستەرلى وتانىنا اينالعان قازاق ەلىنە العىس بىلدىرۋدە. بۇل – ادامگەرشىلىكتىڭ، ادىلەتتىلىكتىڭ جانە جاسامپازدىقتىڭ جارقىن كورىنىسى.

ەلباسىمىزدىڭ باستاماسىمەن كۇنتىزبەمىزگە قوسىلعان مەرەكە تاتۋلىق پەن تۇراقتىلىقتى، كەلىسىم مەن دوستىقتى جانە بىرلىك پەن بەرەكەنى دارىپتەيدى. مۇنىڭ ءبارى قازىرگىدەي كۇردەلى كەزەڭدە اسا ماڭىزدى قۇندىلىقتار ەكەنى انىق. سوندىقتان بۇل كۇن مەملەكەت باسشىسىنىڭ دا باستى نازارىندا ەكەنىن ايتا كەتكەن ءجون.

جىل وتكەن سايىن قوعامدا العىس ايتۋ كۇنى بۇقارالىق سيپاتقا يە بولىپ كەلەدى. وعان 1 ناۋرىزدا ۇلتتى ۇيىستىراتىن ءىس-شارالاردىڭ كوپتەپ ۇيىمداستىرىلۋى ايقىن دالەل. الداعى ۋاقىتتا وسى ءۇردىس لايىقتى جالعاسىن تاۋىپ، بۇل مەيرام حالقىمىزدىڭ ىرىس-ىنتىماعىن ارتتىرۋعا ءوز سەپتىگىن تيگىزە بەرەدى دەپ سەنەمىز.

وسى مۇمكىندىكتى پايدالانا وتىرىپ، بارشاڭىزعا ايرىقشا العىسىمدى بىلدىرەمىن. قاشاندا جۇدىرىقتاي جۇمىلىپ، ءبىر-بىرىمىزگە قولداۋ كورسەتىپ، ەلدىك مۇددە جولىندا ەسەلى ەڭبەك ەتە بەرەيىك. ءار شاڭىراققا شاتتىق پەن باق-بەرەكە تىلەيمىن. ەلىمىز امان، جۇرتىمىز تىنىش بولسىن.

تاۋەلسىز قازاق ەلى ماڭگى جاساي بەرسىن!» دەلىنگەن قۇتتىقتاۋدا.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار