«ادەبيەت – كاسىپ ەمەس, ونەر» دەگەن عابيت مۇسىرەپوۆتىڭ كىتابى بولعان ەدى. ءوزى دە جەر جىرتىپ, ەتىك تىككەن تولستوي دا زامانىندا «تاماعىڭدى جەر جىرتىپ, ەتىك تىگىپ تاپ, قالامگەرلىكتى كاسىپ قىلما» دەگەن سىڭايداعى وي ايتىپتى. جازۋشىلىق قالاي ماماندىققا اينالدى نەمەسە اينالادى دەگەندى اينالىپ ءوتىپ, حارۋكيدىڭ وسى كىتابىندا سۋرەتتەلگەن ءبىر وقيعا جايلى ايتقىمىز كەلىپ وتىر.
«قايسىبىر جازۋشىلاردىڭ ۇزاق جىلدارعا سوزىلعان دوستىعى جايلى اڭگىمەلەرگە اسا ساقتىقپەن قارايمىن. ارينە, جازۋشىلار اراسىندا دا جۇرەك بايلاعان دوستىق تا بولادى, بىراق ونىڭ ۇزاققا سوزىلارىنا كۇمانىم بار. ...سونىڭ ءبىر انىق مىسالى – 1922 جىلعى پاريجدە وتكەن سالتاناتتى قابىلداۋ, سوندا مارسەل پرۋست پەن دجەيمس دجويس ءبىر ۇستەلدىڭ باسىندا وتىرىپ قالادى. يگىلىكتى شارادا يىقتاسىپ وتىرسا دا, ءتىل قاتىسپاپتى. توڭىرەگىندەگىلەر دەمىن ىشكە تارتىپ, ءوز ۋاقىتىنىڭ, ءتىپتى تۇتاس جيىرماسىنشى عاسىردىڭ قوس ۇلى قالامگەرى نە جايلى سويلەسەر ەكەن دەپ باعىپ وتىرىپتى. داۋىرلىك داڭقى بار كەزدەسۋ ۇنسىزدىكپەن ءتامامدالدى. بالكىم, ەكەۋىنىڭ دە وزدەرى جايلى پىكىرلەرى تىم بيىك بولعان دا شىعار», دەيدى مۋراكامي.
ءبىز ادەتتە اۋەزوۆ پەن مۇقانوۆتى بارريكادانىڭ ەكى جاعىندا قاراستىرعاندا, تولستوي مەن دوستوەۆسكيدىڭ ءبىر زاماندا, ءبىر ەلدە ءومىر سۇرە وتىرىپ, كەزدەسپەگەنى جايلى ايتقاندا, پرۋست پەن دجويستىڭ دا وسى ءبىر كەزدەسۋى جايلى اقيقاتتى اڭىزدار اراسىنان ارشىپ العىمىز كەلەتىنى دە بار عوي.
1922 جىلعى كەزدەسۋ دەگەندە, بىردەن مامىردىڭ ون سەگىزىنشى جۇلدىزىنداعى جازۋشى سيدنەي ءشيففتىڭ ۇيىندەگى داستارحانعا ورالامىز. تورگە جايعاسۋعا ۇمتىلعان ءتورت مەيماننىڭ ەكەۋى – پرۋست پەن دجويستىڭ وسى داستارحان باسىنداعى اڭگىمەسىنىڭ بىرنەشە نۇسقاسى بار. سونىڭ بىرىندە دجويس: «پرۋست مىرزانى وقىماپپىن» دەسە, پرۋست: «دجويس مىرزانىڭ بىردە-ءبىر ءسوزىن وقىماعانىما وكىنىش بىلدىرەمىن» دەپتى دەلىنەدى.
ال بىرىندەگى اڭگىمە, ءتىپتى قىزىق. دجويس: «باسىمنىڭ ساقيناسى كۇندە ۇستايدى. كوزىم بۇلدىرايدى». پرۋست: «بايقۇس اسقازانىم-اي. مەنى ءولتىرىپ تىناتىن شىعار». اڭگىمەنىڭ ۇزىن-ىرعاسى وسى. تاعى بىرىندە تريۋفەلدەن جاسالعان ىرىمشىك جايىندا ءتىل قاتىسقان دەلىنەدى.
حارۋكي مۋراكامي ءدال سول جىلعى كەزدەسۋدىڭ ۇنسىزدىكپەن اياقتالعانىن ايتىپ وتىر. جالپى, ول ەكەۋىنىڭ ءبىر رەت قانا كەزدەسكەنىن ەسكە العاندا, كىمگە سەنەرىڭدى بىلمەيسىڭ. جالپى, ادەبيەتتىڭ وسىنداي اڭگىمەلەرىنىڭ ءوزى جاڭا ءبىر جاسامپاز جانرعا اينالىپ كەتتى.
مەمۋارلار مۇددەمەن, كۇندەلىكتەر كۇدىكپەن, ەستەلىكتەر ەسەپپەن جازىلاتىن ءبىزدىڭ كەزەڭدە ەشتەڭەگە دە تاڭعالۋعا بولمايدى.
