ەڭبەك نارىعى وڭالىپ كەلەدى

قوعام • 23 اقپان، 2021

ەڭبەك نارىعى وڭالىپ كەلەدى

4 رەت كورسەتىلدى

«ەڭبەك رەسۋرستارىن دامىتۋ ورتالىعى» اق دەرەكتەرى بويىنشا، 2020 جىلدىڭ سوڭىندا جۇمىسپەن قامتۋ ورتالىقتارىندا تىركەلگەن جۇمىسسىزدار سانى جۇمىس كۇشى سانىنىڭ 1،5%-ىن، ياعني 141،8 مىڭ ادامدى قۇرادى.

دۋمان اناش

تىركەلگەن جۇمىسسىزدىقتىڭ ەڭ جوعارى دەڭگەيى باتىس قازاقستان (4%)، اتىراۋ (3،3%) جانە قىزىلوردا (2،9%) وبلىستارىندا بايقالادى. بۇل رەتتە 2021 جىلدىڭ باسىنداعى جالپى جۇمىسسىزدىق كورسەتكىشى 4،9%-دى قۇرادى، بۇل 2020 جىلعى 3-توقسانمەن سالىستىرعاندا 0،1 پايىزدىق تارماققا تومەن. جالپى جانە تىركەلگەن جۇمىسسىزدىق اراسىنداعى ايىرماشىلىق ولاردى ەسەپكە الۋ ادىسناماسىمەن تۇسىندىرىلەدى، بارلىق جۇمىسسىز جۇمىسپەن قامتۋ ورتالىقتارىندا تىركەلگىسى كەلمەيدى، ءوز بەتىنشە جۇمىس ىزدەۋدى قالايدى.

«وتكەن توقسانمەن سالىستىرعاندا، 2020 جىلعى 4-توقساندا جۇمىسسىزدار سانى 453 مىڭ ادامعا دەيىن – 1،8 مىڭعا تومەندەدى، الايدا 2019 جىلدىڭ وسى كەزەڭىمەن سالىستىرعاندا جۇمىسسىزدار سانى 11،6 مىڭعا جوعارى. بۇل رەتتە جاستار اراسىنداعى جۇمىسسىزدىقتىڭ 2019 جىلعى 4-توقسانداعى 81،1 مىڭ ادامنان وتكەن جىلدىڭ سوڭىندا 76،6 مىڭعا دەيىن قىسقارعانىن اتاپ وتۋگە بولادى»، دەدى ەردو ستراتەگيا جانە جوبالىق باسقارۋ دەپارتامەنتىنىڭ ديرەكتورى الەكساندرا مولچانوۆسكايا.

ول سونداي-اق قازاقستانداعى ەپيدەميالىق جاعدايدىڭ جاقسارۋى جانە ەكونوميكالىق بەلسەندىلىكتىڭ قالپىنا كەلۋى ادامداردى بۇرىنعى جۇمىس رەجىمىنە بىرتىندەپ قايتارۋ ەسەبىنەن بەلسەندى جۇمىسپەن قامتىلماعان ادامدار سانىنىڭ قىسقارۋىنا ىقپال ەتكەنىن اتاپ ءوتتى. وسىلايشا، ۋاقىتشا جۇمىسپەن قامتىلماعانداردىڭ سانى (كاسىپورىننىڭ قىزمەتىن توقتاتا تۇرۋ نەمەسە جۇمىس بەرۋشىنىڭ باستاماسى بويىنشا جۇمىس ىستەمەگەن ادامدار) 147 مىڭ ادامعا دەيىن قىسقاردى، 2020 جىلعى 2-توقساندا 536 مىڭ ادام بولدى. الايدا 2019 جىلدىڭ سوڭىنداعى جاعدايمەن سالىستىرعاندا، 2020 جىلدىڭ 4-توقسانىندا بۇل سانات 48 مىڭ ادامعا كوپ.

ەردو مالىمەتتەرى بويىنشا، بەلسەندى جۇمىسپەن قامتۋعا قاتىسۋشىلار سانىنىڭ ارتقانى بايقالادى: 2020 جىلعى 4-توقساندا جۇمىسپەن قامتىلعانداردىڭ سانى 3-توقسانمەن سالىستىرعاندا 0،4%-عا (31،3 مىڭ ادام) ءوسىپ، 8،75 ملن ادامدى قۇرادى. 4-توقساندا جالدامالى جۇمىسكەرلەردىڭ سانى 0،3%-عا (676 مىڭ)، ءوزىن-ءوزى جۇمىسپەن قامتىعانداردىڭ سانى 0،4%-عا (2،1 ملن) ۇلعايدى.

وتكەن جىلدىڭ سوڭىنداعى دەرەكتەر بويىنشا، ەكونوميكالىق قىزمەت تۇرلەرى بولىنىسىندە جۇمىسپەن قامتىلعانداردىڭ 54،9%-ى (4،8 ملن) ساۋدا، اۋىل شارۋاشىلىعى، ءبىلىم بەرۋ جانە ونەركاسىپ سالالارىندا ەڭبەك ەتەدى. بۇل رەتتە 2019 جىلدىڭ سوڭىنداعى دەرەكتەرمەن سالىستىرعاندا، جۇمىسپەن قامتۋدىڭ ەڭ كوپ قىسقارۋى تۇرۋ جانە تاماقتانۋ بويىنشا قىزمەتتەر (-12،1%)، ونەر جانە ويىن-ساۋىق (-5،8%)، كولىك جانە قويمالاۋ (-3،7%)، اكىمشىلىك جانە قوسالقى قىزمەت كورسەتۋ (-3،1%)، كاسىبي جانە عىلىمي قىزمەت (-3%) سياقتى سەكتورلاردا بايقالادى. بۇل رەتتە ءبىر جىلدىق كەزەڭدە دە، توقسان ىشىندە دە 2020 جىلدىڭ سوڭىندا جىلجىمايتىن م ۇلىك (+9،2%)، باسقا دا جەكە قىزمەتتەر (+6،8%)، قارجى جانە ساقتاندىرۋ (+3،9%) جانە دەنساۋلىق ساقتاۋ (+3،8%) وپەراتسيالارىمەن بايلانىستى سالالاردا جۇمىسپەن قامتىلعاندار سانىنىڭ ءوسۋى بايقالادى.

«جوعارىدا اتالعان سالالاردا جۇمىسپەن قامتۋدىڭ تومەندەۋى شەكتەۋ شارالارىنىڭ اياسىندا كۇتىلۋدە. بۇل سالالار ەڭ كوپ زارداپ شەكتى، ەندى بىرتىندەپ قالپىنا كەلتىرۋ جالعاسۋدا»، دەپ قورىتىندىلادى ا.مولچانوۆسكايا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز