ايماقتار • 14 اقپان، 2021

باقىت سۇلتانوۆ ماقتاارال اۋدانىنا جۇمىس ساپارىمەن باردى

65 رەت كورسەتىلدى

قازىرگى تاڭدا ماقتاارال اۋدانىن كورشى ەلمەن بايلانىستىرىپ تۇرعان 3 شەكارا وتكىزۋ بەكەتى جۇمىس جاسايدى. اتاپ ايتقاندا، "اتامەكەن" كەدەندىك بەكەتى مەن "سىرداريا"، "تسەليننىي" شەكارا وتكىزۋ بەكەتتەرى ارقىلى كۇنىنە جۇزدەگەن جەڭىل كولىكتەر مەن جۇك كولىكتەرى بارىس-كەلىس جاسايدى، دەپ حابارلايدى Egemen.kz

ماقتاارال اۋدانى وزبەكستاننىڭ سىرداريا جانە جىزاق وبلىستارىنداعى 4 اۋدانمەن شەكتەسەدى. وسىنداي گەوگرافيالىق مۇمكىندىكتى پايدالانىپ اۋداندا وزبەكستان رەسپۋبليكاسىمەن ساۋدا-ساتتىقتى دامىتۋ ءۇشىن حالىقارالىق ساۋدا كەشەنىن قۇرۋ وتە ماڭىزعا يە.

قازاقستان رەسپۋبليكاسىنىڭ تۇڭعىش پرەزيدەنتى، ەلباسى ن.ءا.نازارباەۆ 2018 جىلى "ورتالىق ازيا" حالىقارالىق ساۋدا ەكونوميكالىق ىنتىماقتاستىق ورتالىعىن قۇرۋ تۋرالى تاپسىرما بەرگەن بولاتىن. اعىمداعى جىلدىڭ 26-قاڭتارىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ توراعالىعىمەن ۇكىمەتتىڭ كەڭەيىتلگەن وتىرىسىندا ۇكىمەت باسشىسىنا "ورتالىق ازيا" حالىقارالىق ساۋدا ەكونوميكالىق ىنتىماقتاستىق ورتالىعىن قۇرۋ ماسەلەسىن جەدەلدەتۋدى تاپسىردى.

وسىعان بايلانىستى كۇنى كەشە قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى باقىت سۇلتانوۆ جانە وبلىستىق كاسىپكەرلىك جانە ساۋدا باسقارماسىنىڭ باسشىسى نۇرباقىت يمانقۇلوۆ ماقتاارال اۋدانىنا جۇمىس ساپارىمەن كەلىپ، شەكارا ماڭىنداعى بەكەتتەردىڭ جۇمىسىمەن تانىستى. ءمينيستردىڭ ءىس-ساپارىنا وزبەكستان رەسپۋبليكاسىنىڭ وسى سالاعا جاۋاپتى ۆيتسە-مينيسترلەرى دە قوسىلدى.  

1

مينيستر مەن باسقارما باسشىسى "تسەليننىي" جانە "سىرداريا" شەكارا وتكىزۋ بەكەتتەرىن ارنايى بارىپ كورىپ، حالىقارالىق ساۋدا ورتالىعىن قۇرۋ ءۇشىن نىسانداردىڭ مۇمكىندىكتەرىن قاراپ شىقتى. اۋدان اكىمى باقىت اسانوۆ بەكەتتەردىڭ جۇمىسى مەن مۇمكىندىكتەرى تۋرالى كەڭىنەن باياندادى. ماسەلەن، "تسەليننىي" شەكارا وتكىزۋ بەكەتىنە جاقىن ماڭدا "ساپار" ساۋدا بازارىن حالىقارالىق دەڭگەيدە دامىتۋعا بولاتىنىن ايتتى.

"ماقتاارال اۋدانىندا ۇلى جىبەك جولىنىڭ ءبىر تارماعى سانالاتىن م-39 "تاشكەنت – تەرمەز" باعىتىنداعى ماگيسترال ءدالىزى بار. وسى اۆتوموبيل جولىنىڭ پوتەنتسيالىن پايدالانىپ، وڭىردە ساۋدا-ساتتىقتى جوعارى دەڭگەيدە دامىتۋعا مۇمكىندىگىمىز زور. ماسەلەن، ءبىر كەزدەرى حالىقارالىق دەڭگەيدە قىزمەت كورسەتكەن بەتونكانىڭ بويىنداعى "ساپار" بازارىن حالىقارالىق دەڭگەيدە قايتادان دامىتساق – وڭىردە مىڭداعان ادامدى جۇمىسپەن قامتي الامىز" - دەدى باقىت ناسىرحان ۇلى.

جالپى ەدىگە راحىمبەرديەۆكە تيەسىلى "ساپار" بازارىندا مودەرنيزاتسيالاۋ جۇمىستارى 2019 جىلى جۇرگىزىلگەن بولاتىن. ول ءۇشىن كاسىپكەردىڭ جەكە ەسەبىنەن 100 ميلليون تەڭگەدەن اسا قاراجات جۇمسالدى. سونىڭ ارقاسىندا تۇتىنۋشىلارعا جاعداي جاسالىپ، قوسىمشا 100 ادام جۇمىسپەن قامتىلعان بولاتىن. 

ءمينيستردىڭ سوڭعى ايالداعانى – "اتامەكەن" كەدەندىك بەكەتى. بۇعان دەيىن كورشى ەلگە وتپەكشى بولعان جۇك كولىكتەرى كەدەندىك بەكەت ماڭىندا كەپتەلىسكە ۇشىراپ، جول قاتىناسىن قيىنداتا تۇسكەن ەدى. ماسەلەنى شەشۋ ءۇشىن اۋدان اكىمى ب.اسانوۆتىڭ باستاماسىمەن كەدەندىك بەكەتتىڭ ايماعىن كورىكتەندىرۋ، كوگالداندىرۋ، كەڭەيتۋ جوسپارى جاسالدى. اتاپ ايتقاندا، شەكارا ماڭىنان ساۋدا لوگيستيكالىق ورتالىعىن قۇرۋ، ونىڭ ىشىندە ساۋدا بازارلارى، قوناق ءۇي، اۆتوتۇراق، قويمالار، تۇرعىن ۇيلەر مەن ءتۇرلى سپورتتىق الاڭشالاردى سالۋ كوزدەلگەن بولاتىن. قازىرگى تاڭدا اۆتوتۇراق پايدالانۋعا بەرىلگەن. سونىمەن قاتار، كاسىپكەرلەردىڭ ەسەبىنەن باسقا دا نىساندار سالىنۋدا.

جۇمىس ساپارىنىڭ سوڭىندا بارلىق ءمان-جايعا قانىق بولعان مينيستر باقىت تۇرلىحان ۇلى "ورتالىق ازيا" حالىقارالىق ساۋدا ورتالىعىن قۇرۋ ءۇشىن تاڭدالاتىن بەكەت تۋرالى جان-جاقتى زەرتتەلىپ، جوسپار قۇرىلىپ، شەشىم شىعارىلاتىنىن ايتتى. 

سوڭعى جاڭالىقتار

ءۇي سالعانعا – ۇلكەن كومەك

قوعام • بۇگىن، 08:05

ەكونوميكا دامۋ جولاعىنا شىقتى

ەكونوميكا • بۇگىن، 07:58

تۇركىستاننىڭ جاڭا ءداۋىرى

قوعام • بۇگىن، 07:55

ۇقساس جاڭالىقتار