جامبىل وبلىسىندا قىلمىس دەڭگەيى تومەندەدى

ايماقتار • 26 قاڭتار، 2021

جامبىل وبلىسىندا قىلمىس دەڭگەيى تومەندەدى

16 رەت كورسەتىلدى

جامبىل وبلىسىندا قىلمىس دەڭگەيى 30%-عا تومەندەدى، – دەپ حابارلايدى Egemen.kz Polisia.kz سايتىنا سىلتەمە جاساپ.

جامبىل وبلىسىنىڭ پوليتسيا دەپارتامەنتىندە جەدەل كەڭەس وتكىزىلىپ، 2020 جىلعى جەدەل-قىزمەتتىك جۇمىستىڭ قورىتىندىلارى تالقىلاندى. پوليتسيا دەپارتامەنتىنىڭ باستىعى جانات سۇلەيمەنوۆ وبلىستا قىلمىس دەڭگەيى تومەندەگەنىن ايتتى.

وتكەن جىلعى بارلىق قيىندىقتارعا قاراماستان، جامبىل وبلىسى پوليتسيا دەپارتامەنتىمەن 2020 جىلدىڭ 12 ايىنىڭ قورىتىندىسى بويىنشا وڭىردە قىلمىستىڭ ايتارلىقتاي تومەندەۋىنە قول جەتكىزىلدى. قابىلدانعان شارالاردىڭ ناتيجەسىندە قىلمىس دەڭگەيى 30 پايىزعا تومەندەدى. اسا اۋىر قىلمىستار سانى 23،1%-عا، زورلاۋ وقيعالارى 22%-عا ازايدى.

اسا اۋىر قىلمىستاردىڭ اشىلۋى 93،1% – دى قۇرادى. كەشەندى ءىس-شارالاردىڭ ناتيجەسىندە پاتەر ۇرلىقتارىنىڭ سانى 40،8%-عا، قالتا ۇرلىعى 58،4%-عا، ۇيالى تەلەفون ۇرلىعى 48،6%-عا جانە مال ۇرلىعى 23،6%-عا تومەندەدى. سونداي-اق، توناۋ قىلمىستارى 22،6%-عا، قاراقشىلىق 17،6%، اۆتوكولىكتى ايداپ اكەتۋ 20%-عا، بۇزاقىلىق – 31،9%-عا جانە قورقىتىپ الۋ دەرەكتەرى 42،9%-عا ازايدى.

قوعامدىق ورىنداردا جاسالعان قىلمىستىق قۇقىق بۇزۋشىلىقتار 35،2%-عا تومەندەدى. سونىمەن قاتار، قارۋ قولدانۋمەن جاسالعان قىلمىستار 40%-عا جانە ماساڭ كۇيدە جاسالعان قىلمىستار 25،4%-عا ازايعان.

ءبىر جىل ىشىندە 815 ەسىرتكى قىلمىسى انىقتالدى. زاڭسىز اينالىمنان 3 توننا 278 كگ ءارتۇرلى ەسىرتكى قۇرالدارى تاركىلەندى. تۇرعىندارعا سينتەتيكالىق ەسىرتكى زاتتارىن تاراتۋمەن اينالىساتىن 58 ينتەرنەت-سايت بۇعاتتالدى. قالا كوشەلەرىندە 998 گراففيتي جازبالارى جويىلدى.

پوليتسيا دەپارتامەنتى قىزمەتىنىڭ ماڭىزدى باعىتتارىنىڭ ءبىرى جول قاۋىپسىزدىگىن قامتاماسىز ەتۋ بولىپ قالا بەرەدى. ەسەپتى كەزەڭدە وبلىستىڭ اۆتوجولدارىنداعى جول-كولىك وقيعالارىنىڭ سانى 23%-عا تومەندەدى. دەپارتامەنت قىزمەتىنىڭ بارلىق جەكەلەگەن باعىتتارى بويىنشا وڭ ديناميكا ءتيىستى ماتەريالدىق-تەحنيكالىق قامتاماسىز ەتۋسىز مۇمكىن بولماس ەدى. وتكەن جىلى اۆتوكولىكتەر، بەينەتىركەگىشتەر، جەكە قورعانۋ قۇرالدارى ساتىپ الىندى.

– جالپى، پوليتسيا قىزمەتىنىڭ تيىمدىلىگىنە ازاماتتاردىڭ قوعامدىق ءتارتىپتى ساقتاۋعا اتسالىسۋى، ولاردىڭ قۇقىق قورعاۋ ورگاندارىنا كومەك كورسەتۋى اسا ماڭىزدى ءرول اتقارادى. جامبىلدىقتار وزدەرىنىڭ ازاماتتىق ۇستانىمىن تانىتا وتىرىپ، قوعامدىق ءتارتىپتى جاقسارتۋعا ءوز ۇلەستەرىن قوسۋدا. الداعى ۋاقىتتا دا ءبىز بارلىق قيىندىقتاردى بىرگە ەڭسەرەتىنىمىزگە سەنىمدىمىن، – دەپ اتاپ ءوتتى پد باستىعى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز