فوتو: اقوردا
ۇكىمەت نەگىزگى كورسەتكىشتەرگە قول جەتكىزۋ تۋرالى ەسەپ بەردى. سونداي-اق بىرقاتار سالالىق مەملەكەتتىك ورگان جەتەكشىلەرى باستى باعىتتار بويىنشا بايانداما جاسادى.
مەملەكەت باسشىسى گەوساياسي احۋالدى ەسكەرە وتىرىپ, قوعامدىق, ەكونوميكالىق, ەكولوگيالىق, سۋ جانە ازىق-ت ۇلىك قاۋىپسىزدىگى ماسەلەلەرىن پىسىقتاۋ قاجەتتىگىنە نازار اۋداردى.
بۇدان بولەك, وتىرىستا قازاقستان رەسپۋبليكاسىنىڭ 2026-2030 جىلدارعا ارنالعان ۇلتتىق قاۋىپسىزدىك ستراتەگياسىنىڭ جوباسى قارالدى.
مەملەكەتتىك جوسپارلاۋ جۇيەسىنىڭ ماڭىزدى قۇرامداس بولىگى سانالاتىن بۇل ستراتەگيا الداعى بەس جىلدا بولۋى ىقتيمال سىن-قاتەرلەرگە توتەپ بەرۋدىڭ نەگىزگى تاسىلدەرىن انىقتايدى.
جيىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ورتا مەرزىمگە ارنالعان باسىمدىقتار, ماقساتتى ينديكاتورلار مەن ستراتەگيالىق تاۋەكەلدەردى باسقارۋ مەحانيزمدەرى جونىندە باياندادى.
قاسىم-جومارت توقاەۆتىڭ ايتۋىنشا, جاڭا كونستيتۋتسيانى قابىلداۋ ارقىلى مەملەكەت دامۋىنداعى جاڭا كەزەڭگە قادام باسىپ, قازاقستاننىڭ تاۋەلسىزدىگىن, ەگەمەندىگى مەن اۋماقتىق تۇتاستىعىن سەنىمدى تۇردە قورعاۋعا مۇمكىندىك تۋدى.
ال اتالعان ستراتەگيا كونستيتۋتسيالىق قاعيداتتاردىڭ مۇلتىكسىز ساقتالۋىن قامتاماسىز ەتىپ, ەلىمىزدىڭ تۇراقتى ءارى قارقىندى دامۋىنا جاعداي جاسايدى.
مەملەكەت باسشىسى ۇلتتىق مۇددەنى قورعاۋ مىندەتتەرىن ساپالى ورىنداۋدىڭ ماڭىزىنا باسا ءمان بەردى. ونىڭ قاتارىنا, اتاپ ايتقاندا, قورعانىس قابىلەتىن قامتاماسىز ەتۋ; ازاماتتاردى, قورشاعان ورتانى جانە اقپاراتتىق كەڭىستىكتى قورعاۋ دەڭگەيىن ارتتىرۋ; كيبەرقاۋىپسىزدىك شارالارىن كۇشەيتۋ جانە الەۋمەتتىك-ەكونوميكالىق سالاداعى تاۋەكەلدەردى ازايتۋ ماسەلەلەرى كىرەدى.
سونىمەن قاتار قاسىم-جومارت توقاەۆ ەكونوميكا, ءبىلىم مەن تەحنولوگيا سالالارىندا سۇرانىسقا يە بىلىكتى شەتەلدىك مامانداردى تارتۋعا قولايلى جاعداي جاسايتىن باعدارلامانى جەدەلدەتىپ ازىرلەۋدى تاپسىردى.
ەسكە سالا كەتەيىك, بۇعان دەيىن مەملەكەت باسشىسىنىڭ وكىمىمەن باۋىرجان شۇباي ۇلى ارتىقوۆ «باتىس» وڭىرلىك قولباسشىلىعى اسكەرلەرىنىڭ قولباسشىسى لاۋازىمىنان بوساتىلعانىن جازعان ەدىك.
