كورمە ماقساتى – تانىمال سۋرەتشى ت.بايعاليەۆتىڭ قاعاز بەن كەنەپ بەتىنە ورنەكتەلگەن تۋعان ولكەگە ارنالعان شىعارمالارىن ونەرسۇيەر قاۋىمعا كەڭىنەن ناسيحاتتاۋ.
جيىندا بەتاشار ءسوزدى ۇلتتىق مۋزەيدىڭ عىلىمي حاتشىسى سايالبەك گيززاتوۆ سويلەدى.
«ەلىمىز تاۋەلسىزدىك العاننان باستاپ بەينەلەۋ ونرىندە دە كوپتەگەن سۋرەتشىمىزدىڭ شىعارماشىلىق تابىستارعا قول جەتكىزگەنى بارشامىزعا ايان. سولاردىڭ ءبىرى دە بىرەگەيى – قازاق بەينەلەۋ ونەرىنىڭ قىلقالام شەبەرى, سۋرەتشى تولەۋعازى بايعاليەۆ. ونىڭ ەڭبەگى كول-كوسىر. ونىڭ تۋىندىلارى ەستيار كورەرمەندەردىڭ جۇرەك تورىنەن ورىن الىپ, كوپشىلىكتىڭ كوڭىلىنەن شىعادى دەگەن ويدامىن», دەدى س.گيززاتوۆ. ودان كەيىن قىلقالام شەبەرىنىڭ جەتىستىكتەرىن جىپكە ءتىزدى.
اۆتور – پەيزاج, گرافيكا, تاريحي جانرلاردا تابيعاتپەن ۇندەسە جۇمىس ىستەيتىن ساناۋلى سۋرەتشىلەردىڭ ءبىرى. ونەر يەسى جىل بويى تابيعات تۇستەرىنىڭ وزگەرىسىن ادامنىڭ كوڭىل كۇيىمەن ۇندەستىرە وتىرىپ, ونى كۇندەلىكتى قاعاز بەتىنە ءتۇسىرىپ وتىرادى. وعان «365+1» كارتينالار سەرياسى دالەل. اۆتوردىڭ تۋىندىلارىنان تۋعان جەرگە دەگەن ەرەكشە سۇيىسپەنشىلىگىن كورەمىز. ول ءوزىنىڭ كارتينالارىندا تۋعان جەرىنىڭ تاماشا تابيعاتىن سۋرەتتەپ قانا قويماي, الاشتىڭ الىپتارى ا.قۇنانباەۆ, ش.قۇدايبەردى ۇلى, م.اۋەزوۆ سىندى دانالارىمىزدىڭ كىندىك قانى تامعان توپىراقتى الەمگە تانىتا ءبىلدى.
شارا بارىسىندا كوركەمونەر اكادەمياسىنىڭ ۆيتسە-پرەزيدەنتى ەرلان ساقىپوۆ, مادەنيەت سالاسىنىڭ ۇزدىگى, قازاقستان سۋرەتشىلەر وداعىنىڭ مۇشەسى دينارا نوگەر سۋرەتشىنىڭ كارتينا جازۋ مانەرى مەن تەحنيكاسىنىڭ ەرەكشەلىگىنە, تۇلعالىق قاسيەتىنە توقتالا كەلىپ, سۋرەتشىلەر وداعىنىڭ اتىنان العىس حات تابىستادى.
ەكسپوزيتسياعا سۋرەتشى ت.بايعاليەۆتىڭ 100-گە جۋىق كوز تارتار سۇلۋلىعىمەن ەرەكشەلەنەتىن پەيزاجى مەن تەرەڭ تاريحتان سىر شەرتەتىن ونەر شىعارماسى قالىڭ جۇرتشىلىق نازارىنا ۇسىنىلدى.
