ەكونوميكا • 04 اقپان، 2021

تۇتىنۋشى قۇقىعى تاپتالعان: بانكتەر قانداي زاڭ بۇزۋشىلىقتار جاساپ ءجۇر؟

قارجى ۇيىمدارى كليەنتتەردىڭ مۇددەسى مەن تۇتىنۋشىلىق قۇقىعىن اياق استى ەتىپ، بىرقاتار زاڭ بۇزۋشىلىق ارەكەتتەرگە جول بەرگەن. ناتيجەسىندە قارجى نارىعىن قاداعالاۋ جانە دامىتۋ اگەنتتىگى تارتىپكە باعىنباعانى ءۇشىن قارجى ۇيىمدارىنا 127،3 ملن تەڭگەگە ايىپپۇل سالىپتى.

اباي قازبەك ۇلى

قارجى ۇيىمدارى دەگەندە، ەكىنشى دەڭگەيلى بانكتەر، بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار، ساقتاندىرۋ (قايتا ساقتاندىرۋ) ۇيىمدارى، كوللەكتورلىق اگەنتتىكتەر جانە ميكروقارجى قىزمەتىن جۇزەگە اسىراتىن ۇيىمدارعا اگەنتتىك تاراپىنان 253 اكىمشىلىك جازا قولدانىلعان. تەك بانكتەرگە قاتىستى 94 قاداعالاپ دەن قويۋدىڭ ۇسىنىمدىق شاراسى، 4 جازباشا ۇيعارىم، 75 اكىمشىلىك جازا قولدانىلىپ، 38،8 ملن تەڭگە ايىپپۇل سالىنعان.

بانكتەر نەگىزىنەن تولەم جانە (نەمەسە) اقشا اۋدارىمى بويىنشا نۇسقاۋدى ورىنداۋدىڭ تولەمدەر تۋرالى زاڭدا بەلگىلەنگەن مەرزىمدەرىنىڭ بۇزىلۋى، جىلدىق ءتيىمدى سىياقى مولشەرلەمەسىن كورسەتۋ جونىندەگى مىندەتتى ورىنداماۋ، باق-تا شىندىققا سايكەس كەلمەيتىن جارنامانى جاريالاۋ، نەسيە تاريحى سۋبەكتىلەرىنە قاتىستى دۇرىس ەمەس مالىمەتتەردى بەرۋ، كليەنتتىڭ كەلىسىمىنسىز نەسيەلىك ەسەپ الۋ جاعدايلارى بويىنشا كىنالى دەپ تانىلعان.

ساقتاندىرۋ ۇيىمدارىنا قاتىستى 6 اكىمشىلىك جازا قولدانىلىپ، جالپى سوماسى 1،8 ملن تەڭگەگە ايىپپۇل سالىنعان. بۇل رەتتە ميكرو قارجى ۇيىمدارىنا قولدانىلعان اكىمشىلىك جازا الدەقايدا كوپ – 165 اكىمشىلىك جازا. شاعىن قارجى ۇيىمدارى شارت جاساسۋ تارتىپتەرىن ءجيى بۇزادى ەكەن. ولار جالپى سوماسى 85،1 ملن تەڭگە ايىپپۇل تولەۋگە ءماجبۇر بولعان. سونىمەن قاتار ميكرو قارجى ۇيىمدارى جىلدىق ءتيىمدى سىياقى مولشەرلەمەسىنىڭ مولشەرىن كورسەتپەي، نەسيە بيۋروسىنا دايەكسىز مالىمەتتەر ۇسىنىپ، زاڭ بۇزۋشىلىقتارعا جول بەرگەن.

ءوز كەزەگىندە كوللەكتورلىق اگەنتتىكتەر دە جازادان تىس قالماعان. ولارعا قاتىستى 7 اكىمشىلىك جازا قولدانىلىپ، 1،6 ملن تەڭگە ايىپپۇل تولەۋگە مىندەتتەلگەن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز