پارلامەنتتىك تىڭداۋدى اشقان سەنات توراعاسى ماۋلەن اشىمباەۆ مەملەكەت باسشىسىنىڭ اگروونەركاسىپتىك كەشەن مەن اۋىل شارۋاشىلىعىن, اسىرەسە سۋ رەسۋرستارىن تسيفرلاندىرۋ جونىندەگى تاپسىرمالارىن ىسكە اسىرۋ ءۇشىن ۇدەرىستەردى جاي عانا تسيفرلىق فورماتقا كوشىرۋ جەتكىلىكسىز ەكەنىن اتاپ ءوتتى. ونىڭ ايتۋىنشا, سالاداعى احۋال تۋرالى وزەكتى مالىمەتتەردى, سونىڭ ىشىندە مەملەكەتتىك قولداۋ جونىندەگى اقپاراتتى بىرىكتىرەتىن, سونداي-اق قالىپتاسقان جاعدايعا دەر كەزىندە مونيتورينگ جاساۋعا مۇمكىندىك بەرەتىن بىرىڭعاي جۇيە قاجەت.
«اگروونەركاسىپتىك كەشەن مەن سۋ شارۋاشىلىعىن تسيفرلاندىرۋ ماسەلەسى – ەلىمىزدىڭ ورنىقتى دامۋىن قامتاماسىز ەتەتىن ماڭىزدى سەكتورلاردىڭ ءبىرى. پرەزيدەنت قاسىم-جومارت توقاەۆ وسى باعىتتاردى جەتىلدىرۋگە ۇنەمى باسا ءمان بەرىپ كەلەدى. قازىر جەكەلەگەن مەملەكەتتىك قىزمەتتەردى جاي تسيفرلاندىرۋدان تولىققاندى «smart» باسقارۋعا كوشىرۋ قاجەت. بۇگىندە اتالعان باعىتتا بەلگىلى ءبىر قۇقىقتىق نەگىز قالىپتاستى. ەندى اگرارلىق جانە سۋ جۇيەسىنىڭ بىرىڭعاي تسيفرلىق كونتۋرىن قۇرۋ كەرەك. بۇل – ۇلكەن دەرەكتەرگە, جاساندى ينتەللەكتىگە, جەدەل اناليتيكا مەن رەسۋرستاردى ءدال ەسەپكە الۋعا نەگىزدەلگەن باسقارۋدىڭ جاڭا مودەلىنە كوشۋ دەگەن ءسوز. مۇنداي قادام قازىرگى جاعدايدى تىركەپ قانا قويماي, قۇرعاقشىلىق, سۋ تاپشىلىعى, رەسۋرستاردى ءتيىمسىز پايدالانۋ سياقتى سىن-قاتەرلەردى الدىن الا بولجاۋعا مۇمكىندىك بەرەدى», دەدى م.اشىمباەۆ.
سونىمەن قاتار سەنات توراعاسى باستاپقى كەزەڭدە ءىت-باستامالار جەكەلەگەن قۇرىلىمداردىڭ قاجەتتىلىكتەرىنە ساي جەرگىلىكتى دەڭگەيدە ەنگىزىلگەنىن, ال قازىر ءتۇرلى سەرۆيستەن بىرىڭعاي جۇيەگە كوشۋ قاجەتتىگىن ايتتى. كەشەندى باسقارۋعا اگروونەركاسىپتىك كەشەن مەن سۋ رەسۋرستارىنىڭ ءىت-جۇيەلەرىن بىرىكتىرۋ قاجەت.
