ءتيىستى قاۋلىعا پرەمەر-مينيستر ولجاس بەكتەنوۆ قول قويدى. قۇجات كونستيتۋتسيانىڭ نەگىزگى ەرەجەلەرىن ءتۇسىندىرۋ بويىنشا جۇيەلى جۇمىستى ۇيىمداستىرۋعا, ازاماتتاردىڭ قۇقىقتىق ساۋاتىن ارتتىرۋ, نەگىزگى زاڭ ەرەجەلەرىنەن تۋىندايتىن زاڭنامالىق شارالاردى جۇزەگە اسىرۋعا باعىتتالعان.
جوسپار ءۇش باعىت بويىنشا 36 ءىس-شارانى قامتيدى: ۇيىمداستىرۋ شارالارى, اقپاراتتىق-ءتۇسىندىرۋ جۇمىستارى جانە كونستيتۋتسيانىڭ ورىندالۋىن قۇقىقتىق قامتاماسىز ەتۋ.
اتاپ ايتقاندا, ۇيىمداستىرۋشىلىق ءىس-شارالار اياسىندا كونستيتۋتسيا ءماتىنىن باسىپ شىعارۋ مەن تاراتۋ, ونىڭ ىشىندە مۇگەدەكتىگى بار ادامدارعا بەيىمدەلگەن فورماتتا ازىرلەۋ كوزدەلدى. كونستيتۋتسيا ەلەكتروندى پلاتفورمالاردا ورنالاستىرىلادى. سونداي-اق عىلىمي-ساراپتامالىق قامتاماسىز ەتۋ, اقپاراتتىق-كورنەكى بەزەندىرۋ, تاقىرىپتىق ماتەريالدار شىعارۋ, كورمە جانە اعارتۋشىلىق جوبالارىن جۇزەگە اسىرۋ جوسپارلانعان.
حالىقتىڭ قۇقىقتىق مادەنيەتى مەن قۇقىقتىق ساۋاتىن قالىپتاستىرۋ ىسىنە كوڭىل ءبولىندى. جوسپارعا وقىتۋ سەمينارلارى مەن ءبىلىم بەرۋ ءىس-شارالارىن وتكىزۋ, مەكتەپ پەن جوو باعدارلامالارىنىڭ مازمۇنىن جاڭارتۋ, «قۇقىق نەگىزدەرى» جانە «زاڭ مەن ءتارتىپ» كۋرستارىن, ادىستەمەلىك ماتەريالدار مەن بالالار باسىلىمدارىن ازىرلەۋ كىرەدى.
اقپاراتتىق-ءتۇسىندىرۋ جۇمىسى اياسىندا بىرقاتار ءىس-شارا مەن كەشەندى مەديا-جوسپار ازىرلەندى.
كونستيتۋتسيانىڭ جۇزەگە اسىرىلۋىن قۇقىقتىق قامتاماسىز ەتۋ جونىندەگى ءىس-شارالار, ونىڭ ىشىندە زاڭنامالىق شارالاردى ىسكە اسىرۋ, قولدانىستاعى زاڭنامانى تالداۋ, نەگىزگى زاڭنىڭ نورمالارىن ەسكەرە وتىرىپ, ستراتەگيالار مەن تۇجىرىمدامالاردى وزەكتەندىرۋ شارالارى بولەك قاراستىرىلعان.
جالپى العاندا, جوسپار كونستيتۋتسيا نورمالارىن حالىق اراسىندا كەڭىنەن ءتۇسىندىرۋدى ءارى ەلىمىزدىڭ نەگىزگى زاڭ ەرەجەلەرىنىڭ تولىققاندى جۇزەگە اسىرىلۋىن قامتاماسىز ەتەدى.
