ونىڭ باستى مىندەتى - كەڭەستىك كەزەڭدەگى ساياسي قۋعىن-سۇرگىن قۇرباندارىنىڭ بارلىق ساناتىنا قاتىستى تاريحي ادىلەتتىلىكتى قالپىنا كەلتىرۋ.
جاقىندا قوستاناي وبلىسى اكىمىنىڭ ورىنباسارى باقىت ەسىموۆانىڭ توراعالىعىمەن وبلىستىق كوميسسيانىڭ ءبىرىنشى كەڭەيتىلگەن وتىرىسى بولىپ ءوتتى.
وتىرىس بارىسىندا ۆەدومستۆوارالىق ءوزارا ءىس-قيمىل, زەرتتەۋ جۇمىسىن ۇيىمداستىرۋ جانە وبلىس بويىنشا جۇرگىزىلەتىن جۇمىستاردىڭ ناقتى ماقساتى مەن مىندەتتەرىن ايقىنداۋ ماسەلەلەرى تالدانىپ, قاراستىرىلدى.
وبلىستىق كوميسسيا قۇرامىنا عالىم-تاريحشى مەن ولكەتانۋشىلار, مەملەكەتتىك ورگان جانە ازاماتتىق قوعام وكىلدەرى اراسىنان 23 ادام ىرىكتەلىپ الىندى. كوميسسيا مۇشەلەرى ءوز قۇزىرەتى شەگىندە ساياسي قۋعىن-سۇرگىن قۇرباندارىن, ونىڭ ىشىندە اسكەري قىزمەتشىلەر مەن تۇتقىنداردى زاڭدىق جانە ساياسي اقتاۋ جۇمىستارىن جۇزەگە اسىراتىن بولادى.
ول ءۇشىن ارنايى وبلىستىق جانە اۋداندىق مۇراعاتتاردا قۋعىن-سۇرگىنگە ۇشىراعان ازاماتتار تۋرالى قۇجاتتامانى انىقتاۋ, دالالىق زەرتتەۋلەر جۇرگىزۋ, قۋعىن-سۇرگىنگە ۇشىراعان ازاماتتاردىڭ ۇرپاقتارى مەن تۋىستارىنان سۇحبات الۋ, قۋعىن-سۇرگىنگە ۇشىراعان ازاماتتار تۋرالى قۇجات, فوتوماتەريالدار مەن وزگە دە قۇجاتتامانى جيناۋ جۇمىستارى ۇيىمداستىرىلماق.
وسىعان بايلانىستى اكىمشىلىك-ۇيىمداستىرۋشىلىق, زەرتتەۋ جانە اقپاراتتىق-ءتۇسىندىرۋ جۇمىستارىن قامتيتىن 3 جۇمىس توبى قۇرىلدى, ولاردىڭ جۇمىسى مەملەكەتتىك ورگانداردىڭ قولداۋىمەن جۇرگىزىلەدى.
كوميسسيا مۇشەلەرىنىڭ پىكىرىنشە, باستاپقى كەزەڭدە, جاپپاي جەرلەۋ ورىندارى مەن اقتالماعان ازاماتتاردىڭ ەسىمدەرىن انىقتاۋ ءۇشىن اۋداندارعا تۇراقتى تۇردە جۇمىس ىستەيتىن ەكسپەديتسيالاردى جىبەرۋ قاجەت.
وبلىس اكىمنىڭ ورىنباسارى باقىت ەسىموۆا ءوز سوزىندە:
- بولاشاق ءۇشىن ەستە ساقتاۋ جانە تاريحي ادىلەتتىلىكتى ورناتۋ - ءبىزدىڭ ازاماتتىق پارىزىمىز. ال ءبىزدىڭ جۇمىسىمىزدىڭ ناتيجەسى – ۇرپاعىمىزعا قالدىراتىن مۇرا, - دەپ اتاپ ءوتتى.