«اۋىل شارۋاشىلىعى جالپى سۋ كولەمىنىڭ شامامەن 60 پايىزىن تۇتىنادى. ال ونى تاسىمالداۋ شىعىندارى 40 پايىزعا دەيىن جەتەدى. بۇل بۇگىندە سۋ ۇنەمدەۋ تەحنولوگيالارىن ەنگىزۋدى كەڭەيتۋمەن قاتار, سۋدىڭ قوزعالىس جولىنىڭ بارلىق كەزەڭىندە تسيفرلىق ەسەپ پەن باقىلاۋدى جۇيەلەۋ قاجەت ەكەنىن كورسەتەدى. سونداي-اق اگروونەركاسىپتىك كەشەن سۋبەكتىلەرىن مەملەكەتتىك قولداۋدى وبەكتيۆتى تسيفرلىق دەرەكتەرمەن ۇشتاستىرۋ كەرەك. مەملەكەتتىك قولداۋ شارالارى ناقتى كورسەتكىشتەرگە نەگىزدەلۋگە ءتيىس. مۇنداي ءتاسىل بيۋدجەت قاراجاتىن ءبولۋدى بارىنشا اشىق ەتىپ, قولداۋ شارالارىنىڭ نىسانالى ءارى ناتيجەلى بولۋىن قامتاماسىز ەتەدى», دەپ م.اشىمباەۆ الداعى ۋاقىتتا پالاتا مۇددەلى تاراپتارمەن بىرلەسىپ اتقاراتىن بىرقاتار مىندەتتى بەلگىلەپ بەردى.
اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا, بيىل پايدالانۋشىلارعا كونسۋلتاتسيالىق قولداۋ كورسەتۋگە جاساندى ينتەللەكت نەگىزىندە چات-بوت ەنگىزىلگەن. بۇل ماسەلەلەردى جەدەل قاراپ, ناقتى جاۋاپتار بەرۋگە مۇمكىندىك بەرەدى.
«مال شارۋاشىلىعىن تسيفرلاندىرۋ – مينيسترلىكتىڭ باسىم باعىتتارىنىڭ ءبىرى. سالادا تولىق قاداعالاۋدى قامتاماسىز ەتۋ ءۇشىن جانۋارلار مەن مال شارۋاشىلىعى ونىمدەرىنىڭ بۇكىل ومىرلىك تسيكلىن اۆتوماتتاندىرۋ بويىنشا جۇمىس جۇرگىزىلىپ جاتىر», دەدى مينيستر.
سونداي-اق پارلامەنتتىك تىڭداۋدا وڭىرلەرمەن تىعىز ءارى بەلسەندى جۇمىس جۇرگىزۋ قاجەتتىگى ايتىلدى. اتقارۋشى ورگاندار ورتالىق دەرەكتەر بازاسىنىڭ جاي عانا پايدالانۋشىسى ەمەس, ۇدەرىستىڭ تولىققاندى قاتىسۋشىسى بولۋى كەرەك. ءاربىر ءوڭىر ءۇشىن تسيفرلىق قامتۋ دەڭگەيى, اۆتوماتتاندىرۋ دارەجەسى مەن سۋ شىعىندارىن ازايتۋ كولەمى بويىنشا ناقتى ينديكاتورلار بەلگىلەنۋى دە قاجەت.
سۋ ۇنەمدەۋ تەحنولوگيالارىن ەنگىزۋ, شارۋالارعا سەرۆيستەردىڭ قولجەتىمدىلىگىن قامتاماسىز ەتۋ, كاسىبي كادرلار دايارلاۋ ماسەلەلەرى دە تالقىلاندى. پالاتا سپيكەرى بىلىكتى مامان دايارلاۋ ىسىندە مەملەكەت, جوعارى وقۋ ورىندارى, عىلىم جانە بيزنەس اراسىنداعى بايلانىستى نىعايتۋ قاجەت دەپ اتاپ ءوتتى.
پارلامەنتتىك تىڭداۋعا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, اۋىل شارۋاشىلىعى ءمينيسترى ايداربەك ساپاروۆ, سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, سونداي-اق حالىقارالىق ۇيىمداردىڭ وكىلدەرى مەن ساراپشىلار بايانداما جاساپ, پىكىرلەرىن ءبىلدىردى. ءىس-شارادا ايتىلعان ۇسىنىستار ءتيىستى ۇسىنىمدار ازىرلەۋ كەزىندە ەسكەرىلىپ, ۇكىمەتكە جولدانادى.
