اتالعان باستاما بىلتىر قىزىلوردا وبلىسىنان بارعان دەلەگاتسيانىڭ جەتىسۋ وڭىرىنە جۇمىس ساپارى بارىسىندا قولعا الىنعان ەدى. ساپار اياسىندا اۋىل شارۋاشىلىعى قۇرىلىمدارىنىڭ وكىلدەرى ەلىمىزدەگى ءىرى ءوندىرىس ورىندارىنىڭ ءبىرى – «جاركەنت كراحمال-سىرنە زاۋىتىنىڭ» جۇمىسىمەن تانىسىپ, تاجىريبە الماستى. كەلىسسوز ناتيجەسىندە سىرداريا اۋدانىندا جۇگەرى داقىلىن تەرەڭ وڭدەيتىن زاۋىت سالۋ جونىندە ناقتى ۋاعدالاستىققا قول جەتكىزىلدى.
جاڭا ءوندىرىس ورنى جىلىنا 150 مىڭ توننا جۇگەرى داقىلىن وڭدەيدى. قۇنى 40 ملرد تەڭگە بولاتىن زاۋىت زاماناۋي تالاپتارعا ساي جوعارى ساپالى تەحنولوگيالارمەن جابدىقتالىپ, 550 ادامعا تۇراقتى جۇمىس تابىلادى.
بيىلدان باستاپ وڭىردە جۇگەرى ەگىسىنىڭ كولەمى 15 مىڭ گەكتارعا جەتپەك. ءوڭىردىڭ اگرارلىق الەۋەتىن جاڭا دەڭگەيگە كوتەرۋگە مۇمكىندىك بەرەتىن ءونىم القاپتارى جىل سايىن ارتىپ, تەرەڭ وڭدەۋگە باعىتتالعان جۇگەرى ءوندىرىسىن قولعا العان شارۋالارعا مەملەكەت تاراپىنان قارجىلاي كومەك كورسەتىلەدى.
كەيىنگى 3 جىلدا مەملەكەت تاراپىنان اگرارلىق سالانى قولداۋعا 92,4 ملرد تەڭگە بولىنگەن. بيىل بۇل ماقساتقا 34 ملرد 800 ملن تەڭگە قاراستىرىلىپ, شارۋاشىلىقتار ەسەبىنەن 58 ملرد تەڭگەدەن استام ينۆەستيتسيا تارتىلدى.
بىلتىر اۋىل شارۋاشىلىعىندا 11 ملرد 600 ملن تەڭگەنىڭ 16 ينۆەستيتسيالىق جوباسى ىسكە قوسىلىپ, سالانىڭ نەگىزگى قورىنا تارتىلعان ينۆەستيتسيا كولەمى 74 پايىزعا ارتقان.
2026–2028 جىلدارعا ارنالعان ينۆەستيتسيالىق جوبالاردىڭ جول كارتاسى ازىرلەنىپ, وعان 138 ملرد 200 ملن تەڭگەنىڭ 17 جوباسى ەنگىزىلىپتى. جۇيەلى جۇمىستىڭ ارقاسىندا جالپى ءونىم كولەمى جىل سايىن ءوسىپ كەلەدى.
وتكەن جىلى بۇل كورسەتكىش 233 ملرد 450 ملن تەڭگە بولسا, بيىل 240 ملرد 400 ملن تەڭگەگە جەتكىزۋ جوسپارلانعان.
قىزىلوردا وبلىسى
