حالىقارالىق EDU Stream وقۋ ورتالىعى مەن Express Publishing باسپاسى بىرىگىپ ۇيىمداستىرعان بايقاۋعا ەلىمىزدىڭ تۇكپىر-تۇكپىرىنەن 150-گە جۋىق بەينەروليك كەلىپ تۇسكەن. الماتى, شقو, قاراعاندى, اقمولا, ماڭعىستاۋ, اتىراۋ, اقتوبە, تۇركىستان, پاۆلودار, قوستاناي وڭىرلەرىنەن قاتىسقان بالالاردىڭ ءبىر مينۋتتىق روليگىندە كىتاپقا, بىلىمگە دەگەن سۇيىسپەنشىلىك سەزىمى باياندالادى. ونەرلى جاسوسپىرىمدەر تىڭ جوبا بارىسىندا سيۋجەتكە ستسەناري جازۋعا, بەينەمونتاج جاساپ, وزدەرىن كامەرا الدىندا ەركىن ۇستاۋعا تالپىنعان.
وتكەن جىلدىڭ 14 جەلتوقسانى مەن بيىلعى 1 اقپانعا دەيىنگى ارالىقتى قامتىعان سايىس قورىتىندىسى قازىلار القاسىنىڭ شەشىمى مەن كورەرمەن كوزايىمى, ياعني EDU Stream-ءنىڭ ينستاگرام پاراقشاسىندا ەڭ كوپ لايك پەن پىكىر جيناعاندار ساناتى بويىنشا شىعارىلدى.
بايقاۋ ناتيجەسىندە ماڭعىستاۋ وبلىسى, مۇنايلى اۋدانى № 6 مەكتەبىنىڭ 5-سىنىپ وقۋشىسى الماس تالاسحان «كورەرمەن كوزايىمى» اتانىپ, ينستاگرامدا ەڭ كوپ لايك پەن پىكىر جيناسا, ال قازىلار القاسىنىڭ شەشىمىمەن باس جۇلدە وسكەمەن قالاسىنداعى №30 مەكتەپتىڭ 1-سىنىپ وقۋشىسى كيريلل ەگوروۆقا بۇيىردى. ءوزىنىڭ فيزيكاعا دەگەن قۇشتارلىعىن پاش ەتكەن بالاقايعا قازىلار القاسى ءبىر اۋىزدان جوعارى باعا بەرىپ, جەڭىمپاز دەپ تانىدى.
– بالالاردىڭ ارمان-قيالىن ءتۇرلى فورماتتا جەتكىزە ءبىلۋى ماعان وتە ۇنادى. ءبىرىنشى كەزەكتە مەنى قاتتى تاڭعالدىرعانى – ءبىرىنشى سىنىپ وقۋشىسىنىڭ فيزيكانى ءالى وقىماي جاتىپ فيزيكا نە ءۇشىن كەرەك ەكەنىن سانالى تۇردە ءبىلىپ وتىرعانى. بايقاۋ وتە ءساتتى ءوتتى. قازىر ينستاگرامدا, تيك-توكتا ءتۇرلى ترەندتەر كوپ, ال بىراق ءدال قازىر بالالارعا وسىنداي ماڭىزدى جوبالار جەتىسە بەرمەيدى. سوندىقتان «كىتاپ وقىعاندى جاقسى كورەمىن» بايقاۋى ءارى قاراي دا جۇيەلى جالعاسىن تابا بەرۋىنە تىلەكتەسپىن, – دەدى قاتىسۋشىلاردىڭ جۇمىسىن باعالاعان ساراپشى, «تەنگرينيۋس» اا قازاق رەداكتسياسىنىڭ باس رەداكتورى ارداق قۇلتاي.
ايتا كەتەتىن جايت, قازىلار القاسى قۇرامىنا تانىمال جۋرناليستەر, قوعام قايراتكەرلەرى مەن بلوگەرلەر تارتىلدى.
– بۇگىنگىدەي ينتەرنەت دامىعان زاماندا بالالاردىڭ كىتاپ وقۋدان دا ارتتا قالىپ جاتپاعانى مەنى قايران قالدىردى, – دەيدى قازىلار القاسىنىڭ مۇشەسى, قازاقستاننىڭ ىسكەر ايەلدەر قاۋىمداستىعىنىڭ پرەزيدەنتى راۋشان سارسەنباەۆا. – بالالارىمىزعا ءمان بەرىپ, ولارمەن قويان-قولتىق جۇمىس ىستەۋ ءۇشىن مۇنداي بايقاۋلاردى ءالى دە كوبەيتە بەرۋىمىز كەرەك.
