ونىڭ دالەلى − ايماقتاعى «وي-قاراعاي», «اپورت», «اقتاس», «اقبۇلاق» سياقتى تاۋ شاڭعى كۋرورتتارىن كەڭەيتۋ, «تۇرگەن» تاۋ شاڭعى كۋرورتى مەن «Park Canyon» تۋريستىك ويىن-ساۋىق كەشەنىن سالۋ بويىنشا جۇزەگە اسا باستاعان ينۆەستيتسيالىق جوبالاردان بايقاۋعا بولادى.
جالپى, وبلىستا قىسقى دەمالىس ورىندارىن جانداندىرۋ ءۇشىن قۇيىلعان ينۆەستيتسيا كولەمى 300 ملرد تەڭگە شاماسىندا ەكەن. جانە بۇل مول قارجىنىڭ 70 پايىزى جەكە كومپانيالاردىڭ قاراجاتى ەكەن. قازىردىڭ وزىندە قايتارىم بەرە باستاعان باستامانىڭ ءبىرى – سارقان اۋدانىنداعى «تەرەكتى» تاۋ شاڭعى بازاسى بولاتىن. قازىر بۇل وڭىردە قىسقى دەمالىس قىزىپ تۇر. 2018 جىلى اشىلعان شاڭعى بازاسى ەندىگى تاۋ سپورتىنا قىزىعاتىن جانداردىڭ سۇيىكتى مەكەنىنە اينالىپ ۇلگەرگەن. تۋريستىك بازادا ۇزىندىعى 737 مەتر بولاتىن شاڭعى تەبۋ جولى, 170 مەترلىك تيۋبينگ سىرعاناق توبەلەر جانە بيىل اشىلعان مۇز ايدىن دا بار.
– دەمالىس ايماعىنداعى جۇمىس قىزىپ تۇر. اۋدان تۇرعىندارىنىڭ باسىم بولىگى دەمالىس كۇندەرى كوپ كەلەدى. ءبىزدىڭ بازاعا كىرۋ تەگىن. كەلۋشىلەردىڭ قاجەتى ءۇشىن وننان اسا شاڭعى, 3 سنوۋبورد,جيىرماعا جۋىق ۇرلەمەلى بالوندار اكەلىپ قويدىق. جوسپارىمىزدا قوناق ءۇي, اسحانا, بالىق اۋلايتىن ايماق سالۋ مىندەتى. قىسقى ءتۋريزمدى اقىرىنداپ دامىتا بەرەمىز, – دەيدى «تەرەكتى» تاۋ شاڭعى بازاسىنىڭ ديرەكتورى ەرجان امانتاي ۇلى.
جالپى, سارقان اۋدانىندا تۋريزم كلاستەرىن دامىتۋعا مۇمكىندىك بار. ازاماتار قولعا العان ءىس اقىرىنداپ تابىس اكەلىپ تە جاتىر ەكەن. ماسەلەن, «تەرەكتى» تاۋ شاڭعى بازاسىنا سوڭعى ءبىر ايدا 300 تۋريست كەلگەن. ال وتكەن جازعى ماۋسىمدا بۇل اۋدانعا الىس-جاقىن شەتەلدەردەن 23 مىڭنان استام دەمالۋشى كەلگەن بولاتىن. سارقانعا كەلۋشىلەردى «جوڭعار الاتاۋى» مەملەكەتتىك ۇلتتىق تابيعي پاركىنىڭ اۋماعى قىزىقتىراتىن كورىنەدى. ۇلتتىق پارك اۋماعىندا 13 ەكولوگيالىق جانە مادەني-تاريحي تۋريستىك باعىت بار. ال بىلتىر وسى تابيعات بايلىعىن كوزبەن كورىپ قايتۋعا 1500 تۋريست ارنايى ات باسىن بۇرعان ەكەن.
