ايماقتار • 24 اقپان، 2021

مۇرات ايتەنوۆ: شىمكەنتتىڭ ءار ەكىنشى تۇرعىنى تاۋەلسىزدىك تۋماسى

11 رەت كورسەتىلدى

بۇگىن قالا اكىمى مۇرات ايتەنوۆ تىكەلەي ەفير ارقىلى وتكەن ەسەپتى كەزدەسۋدە بيىل قازاقستاننىڭ تاۋەلسىزدىگىنە 30 جىل تولىپ وتىرعانىن ايتىپ، وسى ۋاقىت ىشىندە ەلىمىز، ونىڭ ىشىندە شىمكەنت قالاسى كوپتەگەن جەتىستىككە قول جەتكىزگەنىنە توقتالىپ ءوتتى.

«2021 جىل – تاۋەلسىزدىكتىڭ 30 جىلدىعى. وتكەنگە وي سالىپ، بۇگىنىمىزدى باعالاپ، كەلەشەككە جوسپار قۇراتىن ماڭىزدى جىل. ەلباسى نۇرسۇلتان ءابىش ۇلى نازارباەۆتىڭ تاۋەلسىزدىككە قول جەتكىزىپ، مىقتى مەملەكەت قالىپتاستىرۋداعى ءرولىن اتاپ وتۋگە ءتيىسپىز. وتىز جىلدا قازاقستان ءبىر عاسىرعا بەرگىسىن وزگەرىستى باستان وتكەردى. ماسەلەسەن، شىمكەنتتىڭ ءوزىن الار بولساق، قالا حالقى 90-شى جىلدارى 400 مىڭنان استام بولسا،  قازىرگى تاڭدا ءبىر ميلليوننان اسىپ وتىر. ياعني، شىمكەنتتىڭ ءار ەكىنشى تۇرعىنى تاۋەلسىزدىك تۋماسى»،-دەدى اكىم. 

اكىمنىڭ بايانداماسىندا ايتىلعانداي شىمكەنت قالاسىندا وتىز جىل بۇرىن 69 مىڭ وقۋشىسى مەن 72 مەكتەپ بار بولعان بولسا، قازىر 223 مىڭ وقۋشى وقيتىن 178 مەكتەپ بار ەكەن. ال، قالا بيۋدجەتى 1991 جىلى 1 ملرد تەڭگە بولاتىن، كۇنى بۇگىنگە 463 ملرد تەڭگەنى قۇراپ وتىر. ءومىر ءسۇرۋ ۇزاقتىعى ون جىلعا ءوستى. 1991-ءشى جىلدارى ورتاشا جاس 63،9 بولسا، قازىر 74،4 جاس. سونىمەن قاتار، قالانىڭ جولدارى 3،6 ەسەگە ۇلعايىپ، 3060 شاقىرىمعا جەتتى. 

ەندىگى جەردە تاۋەلسىزدىگىمىزدىڭ تۇعىرلى، مەملەكەتتىگىمىزدىڭ ماڭگىلىك بولۋى ارقايسىمىزعا بايلانىستى.

 

فوتو: بەرەكە سەيىتجاپپار

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار