ەكونوميكا • 08 اقپان، 2021

ەلىمىزدە ەڭ كوپ جالاقىنى كىمدەر الادى؟

393 رەت كورسەتىلدى

2020 جىلدىڭ ءتورتىنشى توقسانىنىڭ قورىتىندىسى بويىنشا قازاقستاندىقتاردىڭ ورتاشا جالاقىسى  14،3%-عا جوعارىلاپ، 233،1 مىڭ تەڭگەگە جەتتى. ينفلياتسيانى ەسكەرگەندە شىنايى ءوسىم 6،5%-دى قۇرادى. سالىستىرمالى تۇردە الساق، 2019 جىلدىڭ وسى كەزەڭىندە وتانداستارىمىزدىڭ ورتاشا ايلىعى 203،9 مىڭ تەڭگە بولاتىن، دەپ حابارلادى Egemen.kz.

وڭىرلەر بويىنشا ەڭ جوعارى جالاقى اتىراۋ وبلىسىندا تىركەلگەن. وبلىس تۇرعىندارى ورتا ەسەپپەن ايىنا 377،4 مىڭ تەڭگە الادى. بۇل ەلىمىزدەگى ورتاشا ايلىقتان 61،9% جوعارى. ودان كەيىنگى ورىندا ەلوردا (349،6 مىڭ تەڭگە) مەن ماڭعىستاۋ وبلىسى (337،7 مىڭ تەڭگە). ەڭ تومەنگى ورتاشا ايلىق تۇركىستان وبلىسىندا (166،7 مىڭ تەڭگە) تىركەلگەن. ودان كەيىنگى ورىندا جامبىل (168،8 مىڭ تەڭگە) جانە سولتۇستىك قازاقستان (168،9 مىڭ تەڭگە) وبلىستارى.

سونىمەن قاتار ەڭبەك اقى بويىنشا ماماندىقتار اراسىندا ۇلكەن ايىرماشىلىق بار. ماسەلەن، تاۋ-كەن سالاسىندا جۇمىس ىستەيتىندەردە ەڭ جوعارى (472،3 مىڭ تەڭگە) ايلىق تىركەلگەن. ودان كەيىنگى ورىندا قارجى جانە ساقتاندىرۋ (422،6 مىڭ تەڭگە) سالاسى.

ال سۋمەن قامتۋ (145،7 مىڭ تەڭگە) جانە اۋىل شارۋاشىلىعى (147،7 مىڭ تەڭگە) ماماندارى ورتا ەسەپپەن ەڭ تومەنگى جالاقى الادى.  سونداي-اق ءبىلىم بەرۋ سالاسىندا ەڭبەك ەتەتىندەردىڭ ايلىعى ورتا ەسەپپەن 176،5 مىڭ تەڭگە. بۇل ەلىمىزدەگى ورتاشا كورسەتكىشتەن 24،3% تومەن. دەنساۋلىق ساقتاۋ سالاسى ماماندارىنا اي سايىن  197،4 مىڭ تەڭگە تولەنەدى.    

وسىلايشا ەلىمىزدە ۇستازدار مەن دارىگەرلەردىڭ جالاقىسى مۇنايشىلار مەن قارجىگەرلەردەن 2 ەسە تومەن. 

سوڭعى جاڭالىقتار

ۇقساس جاڭالىقتار