اكتسيا وتكەن جىلدىڭ قازان ايىندا باستالدى جانە ونىڭ اياسىندا 3 مىڭنان استام ادام جەكە باسىن كۋالاندىراتىن قۇجاتتارىن الدى. ولاردىڭ كوپشىلىگى الماتى قالاسىندا (300), الماتى (372), قاراعاندى (353), اقمولا (279), جامبىل (276) جانە تۇركىستان (284) وبلىستارىندا انىقتالدى. ەلوردادا 189 ادامعا قۇجاتتار بەرىلدى. اكتسيانى اعىمداعى جىلدىڭ قاڭتار ايىندا اياقتاۋ جوسپارلانعان بولاتىن, الايدا قۇجاتسىز تۇلعالار سانىن قىسقارتۋدىڭ ماڭىزدىلىعىن ەسكەرە وتىرىپ, جۇمىستى مامىرعا دەيىن ۇزارتۋ تۋرالى القالى شەشىم قابىلداندى.
مينيستر ەرلان تۇرعىمباەۆ كوشى-قون قىزمەتى كوميتەتىنە ازاماتتاردى قۇجاتتاندىرۋعا باعىتتالعان جۇمىستى جالعاستىرۋدى تاپسىردى.
– ازاماتتىعى جوق ادامداردى انىقتاۋ الەمدىك پروبلەما بولىپ تابىلادى, مۇنى تەكسەرۋگە جانە انىقتاۋعا كوپ ۋاقىت كەتەدى. وسىعان قاراماستان, وتكەن جىلى ىسكە قوسىلعان اكتسيا مىڭداعان ادامعا قۇجاتتارىن الۋعا كومەكتەستى جانە الداعى ايلاردا ەلىمىزدىڭ تاعى بىرنەشە مىڭ تۇرعىنى قۇجاتتارىن راسىمدەي الادى, – دەدى مينيستر ەرلان تۇرعىمباەۆ كەڭەس بارىسىندا.
ۆەدومستۆو باسشىسى اتالعان اكتسيانىڭ ايەلدەر ءۇشىن ماڭىزى زور ەكەنىن اتاپ ءوتتى. جاس قىزداردان كۇيەۋلەرى نەمەسە بىرگە تۇراتىن ادامدارى قۇجاتتارىن تارتىپ الاتىن جاعدايلار دا كەزدەسىپ جاتادى. سونىمەن قاتار, ايەلدەردى جەزوكشەلىكپەن اينالىسۋعا ماجبۇرلەيدى نەمەسە ولار ەڭبەك قۇلدىعىنا تۇسەدى.
– ەگەر ايەلدەر وسىنداي جاعدايعا تاپ بولسا, ول اۋماقتىق كوشى-قون قىزمەتى بولىمشەسىنە جۇگىنە الادى نەمەسە “102” ءموبيلدى قوسىمشاسى ارقىلى حابارلاما جىبەرە الادى. پوليتسيا قىزمەتكەرلەرى قۇجاتتاردى زاڭدى تۇردە تەگىن راسىمدەۋگە كومەكتەسەدى, – دەدى ەلدىڭ باس پوليتسەيى.
مينيستر ازاماتتىعى جوق ادامداردى انىقتاۋعا جانە قۇجاتتاۋ راسىمىنە ۇكىمەتتىك ەمەس جانە ۆولونتەرلىك ۇيىمدار ۇلكەن كومەك كورسەتەتىنىن اتاپ ءوتتى. ءىىم قۇقىق قورعاۋشىلارعا جانە بارلىق بەي-جاي قارامايتىن ازاماتتارعا ازاماتتىعى جوق ادامداردىڭ پروبلەمالارىن شەشۋگە كومەكتەسكەنى ءۇشىن العىس بىلدىرەدى.
ماڭىزدى اقپارات: ازاماتتىعى جوق ادامدار قازاقستان رەسپۋبليكاسىنىڭ ازاماتتارى سياقتى قۇقىقتار مەن مىندەتتەردى اتقارادى. ولار جۇمىسقا ورنالاسا الادى, ەمحانالاردان قىزمەت الا الادى, ءبىلىم الا الادى. بۇدان ءارى ازاماتتىعى جوق ادامدار قازاقستان رەسپۋبليكاسىنىڭ ازاماتتىعىن الا الادى.
